Gadasiya 1 - Anegisemee'm Mina Kapuge

Paudusi wa'm Gadasiya maa kaa togea se Yesiusi mbaya bage ekii kaa “Aba, aba,” se asimi se mina waa

¹ Me kapuge me ko me ni, Paudusi, ni'm kaawudumaao kan keo se kapuge. Ni ko ni Yesiusi kaa napeyaami mee to. Mee waa ekii mbaya ona kam napeyaamea se ku tau. Aii miga mee tuma kaa mee to kam napeyaami se ku tau. Ku se ku tau koya napeyaami mee to ona me ko me Yesiusi Keditusi me ona. Ona me ko me Yesiusi maa poo yoo yandomami se Anegisemee Naamee to, me ona. Ku akaa wiya akaa'm gai kan napeyaagea yako Edaseo se mee to se nakiyaamea.

² Me kapuge me ko me Gadasiya maa kaa Yesiusi kaa andagatagea bage waa eki tao kapuge eewee. Ni mbo aoo se Yesiusi kaa eniikinaa bage waa ku mesema enii ndepo dimina ona ndo kan “Me kapuge me me, eki tao eewee,” se kaseo.

³ Aba! Enii'm Anegisemee Naamaa mesema Tuhani Yesiusi Keditusi me mesema, akaai aii se dama katoyaagea waa bada ae se kaanigeo, me ona. Kena ona me ko ese widigi tau se dimina da me nde miya kakumagea waa bada ae se kaanigeo, me ona. Ku wiya ku kaa-awatai waa bada ae, se kaanigimana “Aba, aba,” se kaseo.

⁴ Yesiusi wa ko wai wa kaa to ekamana enii'm woo-woo se kaa naabomi se mee to. Aii se naabomi se ku tau. Dee, endo se gumba maa kaa togea se bage waa ku ese peu-pau sese ku guna miyo tutakea se bage waa. Ku enii'm ndo mbeedi mbeaseke sekii tau sese. Ku kumana ku peu-pau sese ku mbeedi naambeana dama natoyaabuu taao kan Yesiusi wai enii kaa enii tao naabomi. Wa'm naabomi me ko wai enii'm Anegisemee Naamee wa'm gai kan naabomi.

⁵ Ku kaa kiyoo endo kam wado, enii ese si dan ndo omiwoo towoo semuu sita mugo ndoe, Anegisemee wa ekaa da me ebo yambeana yapapa siwoo nakea waa bada ae, se nigeo. Kui!

Anegisemee wa'm dama mina me ese ona ndo aoo ae se nigisi na se mina da

⁶ Keditusi wa'm aii se naatabemami se mina me ko me Anegisemee wa'm dama se mina da mei! Me dama mina me eki'm yemea se gumba ko me mina me kaa kiyoo Anegisemee wai mina kawoewemi. “Ni mbaya bage kaae,” se mina, mina kawoewemi. Ku koya ni'm se kadena ko ekii “Mike ae,” se nigimana onu oba omaan tau yoo mina kawoewepi se Anegisemee wa kaa duwa matana wa-nini se dama mina me kaa emba matake, se kadeo. Yai, me kase bage kao?

⁷ Wa-nini se dama mina me aoo baa! Ku kindo ko wa-nini se mina tupitakea bage ku ko ekii Keditusi kaa dama mina ku dime kan kupoo kiyaana yowitana kaabu-gabu siyaake se mina waa ku ndo katupitakea.

⁸ Ku kaa kiyoo ni ese oyu se mina kasiinka ndeo. Eduga ko enii'm katupina ko me Anegisemee wa'm dama mina me ndo katupima. Ku kumana mee ona wai “Wa-nini se dama mina katupaanka ndeo,” se kaseke kipii kindo ko mee me ko me bidea uwo ndoiba yadomaai waa bada ae, se yanigeo. Enii Edaseo se bage waa ku nde miya kupoo se mina katupipa kipii kindo ko bidea uwo ndoiba nadomaai waa bada ae, nigeo. Kena Siduga kam endemapi se epo wado bage nde miya wa-nini se mina katupipi kipii kindo ko bidea uwo ndoiba yadomaai waa bada ae, nigeo.

⁹ Enii'm eduga kasima mina me waya kasiinka ndeo. Me mina me ko me se de. Eduga yemea se dama mina wa-nini, endo katupitai se dama mina wa-nini, me mugo yeke kipii kindo ko wa-nini mina katupitai se mee to me bidea uwo ndoiba yadomaai waa bada ae, se mugo mina kasima.

¹⁰ Ni'm oyu kan kaseao kan sipa mina kuwa ku mee'm nagai kisi na se mina kasipa yee? Mee'm “Awanke! Awanke!” se nanigisi na se mina kasipa yee? Tau na, Anegisemee'm wa'm ndo “Awanke! Awanke!” nanigaambi kao ku kaa ndo “Awaa waa oowoo,” se nigimapa kumana se kasipa. Eduga kindo ko mee'm nagai kisi na se kao waa ku awawoo sima. Ku koya endo ko ni Keditusi tao ndanda yaawanaa se mee to kumana me mugo dimina waya wadobo nigaao be. Mee'm nagai kisi na se kao ku awaao oowoo se nigeke waa, Keditusi tao ndanda ku wisin'tayaa.

Paudusi wa'm Yesiusi kaa epi kimi se mina ku Anegisemee wa'm ndo yanige-manemi se mina waa

¹¹ Yesiusi kaa eniikinaa bage waa woe. Ese ndumbo mina kasiinka ndeo. Ni'm eniwoo sima mina, Anegisemee'm dama mina me ko me mee'm nigita kaa mina se ku tau.

¹² Kase enta mugo ndoe, me mina me ko me ni'm mee mbo kam pi-yewema se mina tau. Me mee'm nanige-manemi mina se tau. Me Anegisemee wa'm ndo nanige-manemi se mina da. Kase dodo nanige-manemi ee? Tau, Anegisemee wai Yesiusi Keditusi uwa da kaa naadeyaata mugo ndoya me kaa kiyoo kam wa'm dama mina ku nanige-manemi. Kiyoo kam wa'm dama mina me dama masimama.

^13-14 Ku kasipa mina ku kaa “Mike ae,” se nanigisea na ni'm ese eduga toma sese ku eki epi kumana ku kaa nigi si pe taae. Dee, ese eduga ko ni Yesiusi kaa “Mike ae,” nigaan tau se dodo me kaa ko ni'm sese ku se de. Ni ko ni Yahudi bage waa ekii'm sese nuwa, ekii'm “Mike ae,” nigeke mina waa ku nuwa, ku se ku ni ese oyu kan yaa mu-mu siwoo sima se kao waa. Ku enii Yahudi bage enii'm eedoo bage waa ekii'm nambeasimea sese kumana ku ni'm ese dimina ona ndo kan tamaao be. Ku kindo enii'm eedoo bage'm tata ku kaa ndo nigi si pe se, awawoo se, nigi si pe se, awawoo se, se awawoo sima. Ku kaa kiyoo Yahudi bage'm sese yaa mu-mu se me ko ni ese asiyoo. Ni bea da se Yahudi bage waa ogu ekii miyo damana ni ese asiyoo kam asiyoo kiwoo sima. Ni'm sese ese wa-nini kima se dodo me kaa ko ni Anegisemee mbaya bage, Yesiusi kaa andagatake bage kuwa, ku kaa ese yabeama. Ku kaa ese beaa yako omiyaa siyaa ku ndo ku yapisime-mbeaseao kan awa-de siwoo sima. Ese oyu kan peu bodi ababa se aya yadotaa siwoo sima. Ku se ku awawoo sima ku eki naeo baa.

^15-16 Ku se ku awawoo sita mugo ndoe, Anegisemee wa ko wa'm gai kan se naadeyaana ko “Yesiusi me ko me Niyombai,” se naadeyaami. Mbao awasi na Wayombai naadeyaao gai kimi ee? Tau, Wayombai kaa mina ku dopeana Yahudi tau se bage mbo pi-eniwoo sisi na, Wayombai naadeyaami. Dee, ku awasi na, ese eduga edugana ko ni ogindaa niyoi yambuu nda ndigi se dodo me kaa ko Anegisemee wa'm wa-nini nawenimami. Wa'm wa-nini nawenimana kisena ndo waa ko wa'm aii se dama natoyaao gai se dimina da me kaa kiyoo mina nawoewemi. Ku semaata mugo ndoe Yesiusi kaa “Mike ae,” se nigimama. Yesiusi kaa “Mike ae,” se nigimana dai kaa waa ko “O, endo ko ni se awaamba ee? Se awaamba ee?” se ku nigi si pe sita mugo ndoe ku kaa mee mesema mina amoe-moe taan tau.

¹⁷ Kena ogiyoo Yedusedem okaa yoo kiyoo ko ogu Edaseo bage waa aoo. Ku kita Yesiusi kaa yapeyaami bage waa kimea. Ni ko ni ogudi. Ku koya “Ni mbao awaamba ee?” se mina se ku ni ekii mbo nde miya pi-asiin tau. Ni ko ni wa-nini yoo, mee emi tau se yoo, Adab maa me kaa kiyoo ndo pema. Me kaa pewena ndo waa ko waya Damesiki okaa yoo me kaa ukima. Se awama.

¹⁸ Kisena ndo waa ko daamee endii pakei wido omana Yedusedem okaa yoo me kaa pakemama. Yedusedem okaa yoo me kaa pakeke me ko me Petadusi mesema mina amoe-moe taao kan pakemama. Kiyoo pakemana ko onu haas kumana bado kaa edibi omima ku ko ku Petadusi mbo omiwee sima.

¹⁹ Wa mbo omiwee sita mugo ndoe, Tuhani Yesiusi wa'm winaamee, Yakobusi me me, me nde miya ade semama. Ku koya ogu Edaseo se bage waa ku ona kaa miya ade semaan tau.

²⁰ Ndumbo kaseo! Anegisemee nadito nai kumana mbae da mina kaawudumeke iyo. Aii ndumbo mina ku ndo kaawudumeo.

²¹ Kena ndo waa ko Yedusedem okaa yoo batana ogiyoo Sidiya maa me kaa nuwa, Kidikiya maa me kaa nuwa, ku maa ku kaa kiyoo pi-penaa siwee sima.

²² Ku maa ku kaa pi-penaa siwee sita mugo ndoe, ni'm batapa yoo tomea se bage waa, Yudea maa kaa Keditusi kaa andagatagea bage kuwa ku ni mesema ade semaan tau se bage waa.

²³ Ku Yudea maa kaa Keditusi kaa andagatagea se bage waa ku mesema ade semaan tau koya ekii ni kaa mina se yena ko “Ai, ai. Eduga ko mee me me wai Yesiusi kaa ‘Mike ae,’ nigeke bage ku beai yako napisime-mbeaseao kan awa-de siwoo simi se mee to. Me ese peu bodi ababa se aya nadotaa siwoo simi se mee to. Ku koya endo ko wa'm sese me kawitana Yesiusi kaa ‘Mike ae,’ nigisi na se mina ku donaa asinaa nai, ae,” se mina nayemea.

²⁴ Ni kaa mina se nayemagea yako ekii Anegisemee mbo “Paudusi kaa yaawan sime! Yaawan sime!” se mina naasetoo simea. Dee, Anegisemee'm dama mina me epi kima se dodo me kaa ko me mee'm nanige-manemi se mina tau. Me Anegisemee wa'm ndo nanige-manemi se mina da se kaseao kan sipa.