Gadasiya 3 - Anegisemee'm Mina Kapuge

Yesiusi kaa “Mike ae,” nigeke se dimina da me ndo sekii ee, tau ee se mina da

¹ Gadasiya maa kaa togea se Yesiusi mbaya bage woe. Eki'm sese kadeke se dodo me kaa ko ese dimina amina poo mbee kaa miya emi tau se bage mugo dodo se kadeo. Kase enta mugo ndoe, eduga ko ni eki'm emaa misi kaa ese uwa pana se katupina ko Yesiusi Keditusi wai eda piya aoo se piya tukuu me kaa yugumana naabomi se mina me katupima. Ni'm se katupima koya endo se gumba eki wa-nini mbae da se mina yaa mu-mu nakea ae se kadeo. Wai, wai peeto! Mii'm kadeba semai yako wa-nini mina yaa mu-mu nakea naa ya?

² Endo ko bubeke mina ese ona ndo kaseao gai. Me kaa dama naambewaae! Anegisemee Dim'mba wai eki nduwawe ndemimi se dodo me kaa ko eki Anegisemee'm okaa mee tupisi na mina ditona me kaa kiyoo eki nduwawe ndemimi ee? Keditusi kaa mina yemana “Mike ae,” nigeke dimina me kaa kiyoo eki nduwawe ndemimi ee? Tau na! Me Keditusi kaa mina me kaa “Mike ae,” nigeke se dimina me kaa ndo eki nduwawe ndemimi.

³ Kena Anegisemee Dim'mba wai eki nduwawe mi-ndemita mugo ndoe wa'm yaa mani da me kaa kiyoo eki Yesiusi mbaya bage kakiyaami. Ku kindo eduga amba matake se dodo me kaa ko ekii Anegisemee Dim'mba wa'm yaa mani da dito simea koya endo ko Yesiusi wa'm sipi mugo dodo kiyaao kan Anegisemee Dim'mba waya dito taao be. Eki'm aii bada kaasi se yaa mani da me ndo dito taao gai. Ku kaa kiyoo, eki'm dim'mba tau se dimina da waa ku ese wa-nini kigea ae se kadeo.

⁴ Yai, Anegisemee Dim'mba wa'm eki tao kaawawoo simi kao ku aii bada kiyaapea ee? Yai, ku aii bada kiyaapea ae se ku nigaao be. Ku mike maan'dai taambi ae se ku ndo nigaao gai sima.

⁵ Ku kindo ku si aii bada kisi na ku kaa dama nigi si pe taae. Anegisemee wa'm eki tao kaawami ona me ko Anegisemee Dim'mba eki tao kanemi, me ona. Ona me ko ese abayai, mee'm awaao kana se kao waa ku nde miya eki mbo kaawawoo nai, me ona. Ku wiya kaawawoo sipi ku mbao kaa kaawaao gai ee? Eki wa'm okaa mee tupisi na mina ku dama yaa mu-mu se kumana ku kaa kiyoo abayai se kao kaawaao gai ee? Tau na, ku kaa tau! Wa'm abayai kaawawoo nai ku ko ku eki Yesiusi kaa dama mina me yemana “Mike ae,” se nigeke kumana ku kaa kiyoo ndo Anegisemee wa'm abayai se kao kasipa kuwa eki tao kaawawoo nai.

Abedaham wa'm sipi mugo “Mike ae,” nigeke bage waa ku kaa ndo dama aya yadotaao sekii se mina da

⁶ Ese eduga tomi se Abedaham wa kaa dama nigi si pe taae. Dee, eduga ko Abedaham wai Anegisemee'm mina kaa “Mike ae,” se yanigimi. Se yanigimai yako Anegisemee wa ko wa'm Abedaham kaa se yanigina ko “Tau! Abedaham wa ese dim ndumbo se mee to ae, se deo,” se yanigimi.

⁷ Ku kaa kiyoo dama masimaae! Yahudi bage ekii'm taii me Abedaham koya tau! Endo ko Abedaham wa'm taii kaa bage waa ku Abedaham wa'm sipi mugo ekokedona Anegisemee kaa “Mike ae,” se nigeke bage waa kui.

⁸ Anegisemee'm mina kapuge me nda amanimake mina ona aoo. Me amanimake mina me ko me se de. Anikee waa Yahudi tau se bage ekii Anegisemee kaa “Mike ae,” se yanigaasea kumana me dimina me kaa kiyoo kam Anegisemee wai dim ndumbo se bage waa se yakiyaabuu taasi. Me dama tosi na se mina me ko me Anegisemee wa'm Abedaham mbo aii dodo enimi se mina mei! Dee, Anegisemee wa'm Abedaham mbo se enina ko “Ni'm dama tosi na mina kadotaapa ku ko ku a mbo kam mee en'ndo otuma maa en'ndo otuma meaniwoona dama yatoyaabuu taata,” se enimi.

⁹ Wa'm se enimi kumana Anegisemee kaa “Mike ae,” nigeke bage en'ndo otuma ku Anegisemee wa'm dama aya yadotaa se, se bage waa. Ese Abedaham wa'm “Mike ae,” nigimai yako dama aya yadotaa simi sese kui.

¹⁰ Ku koya ogu bage ku eki kaa to dim ndumbo kiyaao kan Anegisemee'm okaa mee tupisi na mina yaa mu-mu taao gai kipii kindo dama aya yadotaake sekii tau. Ku mugo bage ekii'm moo wado kiyoo em yadasi na aya ndigi koena. Kase enta mugo ndoe, Anegisemee'm mina kapuge me nda wudumami mina ona aoo. Mina ona me ko me se de. “Anegisemee'm okaa mee tupisi na mina ku si dan ndo awawoo taao ndo sekii. Mina ona ndo nde miya tamake kipii kindo ko mee me me wa'm moo wado kiyoo em yadasi na aya aoo sima,” se wudumami. Ku mina ku kaa kiyoo ni'm kaseao kan sipa mina me ko me se de. Anegisemee'm okaa mee tupisi na mina si tamake mee to ona kaa miya emi tau kumana me mina me ndo yaa mu-mu nakea se bage waa ekii'm moo wado em yadasi na aya mike aoo ae se ku ndo nigaao sekii. Se kaseao kan sipa.

¹¹ Kena Anegisemee'm mina kapuge waya se nanige-manena ko “Anegisemee kaa ‘Mike ae,’ se nigeke mee to me Anegisemee'm dimina ndumbo yakiyaake mee to. Dimi ndumbo yakiyaai yako mee me me mike iyaao tutai se mee to. Wai mike si dan ndo omiwoo towoo taasi kui.” Anegisemee'm mina kapuge se nanige-maneke. Dee, ku mina ku kaa kiyoo enii'm deao sekii se mina ku se de. Anegisemee wa'm dim ndumbo yakiyaake mee to me Anegisemee'm okaa mee tupisi na mina dito se mee to me tau. Me wa kaa “Mike ae,” nigeke mee to me ndo dim ndumbo yakiyaao sekii. Se deao sekii.

¹² Anegisemee'm okaa mee tupisi na mina ku ko ku kaa “Mike ae,” nigimai yako omiwoo towoo taao sekii se mina se ku tau. Ku mina ku kaa omiwoo towoo taao gai kipii kindo ko “ona kaa miya si taman ndo dama yaa mu-mu se waa, me mugo mee to me ndo omiwoo towoo tuwaao sekii kiyaa.” Anegisemee'm kapuge nda mina se nanige-maneke.

Enii'm woo-woo se kaa em nadasi na aya ku Yesiusi kaa yadotaana naatabemami se mina da

¹³ Enii otuma Anegisemee'm okaa mee tupisi na mina ku tamake kumana enii'm moo wado kiyoo em nadake aya aoo. Ku koya Keditusi wai enii'm woo-woo se ku kaa eda piya aoo se piya tukuu me kaa yugumake se dodo me kaa enii'm moo wado em nadake aya ku masewena wa'm moo wado wa kaa to dotaami. Ken wa'm moo wado kiyoo em yadake aya aoo ae se desi na mina me Anegisemee'm mina kapuge nda kiyoo aoo. Me mina me ko me se de. “Eda piya aoo se piya tukuu kaa yugumake mee to wa'm moo wado kiyoo em yadake aya aoo,” se wudumami. Ku kindo ko Keditusi wai eda piya aoo se piya tukuu me kaa yugumake se dodo me kaa enii kaa em nadake aya ku enii tao naatabemami. Naatabemai yako mina bota kidai.

¹⁴ Mbao awasi na naatabemami ee? Tau, eduga ko Anegisemee wai dama tosi na aya me Abedaham moo kaa yaadotaami. Kena Abedaham moo kaa yaadotaami aya me waya wadobo Yahudi tau se bage ku kaa nde miya yadotaao sekii kisi na Keditusi wai enii'm woo-woo se naatabemami. Waya wada nda enii'm “Mike ae,” nigeke se dimina me kaa kiyoo ko wa'm Dim'mba me nde miya enii tao neao sekii kidai. Me Dim'mba me me, me wa'm ese eduga, “Kaniita,” se mina mamami se Dim'mba to mei! Ku kumana Yesiusi kaa “Mike ae,” se nigita mugo ndoe, ku kasipa kuwa ku enii tao pi-naapamiyaabuu nai. Se.

Anegisemee'm okaa mee tupisi na mina ku wa'm mina mamami se mina dapimake sekii tau se mina da

¹⁵ Yesiusi kaa eniikinaa bage waa woe. Ni'm kaseao kan sipa mina ku dama masimasea na ni mee tuma da kaa bage'm sese ku kaa mina ebeabea da kasiinka ndeo. Ni'm mina ebeabea da me ko me se de. Mee akaa wiya aoo. Mee akaa wiya ku mina dake. Mina damana ndo waa ko mina moo tukitake. Mina moo tukitake se dodo me kaa akaa'm moo tukitake mina ku ba-gamitaao kana kisi na ku kapuge nda wudumagea. Kapuge nda wudumana ko akaa ndepi yaa dine matagea. Yaa dine matana dai kaa waa ko akaa'm moo tukitake mina ku wa-nini kiyaake sekii tau. Waya wa-nini mina ku me nda waya wudumaao iyo. Mina ebanaa ekide-mbeaseke nde miya iyo. Aii ba-gamitaao kana se mina ku ndo se tai. Ku mugo yaa, Anegisemee wa'm enii kaa enii tao asimi mina ku mike ba-gamitaao kana se mina waa, se kaseao kan sipa.

¹⁶ Ese eduga ko Anegisemee wai Abedaham mbo dama tosi na mina yaadotaami. Dama tosi na mina yaadotaami se dodo me kaa ko me Abedaham kaa nuwa, wa'm wado one daasi mee to me kaa nuwa, akaai kaa akaai tao ba-gamitaao kana se mina yaadotaami. Akaai tao ba-gamitaao kana se mina yadotaata mugo ndoe Anegisemee wai Abedaham mbo se asina ko “A'm wado one daasea bage waa,” se asimi se ku tau. Wa'm asina ko “A'm wado one daasi mee to,” se asimi. “Bage waa,” se mina asimi waa, “Mee oba ae,” se nigiyaa. Ku koya “mee to,” se asimi kumana “Ai, ai. Me ese ona ndo se Keditusi wa kaa ba-gamitaao kana se mina asimi ae,” se nigaao sekii.

¹⁷ Ni'm kaseao kan sipa mina me ko me se de. Anegisemee wai wa'm okaa ba-gamitaao kana se mina me Abedaham moo kaa yadotaana ndo waa ko daamee endii pakei 430 ku omana mee ona aoo. Mee ona me ekaa da ko Musia. Kena Musia mbo kiyoo Anegisemee wai yipi se mina yatupimi. Me yipi mina me ko me Anegisemee'm okaa mee tupisi na mina. Me mugo yipi se mina me Musia mbo se yanige-mane sita mugo ndoe, wa'm eduga Abedaham mbo asimi mina ku ba-gamitami yee? Tau na! Abedaham mbo dama tosi na mina ku ko ku ba-gamitaao kana se mina se asimi. Ese ba-gamitaao kana se mina asimi kumana waya wadobo yipi se mina aoo kimi se dodo nde miya me eduga asimi mina ku dapimake iyo.

¹⁸ Ku kindo, Anegisemee wa'm dama aya nadotaasi na se kao me ko me enii wa'm okaa mee tupisi na mina dama yaa mu-mu se kumana dama aya nadotaa se se ku tau. Me wa'm eduga Abedaham mbo Keditusi kaa mina mamami mina ku kaa kiyoo ndo dama tosi na aya nadotaake, kam tau. Se kaseao kan sipa.

¹⁹ Anegisemee wai wa'm mina mamami se mina me kaa kiyoo ndo dama aya nadotaake kumana wa'm okaa mee tupisi na mina ku mbao awasi na wudumami naa ya? Tau, mee tuma da kaa bage ku woo-woo se aoo. Ku kumana “Eki'm woo-woo se ku dewee! Ku si awaae,” se ku aseao kan wa'm okaa mee tupisi na mina ku Musia mbo yanige-manemi. Ku mina ku Musia mbo yanige-manemi se dodo me kaa ku aii kidaa-kidaa se ndo yaa mu-mu sisi na se mina waa. Aii Musia bea da kam ata kise Keditusi kam miyo epopi nda ku ndo dito sisi na se mina waa, se mbeasimi. Dee, Anegisemee wa'm Abedaham mbo ba-gamitaao kana se mina se asina ko “Anikee waa a'm wado one daasea mee to aoo kaasi,” se asimi. Wa'm aii dodo asimi se mina me ko me Keditusi kaa ba-gamitaao kana se mina asimi. Ku kaa kiyoo Keditusi one dana dai kaa waa ko Anegisemee'm okaa mee tupisi na mina ku dano kimi. Anegisemee wa'm aii dodo se mbeasimi koena. Anegisemee wai wa'm okaa mee tupisi na mina ku Isedeo bage yanige-maneao gai se dodo me kaa ko wa'm epo wado bage waa ku wa'm mina dopeana Musia mbo pi-yanige-manemea. Yanige-manena ndo waa ko Musia wai ogiyoo Isedeo bage mbo pi-yanige-manemi. Ku kaa kiyoo Musia wai epota kaa mee to mugo dodo kimi.

²⁰ Kena me gado me kaa epota kaa mee to aoo kumana “O, mbaya wiya aoo ae,” se nigaao sekii. “Naa Anegisemee mbaya, naa Isedeo bage ekii mbaya, mbaya wiya aoo kimea ae,” se nigaao sekii. Ku koya eduga ko Anegisemee wa'm ba-gamitaao kana se mina me Abedaham mbo asimi se dodo me kaa epota kaa mee to emi tau. Anegisemee wa'm awaasi mina me ndo aoo kumana wa'm mina mamami mina me “Ni'm ndo se kaawaata,” se mina, se asimi. Ku kaa kiyoo Anegisemee'm mina mamami mina me ese ebo se mina. Anegisemee'm okaa mee tupisi na mina me mbeenaa mbeedi. Se kaseao kan sipa.

²¹ Anegisemee wa'm eduga “Se kaawaata,” se asimi mina wa-nini, wa'm wadobo okaa mee tupisi na mina wa-nini, ku kumana wa'm okaa me tupisi na mina me wa'm eduga mina mamami mina ku dapimana aii bada kiyaake se mina yee? Tau na! Wa'm eduga mina mamami mina me wa-nini kao awasi na se mina da. Ken ndo waa ko wa'm okaa mee tupisi na mina me nde miya wa-nini kao awasi na se mina. Dodo tau. Dee, Anegisemee wa'm okaa mee tupisi na mina me omiwoo towoo sisi na se mina tau. Me omiwoo towoo sisi na se mina waa, ku ndo yaa mu-mu semana dim ndumbo nakiyaayaa.

²² Ku koya iyo! Kase enta mugo ndoe, Anegisemee'm mina kapuge nda se nanige-manena ko mee en'ndo otuma enii enii'm woo-woo se guna miyo togea se bage waa. Enii'm woo-woo se ku enii'm dimina da waa mbitu nawemake kumana ku enii'm ndo mbeedi mbeaseao kana se kao. “Aii bada ae,” se nigimagea yako Anegisemee wa'm mina mamami mina ku kaa pi-pamiyaami mee to, Yesiusi Keditusi me me, wa kaa ndo “Mike ae,” yanigaao sekii. Wa kaa “Mike ae,” yanigeke bage ku Anegisemee wa'm omiwoo towoo yasiyaabuu taasi se bage waa koena. Wa'm aii dodo mina mamami mina mugo dodo.

²³ Anegisemee wa'm endo se gumba uwa pana se nanige-manena ko wa'm emaa misi kaa dim ndumbo nakiyaasi na, Keditusi kaa “Mike ae,” se ku ndo nigaao sekii. Ku koya ku mina ku uwa pana nanige-maniin tau yoo enii Yahudi bage enii'm moo wado ebo toke me ko me Anegisemee'm okaa mee tupisi na mina. Me mina me enii'm moo wado ebo toke kumana me mina me kaa kiyoo yaa pineana peniyada ee nda nadomaana gine ebo-ebo se namanemapi mugo dodo se towee simea. Kiyoo kam oowaao kana. Aii bada kaamba ndo se tuta siwoo simea.

^24-25 Ku kase enta mugo ndoe, mee tupisi na mina me ko me ebo nadito se mee to mugo dodo. “Se awaao bada! Se awaao daa!” se natupiwoo nai se mina kumana ebo nadito se mee to mugo dodo se kaseo. Ku kindo ko Keditusi ukaan tau yoo mee tupisi na mina me enii'm moo wado ebo se natupiwoo simi. Kisena ndo waa ko Keditusi ukimana dai kaa waa ko enii'm toke yoo wa-nini kidai. Endo se gumba okaa mee tupisi na mina ku si diton ndo Keditusi kaa “Mike ae,” nigeke ndo. Keditusi kaa “Mike ae,” nigimagea yako Anegisemee emaa misi kaa dim ndumbo se bage waa se nakiyaami.

²⁶ Kena Yahudi tau se bage eki nde miya Yesiusi Keditusi kaa “Mike ae,” se yanigeke. Ku kindo eki'm “Mike ae,” nigeke se dimina da me kaa kiyoo eki otuma Anegisemee wayombai waa se kakiyaami.

²⁷ Kase enta mugo ndoe, Keditusi kaa “Mike ae,” se yanigimata mugo ndoe, Keditusi mesema kadipinimapi kidai. Keditusi mesema kadipinimai yako Anegisemee'm emaa misi kaa kiyoo “O, ku Keditusi wa'm inda-banda agidimapea se bage waa mugo dodo ae,” se kadetai.

²⁸ Waya kiyoo kam eki otuma Keditusi Yesiusi nda dodo ndo se kadetai. Kum seta kaa Anegisemee'm emaa misi kaa “O, me Yahudi bage ae. O, me Yahudi tau se bage ae,” ku nde miya wai kapikamoo taao be. “O, me yaa pineana masii mata se mee to ae. O, me yaa pineana masii mata se mee to tau ae,” se ku nde miya kapikamoo taao be. “O, me mbayuwaa ae. O, me ambii, ae,” se ku nde miya kapikamoo taao be. Waya na kiyaa eki otuma Keditusi nda mbaya ona ndo se kadetai.

²⁹ Waya wada nda Keditusi wa'm taii me Abedaham. Ku kumana eki Keditusi nda dipinimana wa'm bage waa se kakiyaata mugo ndoe, eki'm okaa taii me namba Abedaham kidai. Kena eki'm taii me Abedaham kumana wa tao dama yatoyaasi na aya, Anegisemee wa'm wa tao yambeasimi se mina kuwa ku eki kaa nde miya kadotaa taasi se mina da kidai. Ba-gamitake sekii tau. Ku mike kaniisi sima!