Edaseo Bage 3 - Anegisemee'm Mina Kapuge

Yedusedem okaa yoo kiyoo Yesiusi mbaya bage ekii oba kiwoo simea 3:1–6:7 Petadusi wai peao eo se mee to peao epi yakiyaami se mina da

¹ Yahudi bage ekii'm sese ko omiyaa siyaa yam 3 mugo Yahawee asetaake se awawoo simea. Ku kumana ko ea na gapi, yam 3 se dodo me kaa ko Petadusi mesema Yohanesi akaai Yahawee'm ee kaa peke.

² Yahawee'm ee kaa peke se dodo me kaa ko peao eo se mee to ona aoo. Mee me ko me aii bage'm yadopeana megea, Yahawee'm ee eda gine me kaa mi-mbeaseao kan. Yahawee'm eda gine me ekaa da ko “Deao Disi se Eda Gine to.” Peao eo se mee me me wa'm one dana wado tuta se yoo ku otuma peao kana ndo se tutai se mee to. Ku kumana ko omiyaa siyaa ku ndo aii bage'm yadopeana “Deao Disi se Eda Gine” me kaa yambembo siwoo nakea. Yahawee'm ee nda mi-ndemaambea se bage waa ku mbo uwani edaasi na kiyoo yambembo siwoo nakea.

³ Kena ndo waa ko Petadusi mesema Yohanesi akaai Yahawee'm ee nda ndemaankea ae se dodo ndoe, mee me me wa'm se asina ko, “Uwani nii. Uwani nii,” se aseke.

⁴ Se asemana ko akaai mee me emaa woeke. Emaa woetata mugo ndoe, Petadusi wa'm se asina ko “Anai nadewaa. Anai nadewaa,” se aseke.

⁵ Se asemana ko mee me me wa'm nigina ko “Ai, ai, uwani mugo niinkea, ae,” se nigeke kumana akaa mbo emaa woemana dito se.

⁶ Wai akaa dito sita mugo ndoe, Petadusi wa'm se asina ko “Pedaki nuwa, eamasi nuwa, ku emi tau. Ku mugo uwani emi tau koya ni'm aoo se kao ku ndo kaniimba ndeo,” aseke. “Endo ko Yesiusi Keditusi, Naseadesi mee to me ekaa da kaa inewena maa-maa amba penaa taae,” aseke.

⁷ Se asita mugo ndoe, yaa meyaa yato me yaa yapamitana wegii ndoe ineweyaake. Ineweyaata mugo ndoe bado-bado, bado guba - bado guba ku otuma mbiseoo kidai.

⁸ Mbiseoo kumai se gumba widana bado kaa pakaaneke. Bado kaa pakaaniina ko penaa se. Penaa, penaa sita mugo ndoe, Yahawee'm ee yoo da kaa peaneke. Peanii se dodo ko bani-bani se kan widana peaneke peke, widana peaneke peke, widana peaneke peke se awatai. Se awatai se dodo ndoe, wai Anegisemee kaa yaapapa semuu nai.

⁹ “Anegisemee paamee! Mataae!” se asetaake. Se penaa asetoo, penaa asetoo se dodo me kaa ko yau-yau bage ekii otuma dito se. Ku se ku dito semuu nakea ndoe,

¹⁰ ekii'm se nigina ko “Ai, ai, mee me ko wai uwani edaao kan Yahawee'm ee yau-yau eda da nda ‘Deao Disi se Gine to’ me kaa tomu nai se mee to me ae,” se nigeke. Se nigimagea yako ese ndugidi se aoo. Ese “Abayai! Eduga ko mee me me wai peao eo koya endo ko mbao awana naa peao epi kipi naa ya?” se yanigeke.

Petadusi wa'm yau-yau dito se bage waa ku mbo asei simi se mina da

¹¹ Ekii yau-yau dito se bage ku ese ndugidi se kan “Abayai!” se nigimagea yako oika medona Petadusi, Yohanesi akaa mbo mani andagatake. Akaa mbo mani andagata sita mugo ndoe, peao epi yakiyaapi mee me me, wai bani-bani se kan Petadusi, Yohanesi yaa da a-yapamita naa-yapamitana penaa se. Penaa se se dodo me kaa ekii'm andagatagea yoo me ekaa da ko Seadomo Bagogo kaa.

¹² Ku mee kooda ku ndugidi se kan andagatapea se ku dena ko Petadusi wa'm ekii se asina ko “Isedeo bage waa woe. Kase koena eki ku kaa ndugidi se aoo?” aseke. “Kase koena ana ndo nadito nakea?” aseke. “Peao eo se mee to peao epi yakiyaake me me, me ana'm yaa mani da oyu kan peao epi yakiyaapa se nanigeke yee? Ana ko ese dimi ndumbo kumana ku kaa kiyoo kam peao epi yakiyaapa ae se nanigeke yee? Yai ku mugo nanigeke ku tau. Kase koena ana ndo nadito nakea?” aseke.

^13-16 Kena Petadusi wa'm waya se asina ko “Enii ko enii'm se nigina ko, ‘Yesiusi wa sekii, ae,’ se nigipa kumana Yesiusi ekaa da kaa ekaa woei ndoe peao epi kidai sipi,” aseke. “Dee, eduga ko me Yesiusi me me wai ese Anegisemee'm mina dama yito se ndo. Tamaao eo. Wai ese Anegisemee'm Gai-gai ku ndo Yaa-awata se Mee to. Wai ese Dimi Ndumbo se Mee to. Ese peu-pau se kao ona kaa miya emi tau koya eki'm yabeamea ndo. Eki yabeagea yako yambatumaasi na yaa wedona Edoma bage'm ebo toke mee to, Pidatusi me me, wa mbo pi-manimea. Pidatusi mbo pi-manina ko Pidatusi wa'm se asina ko ‘Yesiusi yaa ekatana yapeyaake bada,’ se aseke koya eki'm asina ko ‘Tau de! Yesiusi yambatumake ndo bada. Mee agumee, mee mbatumapi mee to me ndo yaa ekatana yapeyaake bada. Yesiusi tau,’ se asimea. Eki bage se asimea kumana Yesiusi, ese Mee Toyaake Mee to me me, eki'm yambatumamea, se kadema. Eki'm se yambatumamea koya ku semana ndo waa ko enii'm dema ku kasiinka ndeo. Anegisemee wa'm Yesiusi maa poo yoo yandomapi se dema,” aseke. “Endo ko Anegisemee, eki'm eedoo bage'm Anegisemee me me. Abedaham nuwa, Isiaki nuwa, Yakubi nuwa, ekii'm yapapa simea se Anegisemee me me, wa'm ndo Yesiusi ekaa da me ese ebo, ese asiyoo yaakiyaapi. Kena yimkaa enii ko enii'm me Yesiusi kasipa me me wa kaa ‘Yesiusi wa sekii ae,’ se nigipa. Se ku nigimana Yesiusi ekaa da kaa peao eo se mee to peao epi yakiyaapi,” aseke. “Dewee. Yesiusi ekaa da kaa yapeyaapa mee to me dewee,” aseke.

¹⁷ “Nikinaa bage waa woe. Ni'm kanigina ko ‘Eki mesema, eki'm ebo bage waa mesema, eki'm si nige-nigea yako Yesiusi yambatumamea, ae,’ se kanigeke,” aseke.

¹⁸ “Yesiusi yambatumamea me ko me eduga Anegisemee'm mina yaa-enei se mee waa ekii'm enimea mina waa kui. Ekii'm eduga se enina ko ‘Anikee waa Anegisemee'm yapeyaasi mee to, Keditusi me me, me mee'm ese peu-pau, ese bodi ababa siyaasea,’ se enimea. Kena Anegisemee'm aii dodo enimi mina ku pi-pamisi na se yaawamea kui,” aseke.

¹⁹ “Ku kindo ko eki'm woo-woo se ku mbana-mbeana Anegisemee kaa ndo emba mataae,” aseke. “Eki'm woo-woo se ku otuma kaekide-mbeasisi na se awaae,” aseke.

²⁰ “Kena ndo waa ko Tuhani wai ese etaa widigi tau se dimi kakumaambi. Etaa se dimi kakumana ko Yesiusi Keditusi, eduga Anegisemee wa'm eki kaa eki tao kaambeasimi mee to me me, wai eki mbo waya yapeyaasi,” aseke.

²¹ “Endo ko Yesiusi Keditusi wai Siduga toke. Kiyoo tomuna anikee waa ukaasi. Wa'm ukaasi yoo me ko me Anegisemee wai maa nuwa, epo nuwa, se-kao we-kao en'ndo otuma waya yipi mugo epipi semana ukaasi, Yesiusi me ko,” aseke. “Yesiusi wa'm waya ukaasi mina me ko me Anegisemee wa'm mike pi-pamiyaasi se mina da. Wa'm mina yaa-enei se bage waa ekii'm aii dodo enimea mina waa kui,” se aseke.

²² Kena Petadusi wa'm ekii kooda waya se asina ko “Musia wa'm eduga enimi mina ku kasiinka ndeo,” aseke. “Musia wa'm se enina ko ‘Anikee waa ekii'm one daasea mee to ona me me, me ni'm tata mugo nabi se mee to kiyaasi. Ese Ata Emi Tau se Anegisemee wa'm ni'm tata mugo se nabi kaaniisi koena. Kena ni'm tata mugo nabi mee to aoo kaakiyaana ko wa'm kasei taambi mina ku otuma dama yayito taae.

²³ Wa'm mina yeao beasea bage ku otuma wa'm ekii-nini yawenimana yapisime-mbeasiisi,’ se enimi. Musia wa'm se enimi,” aseke.

²⁴ “Musia wa'm aii dodo enimi mina, endo togea bea da kaa aoo kaasea se mina kuwa, ku wa'm ndo enimi mina se ku tau. Nabi bage ogu waa Seamueo mesema, kena kam ata tomea se nabi bage waa ku mesema, ekii'm enimea mina ku namba kui.

²⁵ Ku nabi bage ekii'm enimea mina ku endo togea bea da bage waa eki kaa eki tao mike pi-pamiyaagea se mina waa,” aseke. “Dee, eduga ko Anegisemee wa'm Abedaham mbo se enina ko ‘Anikee waa a'm wado one daasea mee to me kaa kiyoo kam mee tuma en'ndo otuma dama yakiyaasi,’ se enimi,” aseke.

²⁶ “Anegisemee wa'm ku mugo mina se enimi kumana wai wa'm gai-gai awanaa se mee to, Yesiusi me me, yapeyaami. Eki Yahudi bage mbo kiyoo kita yapeyaami. Eki'm peu-pau awanaa se ku eki'm wisin'taasea nde kena dama aya kadotaasi na Yesiusi eki mbo kita yapeyaami,” aseke. Petadusi wa'm se asimi.