Edaseo Bage 28 - Anegisemee'm Mina Kapuge

Paudusi wa'm Maota epogo maa kaa awami se mina da

¹ Enii otuma ii da kaa pakaaniina dama tomu se se dodo waa ko me epogo maa me kaa togea se bage waa ekii'm se nasina ko “Nakayoo epogo maa me ekaa da me ko Maota epogo maa to,” se nasigea.

² Se nasina ko kiyoo togea epoo bage kuwa ekii enii kaa ese dama se kao waa naawatakea. Me ko me ese odibi se gumba kumana, waya ese edii bake kumana epoo bage ekii enii tao bidea naayuwe-mbeaseke. Bidea naayuwe-mbeana ndo waa ko “Mewee! Bidea pasi kaa kiyoo odibi me egi see!” se nasigea.

³ Paudusi wa ko wai piya endi-pandi taawena bidea kaa tawita se. Bidea kaa tawitai ndoe ndani munii se dodo ndoe mbainaa ona mani memai. Mbainaa me ese iina mugo dodo. Me mbainaa me me Paudusi yaa kaa eo yadatai.

⁴ Eo yadatai se dena ko kiyoo epogo maa kaa togea bage kuwa ekii'm mina se amoe-moena ko “Yai, me dewee. Mee me me, me mee mbatumake mee to ae se nigeke. Wa'm woo-woo se kaa yimkaa maakaa uwo kaa peao kan sipi koya tau. Wa oona ata yau kaa memapi,” aseke. “Maakaa uwo kaa yapeyaan tau kumana mee'm woo-woo se kaa em dasi na ambii se anegisemee to wai wa'm awana ko Paudusi bosi na me mbainaa me yameyaana eo yadayaai,” aseke. Me mugo mina, mina amoe-moe nakea.

⁵ Ekii'm se aseke koya tau. Paudusi wa si boke. Aiyeke mbee kaa miya tau. Wa yaa da aii pisi-pisi andoe me mbainaa me bidea kaa endaanii.

⁶ Bidea kaa endaaniina ko yau-yau bage ku'm Paudusi dito se. Dito, dito sita mugo ndoe ekii'm nigina ko “Maa buboo aiyaambi ee? Ea na dembea ndoe maa nda mbato'en bota taambi ee?” se nigigea. Se nigeke kumana yadito nakea. Yadito semuuna ndo waa ko tau. Wa si boke. Mbeenaa aiyeke kaa miya tau se degea. Aii dama tai se degea ndoe ekii'm asina ko “Ai, ai. Ku kindo wai mee mbatumake mee to tau. Wai anegisemee mbato ae, se yanigeke,” aseke. Me epogo maa me kaa togea bage waa ekii'm se asigea.

⁷ Me epogo maa ebo dito se mee to wa ekaa da ko Pubadiusi. Pubadiusi wa'm okaa yoo enii'm ii da kaa pakaanipea yoo mbeenaa pasi. Kena wa'm “Ni'm ee nda mi-omiwee taae,” se naseke kumana wa'm ee kaa pi-omiwee nakea. Wa'm ee nda onu wido mugo omiwee sita mugo ndoe kabu tau. Wai ese dama naawake ndo.

⁸ Kena Pubadiusi wa'm naamee ko ese kee aoo kumana aii omeke ndo se omitai. Ese kee kaa ndani nde miya aoo. Baai-maai nde miya aoo. Kee ese ebo. Ku kindo ko Paudusi wai me naamee me'm omita se yoo me nda pi-ndemina Anegisemee mbo asetaake. Anegisemee mbo asetaana yaa dei ndoe kee nuwa, baa peke nuwa, ku otuma yadano kiyaapi. Se awami.

⁹ Paudusi wa'm se awamana ndo waa ko me epogo maa kaa togea bage ku kee aoo-aoo ku en'ndo otuma medona Paudusi mbo memagea. Paudusi mbo memana ko kee otuma yadano kiyaabuu se.

¹⁰ Ku kindo ko kiyoo togea bage ekii enii tao enii ekaa da ku ebo naakiyaasi na se kao ku nuwa, dama tosi na se kao ku nuwa, ku oba enii tao naawatakea. Kisena ndo waa ko ao wido omana wui ao me kaa ko uwo daii nda kuma da kaa pakiinka ae se ku dena ko enii odi waa maa kaa dama tosi na se-kao we-kao ku nuwa, enii odi waa maa kaa nosi na se-kao we-kao ku nuwa, ku en'ndo otuma enii tao aii se neke ndo. Epogo maa epoo bage ekii'm se naawamea.

Paudusi wai Edoma okaa yoo me kaa ukimami se mina da

¹¹ Kena me uwo daii nda kuma da me ko me Adekiseadediya okaa yoo kam memami se kuma da. Odibi se gumba me kaa me kuma da me me si penaa se. Aii Maota epogo maa kaa kiyoo ndo taa sipi. Me kuma me moo kaa kiyoo ebeabea da ona aoo. Me ebeabea da me ko “Gudao Yuwa Bubambaii Wiya” akaai kaa ebeabea da. Me kuma me kaa pakaaniina uwo daii wado peta se.

¹² Maota epogo maa kaa kam batana petaina ko Sidakusea okaa yoo me kaa pemake. Onu wido omana wui aoo gapi

¹³ waya se muuna Degium okaa yoo me kaa pemake. Omai tukuma daamee yagokumo yato me kaa kam bo puu aseke. Ku kumana kuma da nda uwo daii nda wado waya muuna penaa se. Petaina ko omai tukuma Pudiodi okaa yoo me kaa pemake.

¹⁴ Pudiodi okaa yoo me kaa pemana maa yoo endaaniina ndo waa ko Yesiusi kaa kinaa bage waa kiyoo aoo. Ku mesema ade semagea. Ku mesema ade semana “Enii mesema onu dada mugo naomiwee taae,” se naseke kumana ekii'm ee nda onu dada omeke. Onu dada omana Edoma okaa yoo peao kan maa moo muuna peke.

¹⁵ Me enda me nda peta se se dodo me kaa ko ogiyoo Edoma okaa yoo togea se Yesiusi kaa kinaa bage kuwa ekii enii kaa mina yeke. “Paudusi nuwa, wa mesema penaa nakea se bage ku nuwa, ekii Edoma okaa yoo megea ndeo,” se mina yeke. Ku mina yemana ko ekii enii mesema ade taao kan Edoma okaa yoo batana megea. Ku bage ku memana ebanaa ade se yoo Podum Apiusi okaa yoo me kaa ade semagea. Ebanaa ade se yoo Tedesi Tabedene okaa yoo me kaa ade semagea. Ku mesema ade semagea ndoe Paudusi dimina da nda ese yatakuniyaake kidai. Ku kaa wai Anegisemee mbo “Paamee,” se asetaake. Se awami.

¹⁶ Kena enii waya muuna Edoma okaa yoo me kaa pemake. Edoma okaa yoo me kaa pemana ndo waa ko Paudusi peniyada ee nda mbeasiin tau. Waya na kiyaa, ebo bage ekii'm asina ko “Paudusi wa ndo wa-nini ee nda ome o,” se aseke. Se asemana wa ndo wa-nini ee nda omiwee nai koya si oosi na tentada mee to ona wai Paudusi yadito nai.

Paudusi wai Edoma okaa yoo kiyoo Anegisemee'm mina tupita simi se mina da

¹⁷ Onu wiya omana wido aoo gapi me kaa ko Paudusi wai mina doyaake. Wa'm doyaake mina me ko me se de. “Yahudi bage'm ebo bage waa woe. Eki ni mbo andagatawee,” se mina doyaake. Se mina doyaana ko ku ebo bage kuwa ekii Paudusi mbo mi-andagatagea. Mi-andagatana ko Paudusi wa'm ekii se asina ko “Nikinaa bage waa woe. Ni ko ni Yahudi bage ekii kaa peu-pau awaan tau. Enii'm eedoo bage'm sese ona kaa miya tamaan tau. Ku se ku awaan tau koya tau. Ogiyoo Yedusedem okaa yoo aoo se dodo me kaa kiyoo ekii yaa nayapamitana Edoma bage'm yaa da kaa pi-nambeasimea,” aseke.

¹⁸ “Pi-nambeana ko Edoma bage ekii ni'm peu-pau awapa ku diimbea yee naa se mina oba na-amba-de semuu simea koya aii bada ndo. Peu-pau awaa yako nambatumaao sekii se mina ona kaa miya diin tau koena. Kum seta kaa Edoma bage ekii'm naekatana napeyaao gai koya aii bada ndo.

¹⁹ Ogiyoo Yahudi bage ekii'm ‘Tau de! Ku tau de!’ se asimea koena. Ekii'm se aseke se dodo me kaa ko ni'm nigina ko ‘Aa-oo, aii bada kaamba ae,’ se nigima. Ni'm se nigimaa yako ‘Ni'm awama ku naandamaasi na Kaiseda mbo napeyaae,’ se asima. Ku kindo ko ni'm nakayoo ukipa me ko me ni'm bage, Yahudi bage kuwa ekii'm naawamea mina ku kaa ndamaao kan ukipa se ku tau. Ni'm awama mina ku kaa ndo naandamaasi na ukipa,” se aseke.

²⁰ “Endo ko ni ndumbo mina kasiinka ndeo. Omiyaa siyaa ku ndo Isedeo bage'm eki'm se nigina ko ‘Keditusi wai kase dodo ukaambi naa ya?’ se nigiwoo nakea. Ekii'm se nigiwoo nakea koya ‘Tau! Wai ukimi ae,’ se nigeo. Ni'm se nigeke kumana ese me dimina me kaa kiyoo ndo ni yaa da ku besi one nabamitapea sima,” aseke. “Ku mina ku kaseao kan ‘Ni mbo mewee,’ se kasipa,” aseke.

²¹ Ku mina ku yemana ko ekii'm Paudusi se asina ko “Ogiyoo Yudea maa kaa togea bage ko ekii a kaa mina kapuge naadoyaan tau,” aseke. “Kena kiyoo kam ukipea se Yahudi bage ku nde miya a kaa peu se mina naaduwaan tau. Ku mugo mina enii ona kaa miya yiin tau,” aseke.

²² “A kaa mina ku nasiin tau koya wa-nini mina yemea,” aseke. “Enii'm yena ko maa en'ndo otuma mee en'ndo otuma ekii Yesiusi kaa ‘Mike ae,’ se nigeke mbaya bage waa ku kaa wisineke aoo, se mina yemea,” aseke. “Ku mina ku yemea koya a'm nigeke kase? A'm Yesiusi kaa mike ae se nigeke mbaya bage waa ku kaa nigeke mina ku enii yeao gai,” se aseke.

²³ Se asemana ko ekii, Paudusi mesema waya mina amoe-moe taao kan mbutu da manitake. Kisena ndo waa ko mbutu manipea se gapi pi-pamii se dodo me kaa ko ekii ese oba mugo medona Paudusi wa'm omita se ee me nda mi-ndemina andagatagea. Andagatana ko ese daamee tukuma da kam ata kisee daasiba kam miyo, epopi nda kuwa Paudusi wai mina tupita se. Mina tupitaina ko wa'm tupeke mina ona me ko Anegisemee wai mee tuma wado ese ata emi tau ebo bage keke se mina ku kaa tupita se, me ona. Kena ona me ko Musia'm okaa mee tupisi na mina kapuge ku kaa mina ku nuwa, Yahawee'm mina yaa-enei simea bage'm kapuge waa ku kaa mina ku nuwa, ku mugo mina tupita se, me ona. Ekii Yesiusi kaa “Mike ae,” se nigisi na ku mugo mina tupita nai.

²⁴ Ku mugo mina yatupitai se dodo me kaa ko ebanaa bage ku “Mike ae,” se nigeke. Ebanaa bage ekii “Mbeduwa,” se nigeke.

²⁵ Ebanaa “Mike,” ebanaa “Mbeduwa,” ebanaa “Mike,” ebanaa “Mbeduwa,” se mina a-mbemoo naa-mbemoo nakea. Ku kaa a-mbemoo naa-mbemoo nakea se dodo waa ko Paudusi wa'm ese takanu mina se asina ko “Ese eduga ko Anegisemee Dim'mba wai eki'm eedoo bage mbo aseao kan simi mina kuwa ku nabi se mee to, Yesiaya me me, wa mbo mina yanige-manemi. Ese ndumbo se mina kuwa. Anegisemee Dim'mba wa'm Yesiaya mbo yanige-manemi mina ku ko ku se de.

²⁶ “ ‘Ku bage ku mbo pemana ni'm mina naseae. Mina se nasina ko, Eki ni'm mina yeke ko yiimbea koya si nige-neke ndo se takea, Deke ko diimbea koya si masimake ndo se takea.

²⁷ Ku bage kuwa ekii'm dimina mbiseoo nde miya aoo, ekii'm opa waa ku damu miya aoo, ekii'm emaa misi waa ku simbaaneke miya aoo. Ku emi tau waa, se waa ko ekii'm emaa misi namba deao sekii kiyaa, kena ekii'm opa namba wadaniyaa, waya ekii'm dimina da nda namba masimana woo-woo se ku wisin'tayaa. Se awake waa, se waa ko ekii'm si maaneke ku otuma ni'm ekii tao yadano kiyaana dama yatoyaayaa,’ ” aseke. “Yesiaya wai Anegisemee Dim'mba'm mina se yaa-enimi,” aseke.

²⁸ “Anegisemee Dim'mba wa'm enimi mina ku ese ndumbo se mina waa. Enii'm bage ekii Anegisemee wa'm mee'm woo-woo se kaa em si yadan ndo aii omiwoo towoo toyaasi na mina da beagea. Me beagea yako me mina me Yahudi tau se bage waa ekii mbo yadoyaapi. Ku mbo yadoyaapi kumana ekii ‘Mike ae,’ se nigaambea sima,” aseke. “Ku ndo kaseao kan sipa,” aseke. [[

²⁹ Se asemana ko Yahudi bage ekii peke. Peta mugo ndoe, Paudusi'm enipi mina ku kaa mina a-mbemoo naa-mbemoo nakea. Se awamea.]]

³⁰ Paudusi wa ko wai me ee me nda omita taao kan epomee mbo uwani maneke. Uwani manina daamee endii pakei wiya om'pi kuwa kiyoo ndo omitai. Kiyoo ndo omita tuta se dodo ndoe wa mesema ade taao kan wa mbo memagea se bage waa ku oba aoo. Kena Paudusi wa ku bage ku ekii otuma se asina ko “Aba, aba. Ni mbo me o. Enii ndepo tomuta nde,” se aseke.

³¹ Se asemana mina tupita se. Wa'm tupeke mina ona me ko me Anegisemee wa'm mee tuma da bage wado ese ata emi tau ebo toke se mina me kaa namba tupita simi, me ona. Ona me ko Tuhani Yesiusi Keditusi wa kaa mina namba tupita simi, me ona. Ku se ku tupita sita mugo ndoe, dimina mbugu kaa miya emi tau. Ese si widaana ndo ndumbo ndo tupita siwoo simi. Kena “Ku mina ku si aseae,” se aseke bage waa ona kaa miya emi tau. Ku kumana aii tupiwoo nai. Paudusi wa'm se awawoo simi. Ni, Dukasi, ni'm mina se naa aoo.