Edaseo Bage 20 - Anegisemee'm Mina Kapuge

Paudusi wa'm Makedoniya maa kaa nuwa, Akaya maa kaa nuwa, kiyoo penaa simi se mina da

¹ Epesiusi bage ekii'm yima kiki kan yai-yai se ku dano se dodo waa ko Paudusi wa'm asina ko “Yesiusi mina yaa mu-mu nakea se bage waa ekii ni mbo mesi ndeo,” se mina doyaake. Se mina doyaana wa mbo andagatagea se dodo waa ko ekii'm dimina da waa yatakuniyaao kan mina enei se. Ekii'm dimina yatakuniyaana ndo waa ko “Endo ni peen ndeo,” se aseke. Se asemana Makedoniya maa kaa peao kan pei.

² Makedoniya maa kaa penaa sita mugo ndoe aii se penaa se se ku tau. Yesiusi mbaya bage mbo dimina yatakuniyaake mina asinaa penaa semuuna Akaya maa kaa pemake.

³ Akaya maa kaa pemana ko me kaa ao wido omeke. Ao wido omana ko Sidiya maa kaa peao kan uwo daii nda kuma da kaa pakaaniinki ae se dodo ndoe, mina ona se yena ko “Yahudi bage'm kambatumaambea,” se mina yeke. Se mina yemapi kumana uwo daii nda kuma da kaa si pakaaneke. Aii maa moo mi-ndagidi medona Makedoniya maa me nda midoseomeke.

⁴ Paudusi mesema penaa se bage waa ku dada aoo. Ona me ko Bedea bage. Pidusi yombai me me. Wa ekaa da ko Siopateda, Kena Teseadonika bage wiya aoo. Ona me ekaa da ko Adisitadakusi. Ona me ekaa da ko Sekundusi. Kena Dedebe bage ona me ekaa da ko Gayusi. Kena Asiya bage wiya. Ona me ekaa da ko Tikikusi. Ona me ekaa da ko Todopimusi. Kena Timotiusi wa namba Paudusi mesema penaa se. Ku dada kuwa Paudusi mesema penaa se.

⁵ Ku dada kuwa ekii kita Todoas okaa yoo me kaa pemake. Me kaa pemana ko enii'm wadobo ukaasea yoo nadito taao kan kiyoo ndo tomu se.

⁶ Kiyoo nadito se se dodo me kaa ko enii ko enii ogiyoo Pidipi okaa yoo me kaa Kade-Pade se Edoondi Badii noke. Me badii me notana uwo daii nda kuma da kaa pakaaneke. Uwo daii nda kuma da kaa pakaaniina ko Pidipi okaa yoo batana peke. Peta, peta muuna ko onu wui omana edibi aoo gapi Todoas okaa yoo, nadito nakea bage ku mbo pemake. Kiyoo pemana ndo waa ko me okaa yoo me kaa onu dada omeke.

Todoas okaa yoo kiyoo Eutakusi bomana yatoyaami se mina da

⁷ Todoas okaa yoo me kaa omiweena Hadi Seab'tu gapi ndeeneopi se dodo me kaa ko enii Yesiusi mbaya bage mesema andagatake. Aii se andagatake se ku tau. Edoondi biseao kan andagatake. Andagatana ko Paudusi wa'm mina enii mbo enei se. Anikee peesi kumana mina enei, enei, enei, kisee ndee me epopi.

⁸ Ndee me epopi se dodo me kaa ko enii'm andagatapea yoo asindaa dukune me nda ese osee wake oba aoo.

⁹ Kena eginao se mee to ona aoo. Wa ekaa da ko Eutakusi. Eutakusi me me, me edaya ebe kaa tomu se. Edaya ebe kaa tomu nai se dodo ndoe onu tomu kidai. Paudusi wa'm mina yito, yito, yito ndoe on'tuka endeke. On'tuka endina ko diba onu omii. Diba onu omita mugo ndoe, kiyoo kam amaa tapato nda odipameke. Bea wido kuwa miyo damana odipamepi. Enii ko wa mbo endemana yaataagea se dembea ndoe, “Tau, mike bota, ae,” se nigeke.

¹⁰ Paudusi wa ko wai mee bota da mbo endemana wa kaa omeke. Wa kaa omii ndoe yaa pademuu se. Yaa pademuuna ndoe, “Tau de! Si widaae!” se naseke. “Iyaao tai de!” se naseke.

¹¹ Se nasemana Paudusi, wai enii mesema pakedona asindaa dukune kaa waya pakeke. Waya pakemana edoondi biseke. Noke kao noke. Ku semana ndo waa ko Paudusi wai enii mbo waya mina enei se. Mina en'ta, en'taina ko aumai se dodo me kaa ko Paudusi wai kiyoo kam batana peke.

¹² Peke se dodo me kaa ko ekii me eginao mee me me bada madona ogiyoo ee kaa pi-mbeaseke. Iyaao tai ku kaa ekii otuma ese dimina etaa ndo se takea. Se.

Todoas okaa yoo kam Midetusi okaa yoo me kaa pemamea se mina da

¹³ Ku semana ndo waa ko enii peke. Aseosi okaa yoo peao gai koya Paudusi wa ndo maa moo peke. Enii ko enii-nini uwo daii nda kuma da kaa pakaaniina peke. Paudusi wa'm “Ogiyoo Aseosi okaa me kaa waya ade taao nde,” se nasipi kumana enii'm se awake.

¹⁴ Se awamana Aseosi okaa yoo me kaa ukimana ndo waa ko Paudusi mesema waya ade se. Ade semana enii'm penaa sipea kuma da kaa wa namba pakaaniina tomu se. Enii mesema tomuna waya mu, mu, muuna Metidene okaa yoo me kaa pemake.

¹⁵ Omai tukuma uwo daii nda kuma da kaa nadona kisee Kiosi epogo maa pasi kaa pemake. Omai tukuma waya muuna ko uwo ata yau kaa Seamosi epogo maa me kaa pemake. Kena gapi waya muuna ko Midetusi okaa yoo me kaa pemake. Se awamea.

¹⁶ Paudusi wa ko wai Yedusedem okaa yoo me kaa Pentakoseta badii nao gai kumana Epesiusi okaa yoo endaaneke be. Wa'm nigina ko “Kiyoo endaaneke waa Asiya maa kaa oba omiweena Yedusedem okaa yoo mani si ukiyaa ae,” se nigeke. Se nigeke kumana yau nda tasinina Midetusi okaa yoo me kaa pemake.

Paudusi wa'm Epesiusi okaa yoo togea se penatuwa bage mesema mina enei simi se mina da

¹⁷ Midetusi okaa yoo me kaa pemana ko Paudusi wai ogiyoo Epesiusi okaa yoo me kaa mina doyaake. Wa'm mina se doyaana ko “Yesiusi mbaya bage'm ebo dito se se bage waa woe, ni mbo mewee,” se mina yadoyaake.

¹⁸ Se mina yadoyaana ndo waa ko ku ebo dito se se penatuwa bage kuwa ku wa mbo memagea. Wa mbo memana ko Paudusi wa'm se asina ko “Penatuwa bage waa woe. Ni'm sese ko eki naepi. Dee, ese edugana ko Asiya maa kaa ukima gapi kam wado ni eki mesema towee sima se dodo me kaa ko ni'm awama-awama ku otuma eki nademea,” aseke.

¹⁹ “Ekii'm nadena ko Yahudi bage ekii nambatumaao kan mina, ku kaa mina data simea. Ku kumana ku kaa ni dimi bodi aoo ndo se towoo sima ku namba nademea,” aseke. “Ku dimina dano-dano siyaake kao ku aoo koya yee semuu ndoe ese tunaa se dimi me'm ndo Tuhani wa kaa wa tao masii yaamasiwoo sima ndo, se nademea. Tau se,” aseke.

²⁰ “Kena Anegisemee'm mina kasei se se dodo me kaa ko dama tosi na mina waa ku kaseao kan sipa ku kaa dimi wiya kaa miya emi tau. Ku otuma kasei sima ndo. Ni'm sese ku eki se nademea,” aseke. “Uwa da kaa nde miya katupiwoo sima. Ekii'm ee waa ku nda nde miya katupinaa sima. Ee ona nda ndemina tupeke. Ee ona nda ndemina tupeke. Ee ona nda ndemina tupeke. Se awanaa sima. Tau se,” aseke.

²¹ “Se awanaa naka se dodo ndoe, Yahudi bage mbo nuwa, Yunani bage mbo nuwa, ku mbo ni'm se tupina ko ‘Eki'm woo-woo se ku duwa mantana Anegisemee mbaya ndo emba mataae. Tuhani Yesiusi wa kaa “Mike ae,” se dimi ku ndo nigaae,’ se tupiwoo sima. Ku nde miya nademea,” aseke. Paudusi wa'm se aseke.

²² Kena wa'm waya se asina ko “Endo ko Anegisemee Dim'mba wai ni'm dimina da nda ese oyu se natupina ko ‘A Yedusedem okaa yoo peae,’ se natupiwoo nai kumana ko kiyoo peemba,” aseke. “Me kaa pemana ko kiyoo togea bage ekii'm naawaasea mina ku ni eo koya tau. Kiyoo peemba,” aseke.

²³ “Anegisemee Dim'mba wa'm se nanige-maneke mina ku ndo kasiinka ndeo. Ni'm penaa sipa okaa yoo en'ndo otuma Anegisemee Dim'mba wa'm se nanige-mane siwoona ko ‘Yedusedem okaa yoo pemana ndo waa ko yaa nayapamitana peniyada ee nda nadomaasea nde miya aoo. Ese bodi, dim'mba tau se kao ku namba naawaasea ku nde miya aoo.’ Anegisemee Dim'mba se nanige-mane siwoo sipi,” aseke.

²⁴ “Se nanige-manepi koya ‘Tau, bada o,’ se nigeo. Toke nde miya, boke nde miya ku mbeedi. Tuhani Yesiusi wa'm nemi ndanda kuwa ku ndo yaa-awataina otou wandetake kindo me ese ebo. Wa'm nemi ndanda me ko me Anegisemee'm dama se mina, wa'm mee tuma kaa aii se gane kan dama natoyaake mina kuwa ku mee mbo donaa asinaa sisi na se ndanda. Me ndo wa'm ebo se ndanda nemi ae se nigeo. Wa'm nambeasipi ndanda ku ndo otou wandetaao gai sima,” se aseke. Paudusi wa'm se asimi.

²⁵ Se asemana waya penatuwa bage mbo se asina ko “Anegisemee wa'm mee wado ese ata emi tau ebo toke se mina ku donaa asinaa sipa. Ku mina ku yemapea bage waa woe, endo kam wado waya si nadiimbea ae se nigeo.

^26-27 Ni'm se nigimaa yako endo gapi ese ndumbo mina kasiinka ndeo. Anegisemee wa'm gai-gai awasi na se mina ku otuma kaseao kan dimi wiya tau kima. Mbeenaa yaamoo se kaa miya emi tau kima. Otuma kanige-manema sima. Ku kindo ko wa naa bona bidea uwo ndoiba ndemeke kipii kindo ko ni'm peu-pau yaawaa yako bidea uwo ndoiba ndemeke se ku tau. Me wa'm ndo ni'm mina kaa nabeapi kumana ku kaa bidea uwo ndoiba ndem'pi sima,” aseke.

²⁸ “Endo ko penatuwa bage waa woe. Eki kaa to nuwa, eki'm yaa da kaa dito nakea se Yesiusi mbaya bage ku nuwa, ku dama dito taae. Kase enta mugo ndoe Anegisemee Dim'mba wai ku bage ku wado ebo dito se se bage waa se kambeasipi koena. Eki'm dito nakea se Yesiusi mbaya bage kuwa ku Yesiusi wa'm emu yaa-ogayaana tabemapi se bage waa. Ku kindo ko ekii Anegisemee wa'm dom'mba egina mugo dodo se bage waa. Eki ko wa'm dom'mba egina maneke bage mugo dodo nde. Ku kumana ku bage kuwa dama dito taae,” aseke.

²⁹ “Dee, ni nakayoo kam pemana dai kaa waa ko eki mbo ukaasea bage ku ko ese dimi peu se bage ukaasea. Dimi peu se bage kuwa ekii'm sese ko ese dimi peu se mbaa kamino'm sese mugo dodo. Anegisemee'm dom'mba egina mugo se bage waa, Yesiusi mbaya bage ku si maaniyaasea koena,” aseke.

³⁰ “Eki mbaya bage ko eki ebanaa ku nde miya dimina peu se bage kaasea. Ku aoo kaasea kuwa ese mee kadeba taasea se bage waa. Ekii'm mina yito se bage ku oba kisi na dim dake mina katupaasea se bage waa.

³¹ Ku se ku aoo kaasea kumana dama dito taae,” aseke. “Dee, Anegisemee'm mina katupeke se dodo me kaa ko ese daamee endii pakei wido om'pa kuwa omiyaa siyaa ku ndo apikaa nde miya, ndeemaa nde miya, ese si dan ndo se katupiwoo sima. Katupiwoo sita mugo ndoe, eki kagane kan yee se nde miya ese aoo. Ku kindo ko ni'm katupima mina ku kaa ndo dama nigi si pe taae,” se aseke. Paudusi wai ku penatuwa bage waa ekii mbo se aseke.

³² Kena wa'm waya se asina ko “Endo ko ni peke kumana Anegisemee yaa da kaa kambeaseo. Anegisemee nuwa, wa'm mee tuma kaa aii se gane kan dama toyaasi na mina ku nuwa, ku eki'm dimina da nda katakuniyaabuu taao sekii. Ku katakuniyaana ndo waa ko anikee waa nde miya Anegisemee'm wa-nini wenimana daa mbeasipi bage waa mesema omiwoo towoo katoyaake sekii. Ku kumana ku kaawasi na Anegisemee yaa da kaa nuwa, wa'm mina kaa nuwa, ku kaa kambeaseo,” se aseke.

³³ “Eduga ko ni eki mesema toke se dodo me kaa ko ekii'm kao ku ona kaa miya dimeowaan tau. Eki'm pedaki oma nuwa, eamasi oma nuwa, manaa se kao nuwa, ku kao ku ese ona kaa miya dimeowaan tau,” se aseke.

³⁴ “Ni nuwa, ni mesema penaa se bage nuwa, enii'm ‘Oowoo,’ se kao maseao kan ni yaa'm masina kao ku ndo maseke. Se awawoo sima,” aseke. “Ni'm awawoo sima kuwa ku eki namba nademea,” aseke.

³⁵ “Eki ni'm awama-awama ku en'ndo otuma se nadito sita mugo ndoe, ku kaa katupaao kan sima mina waa ku se de. ‘Maboo se bage ku dama tosi na ekii tao oyu se masii yaamaseae,’ se katupima. Ni'm sese nadegea se gumba ndoe, ‘Eki miya se awaae,’ se katupima,” aseke. “Tuhani Yesiusi wa'm enimi mina ku nde miya si andibuu taae. Eduga wa'm se enina ko ‘Mee'm kao neke se dodo me kaa bani-bani se aoo ko aoo koya mbeenaa mbeedi. Enii'm kao ku mee agumee tao maneke se dodo me kaa ese ebo se bani-bani se aoo,’ se enimi. Ku kumana wa'm enimi mina ku si andibuu semana ndo ogu bage tao dama yatoyaabuu taae, se kaseao kan sima,” aseke. Paudusi wa'm Epesiusi okaa yoo tomea se penatuwa bage waa se asimi.

³⁶ Se asemana ko ekii otuma Paudusi mesema kau ku maa nda wemana Anegisemee mbo asetaake.

³⁷ Anegisemee mbo asetaana ko ekii otuma ese yee se aoo. Yee semuu ndoe Paudusi yaa pademuu, ebe dudu semuu se.

³⁸ Dee, Paudusi wa'm “Endo kam wado waya si nadiimbea,” se asipi kumana ku kaa ese dimi bodi aoo. Dim bodi aoo se dodo me kaa wa mesema pedona uwo daii nda kuma da kaa pi-yambeaseke. Ekii'm se awamea.