Edaseo Bage 16 - Anegisemee'm Mina Kapuge

Paudusi mesema Sidasi akaai Timotiusi mesema penaa simea se mina da

¹ Paudusi mesema Sidasi akaai pedona Dedebe okaa yoo pemake. Kena Dedebe okaa yoo kam pedona Diseda okaa yoo pemake. Diseda okaa yoo pemana ko kiyoo Yesiusi'm mina yaa mu-mu se mee to ona aoo. Mee ona me wa ekaa da ko Timotiusi. Timotiusi wa'm naamee ko Yunani mee to koya wayoi ko Yahudi ambii to. Wayoi me ko wai Yesiusi'm mina kaa “Mike ae,” se nigeke se ambii to.

² Kena Yesiusi kaa kinaa bage ko Diseda okaa yoo togea bage ku nuwa, Ikonium okaa yoo togea bage ku nuwa, ekii otuma Timotiusi wa kaa se asina ko “Wai dimi dama se mee to,” se yaasigea.

³ Kam waa ko Paudusi wa'm se nigina ko “Ni'm penaa taamba maa ku Timotiusi mesema penaa taambea kindo ni gai ae,” se nigeke. Se nigimana “Timotiusi woe, paita endii da da-mbeaseke bada. A'm naamee Yunani mee to ku yau-yau maa kaa togea se Yahudi bage en'ndo otuma yemea nde. Yahudi bage ekii namba a'm mina yeao gai kisi na paita endii da da-mbeaseke bada,” aseke. Se asemana paita endii da da-mbeaseke.

⁴ Se awamana ndo waa ko ekii peke. Penaa, penaa, penaa sita mugo ndoe, okaa yoo oba mugo ku nda mina eninaa penaa, eninaa penaa se awake. Ekii'm eninaa nakea mina ku ko ku aii mina se ku tau. Eduga Yesiusi kaa peyaami se bage nuwa, penatuwa bage nuwa, ekii'm Yedusedem okaa yoo me kaa moo tukitamea mina kuwa, ku eninaa nakea. Ekii'm moo tukitamea mina ku dama yito sisi na eninaa penaa nakea.

⁵ Akaa'm se awanaa se kumana Yesiusi mbaya bage ekii'm Yesiusi kaa “Mike ae,” se nigeke dimina da waa ku ese oyu, magi tau se dimina ndo se kiyaamea. Kena omiyaa siyaa ku ndo ekii mbaya bage ku ese oba kiwoo, agi kiwoo semuu simea.

Yunani maa kaa tomea bage ekii namba Yesiusi mbaya bage kimea 16:6–19:20 Paudusi wa'm iya-iya da kaa Makedoniya mee to demi se mina da

⁶ Paudusi nuwa, wa mesema penaa se bage ku nuwa, ku penaa se. Penaa se se dodo ndoya Asiya maa kaa Anegisemee mina tupaao gai koya tau. Anegisemee Dim'mba'm “Tau. Kiyoo si peae,” se yakumamapi kumana Asiya maa me kaa si peke. Si pena ndo Pedigiya maa nuwa, Gadasiya maa nuwa, kiyoo ndo penaa se.

⁷ Mu, mu, muuna ko Misiya maa bide da kaa ukimake. Ukimana ko Bitiniya maa kaa peenkea ae se dodo ndoe, tau. Yesiusi'm Dim'mba wa'm “Tau, kiyoo si peae,” se yakumamapi kumana

⁸ Misiya maa yau nda tasinana Todoas okaa yoo me kaa endemake.

⁹ Todoas okaa yoo me kaa endemana daasiba se dodo me kaa Paudusi wai iya-iya da kaa deke. Iya-iya da kaa se dena ko Makedoniya mee to ona dei. Me dei se dodo me kaa ko Makedoniya mee to wa'm inewena se asina ko “Eki Makedoniya maa kaa nakayoo mewee! Enii dama natoyaasi nde, nakayoo mewee!” se asi. Paudusi wa iya-iya kaa se demi.

¹⁰ Paudusi wa'm iya-iya kaa se demana ko enii'm nigina ko “Ai, ai, Anegisemee wai kiyoo napeyaao kan mina nawoepi ae,” se nigeke. “Anegisemee'm dama se mina ku ogiyoo Makedoniya bage mbo pi-eniwoo sisi na Anegisemee wai mina nawoepi ae,” se nigeke. Se nigimai ndoe Makedoniya maa kaa peao kan pegea.

Pidipi okaa yoo kiyoo ambii ona Didiya me me, wai Yesiusi kaa “Mike ae,” se nigimi se mina da

¹¹ Todoas okaa yoo kam batana pegea se dodo ndoe uu daii nda kuma da kaa pakaaneke. Uu daii nda kuma da kaa pakaaniina maakaa uwo daii da nda ndumbo ndo pegea. Ndumbo ndo penaina Seamotadake maa me kaa pemake. Omai tukuma waya uwo daii nda mu, mu, muuna Makedoniya maa kaa pemata mugo ndoe, Neapodisi okaa yoo me kaa pemake.

¹² Kiyoo pemana maa yoo endaaneke. Maa yoo endaaniina waya muuna ko Pidipi okaa yoo me kaa pemake. Pidipi okaa yoo me ko me Makedoniya maa me kaa Edoma bage'm ese ata emi tau ebo se kota okaa yoo. Me Pidipi okaa yoo me kaa pemana kiyoo mbeenaa omiwee se.

¹³ Ea na gapi, Yahudi bage'm daa se gapi togea se dodo me kaa ko enii'm nigina ko “Ekii'm Anegisemee asetaao kan andagatake yoo me okaa yoo yau kaa kiyoo aoo ae,” se nigeke. Se nigimake kumana okaa yoo yau-yau eda gine kaa pi-ndemina yau kaa peaneke. Eda gine yau kaa peanina uu de kaa pemake. Uu de kaa pemana ambii waa kiyoo andagatapea ae se dena ko kiyoo animana tomu se. Tomu se se dodo ndoe ku ambii ku mbo mina enei se.

¹⁴ Mina enei nakea se dodo me kaa ko enii'm mina yito nai se ambii ona me ekaa da ko Didiya. Me Didiya me me, me Tiatida okaa yoo ambii to. Wai uwani manisi na kaini dopeana mee mbo pi-manaa se se ambii to. Ku kaini ku uuwou epoo da aoo se kaini ku kaa uwani awita se se ambii to. Kena me Didiya me me, me ese Anegisemee yapapa se se ambii to. Kena wai Paudusi'm mina yito se se dodo ndoe, Tuhani wa'm dimina nda yakumake kumana ese “Mike ae,” se nigii.

¹⁵ “Mike ae,” se nigimana wa nuwa, wa'm ee nda togea bage waa ku nuwa, ku enii'm uwo ndoiba yatakumewee se. Uwo ndoiba yatakumeweena ko Didiya wa'm nasina ko “Ni'm dimina eki epi. Ni Tuhani kaa dimina ona ndo kan ‘Mike ae,’ yanigipa ae se nanigeke kumana ni'm ee nda mi-omiwee taae,” se aseke. “Mi-omiwee taae, mi-omiwee taae,” oba se naseke kumana enii wa'm ee kaa pi-omiwee se. Se awamea.

Paudusi mesema Sidasi peniyada ee nda yadomaamea se mina da

¹⁶ Me okaa yoo me kaa kiyoo mbaa epuyiba aoo se pane to ona aoo. Me pane me me, me yaa pineana masii mata se se pane to. Kena wa epuyiba mbaa aoo kumana mee'm anikee waa awaasea mina ku awaan tau yoo yanige-maneke sekii. Ku kindo ko aii bage waa ekii'm anikee waa aoo kaasi mina ku yeao gai kipii kindo ko me pane me me wa'm yaa yapineasipea bage ku mbo uwani maneke. Uwani manina ko me pane me me anikee waa aoo kaasi mina ku yanige-maneke. Anikee waa aoo kaasi mina ku oba yanige-mane se kumana me pane me'm yaa yapineasipea bage ekii uwani oba awewoo semuu nakea. Se. Ea ena gapi enii ko enii Anegisemee asetaao kan andagatake yoo pegea se dodo ndoe me pane me me maa kaa ade se.

¹⁷ Maa kaa ade semana ndo waa ko wai Paudusi enii mesema ogudi mitai. Enii ogudi mitai se dembea ndoe wai mina ebo mbeana enii kaa mina naa-eniwoo nai. Wa'm naa-eniwoo nai se mina me ko me se de. “Ku bage kuwa ekii Ese Me kaa Ama Emi Tau se Anegisemee wa tao masii yaamanaa se bage waa. Ekii'm tupeke mina me ko me mee si bona ndo Anegisemee mesema omiwoo towoo sisi na se mina katupaao kan ukipea se bage deo,” se aseke. Me mugo mina eniwoo nai.

¹⁸ Me mugo mina naaeniwoo nai se dodo me kaa ko mani dano tau. Aii omiyaa siyaa ku ndo se eniwoo, eniwoo, eniwoo semuu nai. Kisena ndo waa ko Paudusi wa ese dindi ae se nigimai yako wa'm peta sipi yato duwa matana mbaa aoo se pane me mbaya emba make. Me mbaya emba matana me pane me epuyiba mbaa me se asina ko “Ni Yesiusi Keditusi ekaa da kaa se kasina ko me pane me nduwawe bataae! Aii yoo peanee!” se aseke. Se asemai ndoya kuhai-kuhai me mbaa me me, me pane nduwawe kam batana aii yoo peanipi.

¹⁹ Me mbaa me aii yoo peanipi ae se dena ko me pane me'm yaa yapineasipea bage waa ekii'm uwani aweke se kao ese mike si yamaaniyaapi ae se nigimagea yako yima kiki kidai. Ese yima kiki kigea yako Paudusi mesema Sidasi akaa yapamitake. Akaai yapamitana yaa wedona pena ko kota okaa yoo togea bage ekii'm andagata se yoo me kaa pi-mbeaseke. Me kaa pi-mbeana ko kota okaa yoo dito se ebo bage mesema mina dasi na me yoo da kaa pi-mbeaseke.

²⁰ Kota okaa yoo dito se ebo bage ekii'm egi kaa yaa wedona pi-mbeana ko ekii'm ebo bage se asina ko “Ku bage kuwa akaai Yahudi bage. Akaa'm tupina mina ku kaa kiyoo kam enii'm okaa yoo me ese widigi natoyaapea. Ese yai-yai nakiyaapea, akaai.

²¹ Dee, akaa'm ‘Se awaae. Se awaae,’ se tupina mina kuwa ku enii Edoma bage'm ese yeao daa se mina waa. Yito se ku nde miya, awake nde miya, ku Edoma bage enii'm daa tamake kao waa,” se aseke.

²² Me pane me epoo bage waa ekii'm se asemana yau-yau mee kooda waa ku mina ku yemana ekii namba ekii mbaya anewegea. Ku mbaya anewena ndo waa ko ekii namba Paudusi mesema Sidasi akaai kaa yima kiki kan yawisinigea. Yawisinigea se dodo ndoe me okaa yoo dito se se ebo bage waa ekii'm asina ko “Akaa'm manaa se kao ambuu bea-mawee. Ku bea-mamana kupaa pomiwee!” se aseke.

²³ Se asemana kupaa pomita, pomita, pomana ndo waa ko yaa wedona peniyada ee nda pi-mbeaseke. Peniyada ee nda pi-mbeana ko ekii peniyada ee dito se mee to se asina ko “Ese dama yadito taae, owaambea nde,” se aseke.

²⁴ Ku mina ku yemana ko peniyada ee dito se mee to wa'm akaai bada madona ese epuyiba epopi nda dukune me nda pi-yambeaseke. Me nda pi-yambeana ko akaa'm bado kaa wado piya mesema, miyo piya mesema, ndage-yamake.

²⁵ Se ndage-yamana tomuna ko ndee yato epopi se dodo me kaa Paudusi mesema Sidasi akaai Anegisemee mbo asetaake. Kena Anegisemee yapapataao kan euu mina ku namba en'takea. Anegisemee asetoo, euu mina en'ta, se dodo me kaa ko akaa mbo yau-yau peniyada ee nda mbembo sipea bage ku namba akaa'm mina yito nakea.

²⁶ Ku yito sita mugo ndoe kuhai-kuhai ese em'mbee maapui mei. Yai, ebo! Ese em'mbee maapui kumana peniyada ee tukuu mbembo sipea yoo ku beba siyaake, yai! Ese beba siyaai se dodo ndoe, peniyada ee gine ku otuma wadita-pata. Waya esimba mbembo sipea bage waa ekii'm epetapea besi one waa ku otuma ogitapea.

²⁷ Ogitapea se dodo me kaa ko peniyada ee dito se mee to anoweke. Anowena ko peniyada ee gine waa ku wadita-pata se dena ko “Yai, peniyada ee nda mbembo sipea bage ku otuma oopea ae,” se nigeke. “Ni'm dito se bage waa ku otuma oopea kumana ebo bage'm nambatumaambea ndeo,” se nigeke. Ku kaa widaa kan wa kaa to mbatumaao kan wa'm yado maseweke. Masewena mbeenaa aoo kumana waa ko wa kaa to nuge taanki ae se dodo me kaa ko

²⁸ Paudusi wai mina ebo se woena ko “Ku tau de! Enii otuma nakayoo nde! A kaa to si boyaae!” se aseke.

²⁹ Se asemana ko peniyada ee dito se mee to wai wa'm guna miyo bage se asina ko “Osee naaduwaae!” se aseke. Osee yaadona aii oika pena ogindaa Paudusi, Sidasi akaa mbo pemake. Akaa mbo pemai ndoe ese amaa gapemana maa yoo endaaneke. Maa yoo endaaniina ese widaai yako pipi se aoo.

³⁰ Se awamana ndo waa ko wai akaai bada madona yau kaa ogiyoo pemake. Yau kaa ogiyoo pemana se asina ko “Aka ebo bage nakawii woe. Anegisemee wai ni'm woo-woo se ku kaa em si nadasi na, aii omiwoo towoo natoyaasi na, kase awai ndo naa bada kaambi ee?” se aseke.

³¹ Akaa'm asina ko “Tau, Tuhani Yesiusi wa kaa ‘Mike ae,’ se yanigeke kipii, kindo Anegisemee'm em si kadan ndo dama katoyaambi ndeo,” se aseke. “A nuwa, a'm ee nda togea bage waa ku nuwa, me eki tao dama tosea na mina kasipa kui,” se aseke.

³² Se asemana ko akaai Tuhani kaa mina enei se. Wa nuwa, wa'm ee nda togea bage ku otuma ku nuwa, ku mbo Tuhani kaa mina enei se.

³³ Tuhani kaa mina ku enei semana ko ese ndee ko ndee koya peniyada ee dito se mee me me, me akaai bada madona uwo aoo se yoo me kaa pemana ko em dapea yoo abuu ku yawiseke. Em dapea yoo abuu ku yawisemana dano se dodo me kaa ko wa nuwa, wa'm ee nda togea bage ku nuwa, ku otuma uwo ndoiba takumeweke ebeabea da awake.

³⁴ Uwo ndoiba takumewena ko peniyada ee dito se mee me me, me akaai bada madona wa'm ee kaa waya pemake. Wa'm ee kaa waya pemana noke kao “Eewee,” se aseke. Mee me me wa'm dimina nda ese bani-bani se aoo. Wa nuwa, wa'm ee nda togea bage ku nuwa, ekii otuma Anegisemee kaa “Mike ae,” se nigimagea yako ku otuma ese bani-bani se aoo. Se nigimea.

³⁵ Omai tukuma, me okaa yoo dito se se ebo bage ku ko ekii ekii'm guna miyo podisi bage waa ku peniyada ee kaa peyaake. Peniyada ee kaa peyaake se dodo me kaa ko ekii'm se asina ko “Peniyada ee dito se mee mbo pi-naasisea na mina ku se de. ‘Akaai pesi na yaa ekatana yapeyaae,’ se mina ku pi-naaseae,” aseke. Se asemana ko ku mina ku dopeana peniyada ee dito se mee to pi-aseke.

³⁶ Ekii'm dopea mina ku yemana ko peniyada ee dito se mee to wa'm Paudusi se asina ko “Okaa yoo dito se se ebo bage ekii'm se nasina ko ‘Ai mesema Sidasi, akai pesi nde yaa ekatana peyaae,’ se nasipea,” aseke. “Ku kindo endo ko akai peke sekii. Koo widigi tau se pewee o,” se aseke.

³⁷ Se aseke koya, tau. Paudusi wa ko wa'm podisi bage ku se asina ko “Tau, ku dim'mba tau,” aseke. “Anai ko anai ese okaa se Edoma bage koya mina daan tau yoo uwa da kaa em nadamea. Em nadana peniyada ee nda nadomaamea. Yai, ekii'm naawamea ku Edoma bage'm okaa mina daa tamamea sese,” se aseke. “Kena endo ko ebo bage ku aii koo napeyaao gai yee? Ka! Ku be! Ku ebo bage kuwa ekii daa tamana peu-pau naawamea kumana ekii'm ndo mena peniyada ee nda kam bada namawesi,” se aseke.

³⁸ Se asemana ko podisi bage ku Paudusi'm asipi mina dopeana okaa yoo dito se se ebo bage mbo pi-aseke. Pi-asita mugo ndoya ku ebo bage kuwa ekii “Akaai Edoma bage nde,” se mina yemagea ndoe ese widaake aoo.

³⁹ Ese widaagea yako medona akaa mbo memagea. Akaa'm yima kiki ku wanaanisi na akaa mbo memake. Akaa mbo memana peniyada ee kaa kam bada madoke. Bada madona se asina ko “Wai, wai awankeo ndeo. Nawisineae!” aseke. “Akaai peke bada. Enii'm okaa yoo batana peke me bada,” se aseke.

⁴⁰ Se aseke se dodo waa ko Paudusi mesema Sidasi akaai peniyada ee kaa kam batana Didiya wa'm ee kaa pemake. Didiya'm ee kaa pemana Yesiusi kaa kinaa bage mesema ade se. Yesiusi kaa kinaa bage ade semana ko ekii tao ekii'm dimina yatakuniyaao kan mina enei se. Ekii'm dimina yatakuniyaana ko kiyoo kam batana peke. Se awamea.