Edoma 16 - Anegisemee'm Mina Kapuge

Paudusi wa'm “Aba, aba,” se asimi se mina waa

¹ Eki mbo kaukipi ambii to ambe wa ekaa da ko Pebe. Me Pebe me ko wai Yesiusi kaa eniikinaa se ambii. Wai aii ambii se ku tau. Dee, ogiyoo Ken'kedea okaa yoo kiyoo Yesiusi kaa andagatagea se bage waa ku aoo. Kena ekii tao maanisi na ndanda yaa-awawoo nai se ambii me ko me me Pebe mei! Ku kumana wa kaa dama yadito taae.

² Wai, eki mesema Tuhani nda dipinimapi se ambii kumana “Aba, aba. Nakayoo naomaae,” se mina ku ndo aseao ndo bada. Me mugo sese awake me ese Anegisemee wa'm bage waa enii'm awaao disi sese kumana ku ndo yaawaae. Dee, me ambii me ko wai ogu bage ese oba mugo ekii tao dama ndo yaawawoo sipi se ambii to. Wai ni kaa ni tao nde miya dama naawawoo sipi. Kum seta kaa yaogayo patasea na eki nde miya wa kaa dama ndo yaawaae. Wa'm dama tosi na se kao ku otuma wa tao aii se maniwoo taae.

³ Kena Pedisikida mesema wa'm yimee Akawida mesema, akaa bubee kaa “Aba, aba,” se naaseae. Akaa bubee ku ko ku ni mesema Keditusi Yesiusi kaa ndanda yaa-awanaa se bubee to.

⁴ Enii ndepo se awamea se dodo me kaa ko akaa'm sese me ko me se de. “Paudusi dama tosi na se kao yaa-awaao kan mee'm nambatumake nde miya bada o,” se dimina da se yaa mu-mu simea. Me dimina me kaa kiyoo ese mike mbeenaa aoo kumana waa ko mee'm yambatumayaa. Ku degea yako ni nuwa, ogu Yesiusi kaa andagatagea se Yahudi tau se bage en'ndo otuma ku nuwa, enii ndepo akaa bubee kaa “Paowii. Paowii,” se ku ndo yanigigea.

⁵ Ku kindo akaa bubee nuwa, akaa'm ee nda Yesiusi kaa andagatagea se bage waa ku nuwa, ekii kaa “Aba, aba,” se naaseae. Kena ni'm ese embaake se nemugoi, Epenetus wa kaa nde miya “Aba, aba,” se naaseae. Eduga ko Asiya maa kaa tomea se bage waa ekii Keditusi kaa mina yemea se dodo me kaa ko ese eduga edugana wa kita “Mike ae,” se nigimi se mee to, me Epenetus wa kita “Mike ae,” se nigimi.

⁶ Kena Madiya, wa kaa nde miya “Aba, aba,” se naaseae. Me ambii me ko wai eki tao ndanda ese oyu kan kaa-awawoo nai se ambii to.

⁷ Kena An'dodonikusi mesema Yuniasi, akaai kaa nde miya “Aba, aba,” se naaseae. Akaa namba Yahudi bage. Ni namba Yahudi bage. Kena, akaa kita Keditusi kaa “Mike ae,” se nigimea. Ni ko ni ogudi. Kisena ndo waa ko mee waa ekii yaa nayapamitana peniyada ee nda nadomaamea se dodo me kaa ko akaa namba yapamitagea yako ni mesema peniyada ee nda yadomaana towoo simea. Kena akaa'm maaneke sese awawoo simea kuwa ku ogu Edaseo se bage en'ndo otuma akaai kaa yaepi kimea.

⁸ Kena Am'piyatusi wa kaa nde miya “Aba, aba,” se naaseae. Wa namba Tuhani nda dipinimai yako ese ni'm embaake se nemugoi mei!

⁹ Kena Udubanusi wa kaa nde miya “Aba, aba,” se naaseae. Me Udubanusi wa ko wai enii mesema Keditusi kaa ndanda ku yaa-awawoo nai se mee to mei! Kena ni'm ese embaake se nemugoi, Setakisi me me, wa kaa nde miya “Aba, aba,” se naaseae.

¹⁰ Kena Apedesi wa kaa nde miya “Aba, aba,” se naaseae. Me Apedesi me ko wai Keditusi kaa bodi ababa simi koya wa'm Keditusi kaa nigeke se dimina da me magi tau se tai. Magi tau ku yadena ko Keditusi wai wa kaa “Awanke. Awanke,” se ku ndo yanigii. Kena Adisitobudusi wa'm ee nda togea bage ekii kaa nde miya “Aba, aba,” se naaseae.

¹¹ Kena ni ko ni Yahudi mee to. Kena mee ona, Hedodioni me me, wa namba Yahudi mee to. Wa kaa nde miya “Aba, aba,” se naaseae. Kena Nakisiusi wa'm ee nda togea se Tuhani mbaya bage waa ku kaa nde miya “Aba, aba,” se naaseae.

¹² Kena Tadipena mesema Tadiposea, Tuhani kaa ndanda ku ese oyu kan yaa-awawoo nakea se ambii wiya kuwa, ku akaai kaa nde miya “Aba, aba,” se naaseae. Kena ni'm embaake se nemugoi, Pedesisi wa ko wa namba Tuhani kaa ndanda ese oyu kan yaa-awawoo nai se ambii to. Me wa kaa nde miya “Aba, aba,” se naaseae.

¹³ Kena Dupusi wa kaa nde miya “Aba, aba,” se naaseae. Dupusi wa ko wai Tuhani wa'm gai-gai ku ndo ese oyu kan yaa mu-mu nai se mee to. Kena wayoi kaa nde miya “Aba, aba,” se naaseae. Wayoi me ko wa'm ni tao naawawoo simi me ese wa'm okaa wayombai kaa yaawayaa mugo dodo se naawawoo simi. Ku kindo ku akaa sepuu kaa “Aba, aba,” se naaseae.

¹⁴ Kena Asin'keditusi nuwa, Pegoni nuwa, Hedemesi nuwa, Patobasi nuwa, Hedemasi nuwa, waya ekii mbo ogu Yesiusi kaa kinaa bage waa ku nuwa, ekii kaa nde miya “Aba, aba,” se naaseae.

¹⁵ Kena Pidodogusi nuwa, Yudiya nuwa, Nedeusi nuwa, wa'm okiyamee Odim'pasi nuwa, waya ekii mbo Anegisemee mbaya bage ku en'ndo otuma ku nuwa, ekii kaa nde miya “Aba, aba,” se naaseae.

¹⁶ Kena ogu Yesiusi mbaya bage mesema ade sita mugo ndoe Yesiusi kaa a-embaa naa-embaa se kan poko kaa ebe a-dudu naa-dudu taae. Kena nakayoo Keditusi kaa andagatagea se bage en'ndo otuma ku nde miya eki kaa “Aba, aba,” se kasigea.

Paudusi wa'm pake-takanu tupaao kan simi se mina waa

¹⁷ Nikinaa bage waa woe! Ni'm kakoeta taao gai se mina ku se de. Ebanaa bage ekii ko ekii Yesiusi mbaya bage si maaniyaake se bage waa. Kase enta mugo ndoe, ekii'm tupitakea mina waa ku Yesiusi mbaya bage pata oba kiyaao kan sipea se mina waa, me ona. Ona me ko ekii'm Anegisemee kaa tupitakea mina waa ku eki'm eduga yemea se mina waa se ku tau. Ku wa-nini mina ku kaa pi-kaembeniyaao kan sipea se mina waa ku ndo tupitakea, me ona. Ku kumana ku ekii'm si kamaaniyaao kan sipea ku aii bada kisi na eki kaa to dama dito taae. Waya ku mugo bage mesema mbeenaa kaa miya si tomu taae.

¹⁸ Dee, ku mugo bage ekii Tuhani Yesiusi Keditusi wa'm gai-gai yaawanaa se se bage waa se ku tau. Ekii ekii'm gai-gai ku ndo awawoo nakea se bage waa. Waya ekii'm sese ona me ko ekii mee yadeba taao kan ese tunaa, mee'm yeao gai se mina waa ku ndo en'takea. Ku mugo mina en'takea se dodo ndoe, ekii'm mee yadeba taao kan sipea se dimina deao kana se bage waa ekii mani “Mike ae,” se nigeke ndo.

¹⁹ Edoma okaa yoo togea se Yesiusi mbaya bage waa woe. Eki ko eki Anegisemee'm mina si taman ndo wa'm gai-gai yaa mu-mu nakea se bage waa. Eki'm sese ku ogu bage en'ndo otuma kaepi sese waa. Kum seta kaa ni eki kaa kabani-bani se aoo. Ku kaa kabani-bani se aoo koya ni'm kasiinka mina ku nde miya dama naayito taae. Dama ndumbo se kao ku kaa epi kina awawoo sisea na, dim pame aoo se dimina kapiwoo taae. Waya kawitana peu-pau sese waa ku eo se dimina da me ndo yaa mu-mu taae.

²⁰ Kena mbeenaa aoo kumana waa ko widigi tau natoyaabuu nai se Anegisemee wai eki tao Ibedisi mbeedi kaambeasiimbi. Ibedisi mbeedi kaambeaseke sese me ko me eki'm bado dagi miyo Ibedisi yagamiyaake sese mugo dodo. Kena ni'm kaasetoo se mina ona me ko enii'm ebo toke se Tuhani, Yesiusi Keditusi me me, wai aii se dama katoyaai waa bada ae se kaanigimana ku kaa kiyoo kaasetoo naka.

²¹ Endo ko nakayoo “Aba, aba,” se kasigea se bage ku ekaa da waa ku kasiinka ndeo. Ona me ko me Timotiusi. Timotiusi wa ko wai ni mesema dipinimana ndanda yaa mu-mu nai se mee to. Kena Dukiusi nuwa, Yaseoni nuwa, Siosipateda nuwa, ku bage ku namba Yahudi bage. Kena ekii nde miya “Aba, aba,” se kasigea.

²² Kena Paudusi wa'm enipi mina ku masewena me kapuge me nda yaawudumapa mee to me ni, Teotiusi. Ni nde miya Tuhani kaa “Aba, aba,” se kaseo.

^23-24 Waya ni, Paudusi, ni Gayusi wa'm ee nda omiwee naka. Kena nakayoo Yesiusi mbaya bage ku ko ekii andagatake se dodo me kaa me Gayusi wa'm ee me nda nakayoo andagata semuu nakea. Me Gayusi me me, wa nde miya “Aba, aba,” se kasii. Kena nakayoo okaa yoo, pemedinta bage ekii'm kipe ku yaadito se mee to ona aoo. Mee me me, wa ekaa da ko Edasetusi. Wa nde miya “Aba, aba,” se kasii. Kena Yesiusi kaa eniikinaamee to, Kawadatusi wa nde miya “Aba, aba,” se kasii.

Ese asiyoo kam asiyoo ebo toi se Anegisemee wa kaa “Paamee! Mataae!” se asisi na mina da

^25-26 Enii otuma Anegisemee wa kaa “Paamee! Mataae!” se eniwoo taao ndo bada. Kase enta mugo ndoe, wai enii'm dimina otuma natakuniyaabuu taao sekii se Anegisemee to koena. Dee, Yesiusi kaa dama mina, ni'm eniwoo naka se mina kuwa ku yeke se dodo me kaa ko ku mina ku kaa kiyoo kam Anegisemee wai enii dimina da waa ku oyu natakuniyaabuu nai. Eduga edugana ko ku Keditusi kaa dama mina kuwa ku mee tuma kaa bage'm eo se mina waa. Ese eduga kam wado ku mina kuwa Anegisemee wa'm koo gamai yako eedoo bage'm yiin tau se mina waa. Eduga eo koya endo ko tau. Endo ko epi kimapea. Enii'm epi nakiyaapea ona me ko Anegisemee wa'm nanige-manei yako epi kimapea, me ona. Ona me ko nabi bage'm mina kapuge ku namba nanige-manei yako epi kimapea, me ona. Ku wiya ku kaa kiyoo kam wa'm koo gamami mina ku uwa kaa nakiyaai yako enii Keditusi kaa dama mina epi kimapea. Ese asiyoo si dan ndo omiwoo towoo nai se Anegisemee to wa'm se asina ko “Ni'm mina ku donaa asinaaina mee en'ndo otuma odeeniyaae,” se aseke. Aii se aseke se mina se ku tau. Mee tuma en'ndo otuma “Mike ae,” se nigi sisi na, me ona. Kena “Mike ae,” se nigimana Anegisemee'm gai-gai yaa-awawoo sisi na, me ona. Ku se ku awasi na Anegisemee wa'm asina ko “Ni'm mina ku naaduwaae,” se aseke. Waya ku kaa kiyoo kam wa'm dama mina ku mee en'ndo maa en'ndo otuma odeeniyaapea.

²⁷ Yai, Anegisemee wa ndo ese asiyoo kam asiyoo dim pame nomata se mee to. Kum seta kaa, Yesiusi Keditusi wa'm naa-awami ku kaa kiyoo kusipimana ese si dan ndo Anegisemee wa kaa “Paamee! Mataae!” se mina ku ndo eniwoo semuu taao ndo bada. Kui! Ni, Paudusi, ni'm mina se naa aoo.