Edaseo Bage 13 - Anegisemee'm Mina Kapuge

Asiya maa kaa tomea bage ekii namba Yesiusi mbaya bage kimea 13:1–16:5 Banabasi, Seaudusi akaai An'diokiya kota okaa yoo kam peyaamea se mina da

¹ An'diokiya kota okaa yoo toke se Yesiusi mbaya bage mesema andagatagea ku ko ebanaa ku nabi se bage waa, ebanaa ku Yesiusi'm mina kaa tupinaa se bage waa. Ku bage kuwa ekii ekaa da ko ona me ko Banabasi. Ona me ko Simeoni. Wa ekaa da Simeoni koya eba tukuu kumana ekii Nigeda se ekaa da maneke. Kena ona me ko Dukiusi. Wai Kidene okaa yoo kam memi se mee to. Ona me ko Menahemi. Me Menahemi me me, me eduga mbeedi se dodo ko wai ese ebo se mee to Hedodesi An'dipasi wa namba mbeedi se dodo me kaa wa mesema akaamoo simea se mee to. Kena takanu me ko me Seaudusi. Se.

² Kena ea na gapi, ku bage kuwa, ekii andagatagea se dodo ndoe, ekii'm dimina ese Tuhani mbo kaao kan noke kao si nona ndo Tuhani yaapapa semuu nakea. Tuhani yaapapa se se dodo me kaa ko Anegisemee Dim'mba wai ekii'm dimina da nda se yakumana ko “Banabasi mesema Seaudusi akaai wa-nini naawenimaae,” se yakumake. “Ni'm gai-gai naa-awanaa taae, se yakumapa mina kuwa ku naa-awasi na akaai wa-nini naawenimawee,” se yakumake. Anegisemee Dim'mba wa'm se yakumami.

³ Ku kumana noke kao si nona ndo Tuhani asetaana ndo waa ko akaai wa-nini yawenimaao kan akaa moo kaa yaa dapimagea. Yaa dapimana ko yapeyaake, Anegisemee tao ndanda pi-yaa-awasi na.

Banabasi, Seaudusi, akaai Sipedusi maa kaa Anegisemee'm mina asinaa simea se mina da

⁴ Anegisemee Dim'mba wai “Akai pewee,” se yakumapi kumana pegea. Pegea se dodo me kaa ko endidona Sedeukiya okaa yoo yigiyoo endemake. Yigiyoo endemana uwo daii nda kuma da kaa pakaaneke. Uwo daii nda kuma da kaa pakaaniina muuna ndo waa ko maakaa uwo epopi nda em'mbee epogo maa, Sipedusi maa me kaa pemake.

⁵ Sipedusi maa me kaa pemana Seadamisi okaa yoo endaaneke. Seadamisi okaa yoo me kaa endaaniina ndo waa ko Yahudi bage ekii'm andagatake ee waa oba mugo ku nda ndem-pe se. Ku nda ndem-pe semuu sita mugo ndoe Anegisemee'm mina asinaa nakea. Se awake se dodo ndoe akaa'm awake-awake kao ku yaaetaa kiyaasi na Yohanesi Madakusi wa namba akaai mesema penaa se.

⁶ Me epogo maa me kaa se-yoo we-yoo en'ndo otuma penaa sinaina ndo waa ko, Paposi okaa yoo ukigea. Paposi okaa yoo ukimata mugo ndoe, Yahudi mee ona wa mesema ade sipea. Mee me me wa ekaa wiya aoo. Ona me ko Badayesiusi. Ona me ko Edimasi. Kase enta mugo ndoe Edimasi ekaa da me Yunani ebe kaa mina. Me mbaa'm daa manee se aoo se mee to se asiyaa mugo dodo se ekaa da. Ese wa'm sese kui. Kena wai wa kaa to se asina ko “Ni ko ni nabi se mee to,” se aseke koya tau. Wai mbae da se nabi mee to me ndo.

⁷ Kena Badayesiusi wa'm akaamoo ona aoo. Wa'm akaamoo me ekaa da ko Sedegiusi Paudusi. Sedegiusi Paudusi wa'm ndanda ko epogo maa me kaa ebo dito se mee to. Mee me me, wai ese dimina aoo se mee to. Kena me mee me wa'm nigina ko wai Anegisemee mina yeao gai se nigeke kumana ko mee ona peyaake. “Banabasi mesema Seaudusi akaai ni mbo bada naamaweae,” se asemana pi-bada maweke.

⁸ Akaai wa mbo bada maweke koya aii bada ndo. Daa manee se aoo se mee me me, wa'm akaa'm aseao kan sipea mina ku otuma si maaniyaake koena. Daa manee se aoo se mee to wa'm se asina ko “Epogo maa me kaa ebo dito se mee to woe, akaa'm mina ku si yeae. Akaa'm mina ku mbeduwa ae se ndo nigaae,” se aseke.

⁹ Kena Seaudusi wa namba ekaa wiya aoo. Wai ekaa ona me ko Paudusi. Kena Anegisemee Dim'mba wai Paudusi nduwawe ese em'mbee yaa mani da manii yako ko Paudusi wai Edimasi ditona se asina ko

¹⁰ “A ko ese Ibedisi wa'm yopaa mugo dodo se kadeo!” aseke. “A ko ese dama ndumbo se kao ku otuma mbeedi mbeaseao gai se mee to koena. A'm dimina da nda ese peu-pau se dimi ku ndo dowoo nae se mee to. Ese mee yadeba nae se dimina ku ndo aoo. Kam tau,” aseke. “Dee, a'm sese ko ai Tuhani wa'm ese dama ndumbo se sese ku kupoo kiyaana si maaniyaabuu nae se mee to. Ku kase koena ku ndo awawoo nae?” aseke.

¹¹ “Ku kindo Tuhani wa'm em kadaanki ndeo. Em kadai ndoe emaa diyoo kaambe. Emaa diyoo kina ndo waa ko wa'm mbutu kanepi mbutu me kaa kiyoo ndo ta keowaambe. Daamee ao da se dodo nde miya a ese deao kana ndo se tuta taambe,” aseke. Se asita mugo ndoe mina wiya tau kumana Edimasi wa'm dena ko sinu epuyiba penaa siyaa mugo dodo se deke. Kisena ese mike tuku dambo kidai se deke. Ese tuku dambo ku ndo dei yako yaa yawenaa se mee to ebaao kan adambe-adambe se penaa se.

¹² Ku se ku deke se dodo me kaa ko epogo maa me kaa ebo dito se mee me me, wai Tuhani mina kaa se nigina ko “Abayai! Akaa'm natupipea mina ku ese mike mina waa ae,” se nigeke.

Pisidiya maa kaa An'diokiya okaa yoo Anegisemee'm mina asinaa simea se mina da

¹³ Ken ndo waa ko Paudusi nuwa, wa mesema penaa se bage waa ku nuwa, ku uu daii nda kuma da kaa pakaaneke. Kuma da kaa pakaaniina Paposi maa kaa kam batana Pamepidiya maa kaa Pedega okaa yoo pemake. Kiyoo pemana ko Yohanesi Madakusi wai Yedusedem okaa yoo peao gai kumana akaa gimitana mi-ndagidi pei.

¹⁴ Pei se dodo waa ko Paudusi mesema Banabasi akaai Pedega okaa yoo batana Pisidiya maa kaa An'diokiya kota okaa yoo me kaa pemake. Kiyoo pemana ko Yahudi bage ekii'm daa se gapi toke se dodo me kaa ko Yahudi bage'm andagatake ee me nda pi-ndemeke. Me nda pi-ndemina animana tomu se.

¹⁵ Kiyoo tomu sita mugo ndoe, me andagatake ee dito se se ebo bage waa ekii namba me ee me nda aoo. Ekii otuma kapuge nda mina, mina yito nakea. Ekii'm kapuge nda mina yito nakea ona me ko Musia wa'm kapuge nda mee tupina mina me ona. Kena nabi bage waa, ekii'm kapuge mina ku ona. Ku kapuge mina ku kaa ndamagea ndoe yito nakea. Ku yitona ndo waa ko ku ebo bage kuwa ekii Paudusi wa'm mina namba yeao gai kumana mee ona yapeyaana Paudusi mbo yapeyaake. Paudusi mbo yapeyaana ko “Tau, ebo bage ekii'm se kasipea waa ‘Eniikinaa bage woe. Akaa mbo mee'm dimina yatakuniyaasi na mina aoo kipii kindo ko ku mina ku naseae,’ se kasipea nde,” se aseke.

¹⁶ Se asemana ko Paudusi wai ineweke. Inewena “Koo ndeo,” se aseao kan yaa da ane-ane se awake. Kena wa'm se asina ko “Isedeo bage ku nuwa, Anegisemee kaa yapapa se se Yahudi tau se bage ku nuwa, eki otuma nayito taae,” aseke.

¹⁷ “Eduga ko Anegisemee wa ko, enii Isedeo bage'm yapapa se Anegisemee me me, wai enii'm eedoo bage ku ekii-nini yawenimami. Enii'm eedoo bage ekii-nini wenimana ekii'm yuwa kam yuwa ku ese oba yakiyaabuu simi. Mesida maa kaa aneke se dodo me kaa ko ese oba yakiyaabuu simi. Ese oba yakiyaana ko wa'm ese oyu se yaa mani da ese maaneke kumana Mesida maa kaa kam bada madona yapeyaami.

¹⁸ Bada madona yapeyaana mee tuwaan tau yoo maa ndani se maa me kaa penaa simea. Penaa, penaa, penaa sita mugo ndoe, daamee endii pakei mee ndo mee wiya omake se dodo ndoya ekii wa'm mina yaatamoo, yaatamoo, yaatamoo se koya tau. Anegisemee wa ko wai dama ndo maniwoo simi ndo,” aseke.

¹⁹ “Kisena ndo waa ko Anegisemee wai Isedeo bage bada madona Kanakani maa me kaa ukimake. Kanakani maa me kaa ukimana dembea ndoe, Kanakani maa epoo bage kiyoo aoo. Ku Kanakani maa epoo bage ekii taii ndo taii dada aoo. Ku koya ku bage kuwa Anegisemee'm mbeedi yambembo simi. Ku mbeedi yambembo semana ndo waa ko wa'm bage tao Kanakani maa daa mbeasimi. Enii'm eedoo bage ekii tao epoo bage yakiyaao kan, ‘Ee,’ se asimi.

²⁰ Ku kasipa mina kuwa mani dano tau. Enii'm eedoo bage ekii Mesida maa kaa ukimana dai kaa waa ko kise, kise, kisena Kanakani maa epoo bage kimea kam miyo epopi nda kuwa ese daamee endii pakei 450 ku mugo om'pi,” se aseke. “Kena ndo waa ko Anegisemee wai enii'm eedoo bage ku wado ebo yadito sisi na se Hakim se bage waa yaambeasimi. Ku ebo dito se Hakim se bage waa ku ebo yambeaseke, ebo yambeaseke, ebo yambeasiwoona ese pake-takanu se Hakim mee me me, me Seamueo, nabi se mee me me.

²¹ Ku Hakim bage ku Anegisemee'm ebo yambeaseke koya tau. Isedeo bage ekii'm asina ko ‘Hakim mugo ebo se bage waa enii be. Enii'm moo wado ese ata emi tau ebo se mee to me mugo ebo bage naambeaseae,’ se asimea. “Se asemana ko Anegisemee wa ko wai mee ona ebo yambeaseke. Mee ona me ekaa da ko Seau. Me Seau me'm taii to ko Beniyamin. Wa'm naamee ko Kisi. Me Seau me me ebo yambeana ndo waa ko wa'm ebo tona wado, daamee endii pakei mee ndo mee wiya omami,” aseke.

²² “Kena ndo waa ko Anegisemee wai Seau'm ebo toke yoo ku dano yakiyaami. Ku dano yakiyaana ko Daudi ebo yatoyaami. Ese ebo yatoyaai yako wai Isedeo bage wado ese ata emi tau ebo se mee to kimi. Anegisemee wai Daudi kaa se asina ko ‘Iseai yombai, Daudi me me, me ese ni'm dimina ndo naadowoo nai se mee to se deo,’ asimi. ‘Wai ni'm gai-gai otuma ku ndo naa-awawoo taambi ae, se deo,’ se asimi,” aseke.

²³ Kena Paudusi'm waya se asina ko “Ese eduga ko Anegisemee wai enii'm eedoo bage mbo se enina ko ‘Dama katoyaasi na mee to kaapeyaata,’ se enimi. Kisena ndo waa ko wa'm mina pi-pamiyaao kan me mugo mee to me Isedeo bage mbo yapeyaami. Wa'm yapeyaami mee to me Daudi wa'm wado one dake mee to. Wai ekaa da ko Yesiusi. Me Yesiusi me me, me enii'm woo-woo se kaa em si nadana ndo dama natoyaasi na mee to,” se aseke.

²⁴ “Eduga ko Yesiusi mbeenaa ku aoo kumana waa ko ukaasi ae se dodo me kaa ko Yohanesi wa kita Isedeo bage mbo ukimana ekii mbo en'ndo otuma mina eniwoo simi. Wa'm eniwoo simi mina ku ko ‘Ekii'm woo-woo se ku ogato damawee. Anegisemee wa'm dimi ku ndo yaadowoo taae,’ se eniwoo simi. ‘Kena ku dimi ku desi na uwo ndoiba katakumewee taamba,’ se eniwoo simi. Yohanesi wa'm se eniwoo simi,” aseke.

²⁵ “Kam waa ko wa'm ndanda mbeenaa ku aoo kumana waa ko dano kaambi ae se dodo ndoe, Yohanesi waya se asina ko ‘Eki'm ni kaa nanigina ko kase nanigigea naa ya? Ni ko ni Keditusi se mee to me tau. Mee me me, me ni ogudi meesi mee to. Ni ko mbeedi. Wa ko ebo. Wai ese asiyoo ebo se mee to kumana ko wa'm masii mbeenaa mbee waa yaa-awake ku nde miya iyo. Wa'm sepatu wa tao yaekamake se ndanda mugo, ku nde miya kewii. Ni ko ese mbeedi koena,’ se asimi. Yohanesi wa'm se asimi,” aseke.

²⁶ Kena Paudusi wa'm waya se asina ko “Nikinaa bage waa woe. Abedaham wa'm yopaa waa ku nuwa, Anegisemee yapapa nakea se Yahudi tau se bage ku nuwa, eki ni'm mina nayito taae. Enii'm woo-woo se kaa em si nadana ndo dama natoyaasi na se mina me me, me Anegisemee wa'm Keditusi kaa enii mbo naameyaami mina da,” aseke.

²⁷ “Ku mina ku Keditusi kaa enii mbo naameyaami koya Yedusedem okaa yoo tomea bage ku nuwa, ekii'm wado ebo bage ku nuwa, ku Yesiusi deke ko demea koya tau. ‘O me Keditusi se mee to ae,’ se ku yanigaan tau. Yesiusi kaa eoo ndo. Omiyaa siyaa ku ndo daa se gapi toke se dodo me kaa ekii andagatana nabi bage'm wudumamea kapuge ku ndamata, ndamata, ndamata se koya ekii'm ndamapea mina ku si masimake ndo. Ku si masimake kumana Yesiusi wa'm moo kaa yambatumasi na mina yadotaamea. Yambatumasi na mina wa moo kaa yadotaagea se dodo ndoe, nabi bage'm amanimamea mina ku mike pi-pamiyaagea.

²⁸ “Wa'm peu-pau awai yako yambatumaao sekii se kao ona kaa miya diin tau. Ku ona kaa miya diin tau koya ekii Pidatusi mbo pi se asina ko ‘Yesiusi mbatumaae. Yesiusi mbatumaae,’ se en'ta simea.

²⁹ Se asemana ko nabi bage ekii'm eduga Keditusi kaa wudumamea mina kuwa ku otuma Yesiusi kaa yaawata simea kui. Ona kaa miya osiyaan tau. Ku se ku otuma dodo ndo yaawataina dano se dodo me kaa ko Yesiusi bota da eda piya aoo se piya tukuu me kaa kam maa yoo goemaake. Maa yoo goemaana dopeana oma yaga yiba domaake,” aseke.

³⁰ “Oma yaga yiba domaamea koya Anegisemee wa ko wai Yesiusi bota da maa poo yoo yandomami.

³¹ “Maa poo yoo yandomana ndo waa ko onu oba mugo omake se dodo ndoe mee mesema ade simea. Eduga Yesiusi mesema penaa se bage waa, Gadidea maa kaa kam Yedusedem okaa yoo memamea se bage kuwa, ku Yesiusi mesema ade simea. Endo ko Yesiusi mesema ade simea bage kuwa ekii wa kaa mina waa ku Isedeo bage mbo donaa asinaa nakea se bage waa kimea,” aseke.

³² “Ese dama yeao gai se mina ku kasiinka ndeo. Ese eduga ko Anegisemee wai wa'm anikee waa mike awaasi mina da me enii'm eedoo bage mbo enimi.

³³ Ekii mbo enimi ko enimi koya wa'm enimi mina ku me tomea bea da awaan tau. Ku bea da awaan tau koya wadobo ekii'm wado one dake bage waa enii ko enii mbo enii tao naawami. Yesiusi maa poo yoo yandomake se dodo me kaa wa enimi mina ku enii bea da kaa pake-pam'dai. “Keditusi wa'm maa poo yoo ndomaasi mina da me me, me kaa amanimami mina me Euu Mina Waa kapuge nda wiya aoo me wudumami mina da. Me nda wudumami mina me ko, ‘Endo gapi ni mee'm emaa misi kaa se kaadeyaana ko a ko mike Niyombai se kaadeyaake. Ni ko mike a'm Naamee se kaadeyaake,’ se asimi. Anegisemee wa'm Wayombai asimi mina se wudumami,” aseke.

³⁴ Kena Paudusi wa'm waya se asina ko “Yesiusi si dibisi na Anegisemee'm maa poo yoo yandomami. Ku kaa mina namba eduga kapuge nda wudumami. Me nda wudumami mina me ko me se de. ‘Ni'm eduga Daudi mbo ese okaa ndumbo se mina enima kuwa, wa'm moo wado dama toyaasi na aya mike yadotaata mina ku ko ku eki'm moo wado namba kadotaamba mina waa kui,’ se wudumami.

³⁵ Kena Anegisemee wa'm kapuge nda mbeenaa wa-nini yoo waya Keditusi kaa mina se enina ko ‘Anegisemee woe, a'm gai-gai ese ndumbo ndo kaawanaa se mee to wa bota da dibeoke iyo. A'm “Bado o, dibeos,” se mina si asiimbe kumana iyo,’ se enimi. Ku mugo mina ku Anegisemee'm kapuge nda se wudumamea,” aseke.

³⁶ “Daudi wa ko wai maa kaa tomi dodo ko Anegisemee'm gai-gai ku ndo yaa-awawoo simi. Ku ndo yaa-awawoona ndo waa ko boke. Wa bota da me wa'm eedoo bage bota waa mesema maa yiba manimamea. Maa yiba manemana dibeopi. Dibeopi kindo ko wa'm wudumami mina ku wa kaa to mina tau se deke.

³⁷ Ku wadobo Yesiusi Keditusi kaa amanimami mina waa ae se nigeo. Kase enta mugo ndoe, Yesiusi bota da dibaan tau. Anegisemee'm maa poo yoo yandomami koena,” aseke.

³⁸ “Nemugoi nakawa woe, Yesiusi wa'm se awake kumana wa kaa enii'm woo-woo se ku otuma naawise-mbeaseke sekii. Ku mina ku kaseao kan sipa.

³⁹ Dee, Anegisemee wa'm okaa mee tupisi na mina, Musia wa'm wudumami mina kuwa ku kaa mee'm woo-woo se naawise-mbeaseke sekii tau. Ku kaa dim ndumbo nakiyaake sekii tau. Yesiusi kaa ‘Mike ae,’ se nigeke me kaa kiyoo ndo mee'm woo-woo se en'ndo otuma naawise-mbeaseke sekii. Me kaa ndo ‘Mike ae,’ se nigeke kipii kindo ko Anegisemee'm emaa misi kaa se naadena ko ‘Me dim ndumbo se mee to mugo dodo,’ se naadei,” aseke.

^40-41 “Eduga ko Anegisemee wa'm se enina ko, ‘Ni kaa nagoea-goea se bage waa woe. Ni'm eki bea da kaa abayai se kao awaata. Abayai se kao awake se dodo me kaa ko eki deke ko deke koya si deke. Me kaa mina me mee agumee'm dama kanige-maneke nde miya, iyo. “Tau! Mbeduwa ae,” se yanigiyaa. Ni'm abayai awaata kao ku kaa “Mike ae,” se dimi nigaao be kumana “Abayai,” se dimi ku ndo nigaae. “Abayai,” se nigimana ko aii bos,’ se enimi. Ku Anegisemee'm enimi mina kuwa ku nabi bage ekii'm kapuge nda se wudumamea. Kena endo ko nabi bage'm peu aya dotaake mina eki kaa nde miya si kadotaasi na dama nigi si pe taae. Anegisemee'm abayai awami kao ku kaa kiyoo ‘Mike ae,’ se nigaae,” se aseke. Paudusi wa'm se aseke.

⁴² Ken ndo waa ko Paudusi mesema Banabasi akaai peke. Yahudi bage ekii'm andagatake ee kaa kam yoo da kaa peanigea ae se dodo me kaa ko ku bage kuwa ekii'm se asina ko “Onu bidimi omana dada aoo gapi waya daa se gapi toke se dodo me kaa ko akaa'm ku enipea mina kuwa waya se mi-naseae,” se aseke.

⁴³ Ku semana ndo waa ko me ee nda andagatapea bage ku ko ekii enda awade se. Enda awade semana Yahudi bage ebanaa ku nuwa, Yahudi tau se bage koya Anegisemee yapapa se se bage ebanaa ku nuwa, ku Paudusi mesema Banabasi akaa ogudi pegea. Akaa ogudi pegea se dodo ko Paudusi mesema Banabasi akaai mesema mina amoe-moe nakea. Mina amoe-moe sita mugo ndoe, akaa'm se asina ko “Anegisemee wa'm aii se dama natoyaake se dimina me kaa ‘Mike ae,’ nigimana kusipimaae,” se aseke.

⁴⁴ Onu bidimi omana dada aoo gapi, daa se gapi waya toke se dodo me kaa ko me kota okaa yoo togea bage, ese mbeenaa aoo kumana waa ko otuma mugo kuwa ku Tuhani'm mina yeao kan andagatagea.

⁴⁵ Andagatagea se dodo me kaa ko ku mee kooda ku dena ko Yahudi bage ekii ese yima kiki keke. “Yai, mee kooda waa ku duwa namatana Paudusi'm mina ndo yito taao gai. Ku enii be ae,” se nigeke. Se nigimagea yako yima kiki keke. Ese yima kiki keke kumana Paudusi kaa yawisineke mina asigea. “Paudusi wa'm enipi mina ku ese dimi dake se mina waa, ese peu-pau se mina waa,” se asigea.

⁴⁶ Ku semana ndo waa ko Paudusi mesema Banabasi akaa widaa tau. Akaai aii oyu kan ndo se asina ko “Ana'm nigina ko ‘Anegisemee'm mina donaa asinaa taao kan eki Yahudi bage mbo kita ukeke me ndo ndumbo ae,’ se nigeke,” aseke. “Eki Yahudi bage mbo kita ukimana kaseao kan sipa koya iyo. Eki towoo omiwoo sisi na mina ku beagea ndo se kadeo. Ku kindo bado o! Eki kaa to omiwoo towoo sisi na mina tuwaao be ae se nigeke kumana ko eki mbo duwa kamatana Yahudi tau se bage mbo emba maamba,” aseke.

⁴⁷ “Me ko me ese Tuhani wa'm ‘Pi-awaae,’ se nasimi mina kui. Dee, Tuhani wa'm se nasina ko ‘A ko ai Yahudi tau se bage ekii tao osee ao da mugo mee to se kakiyaapa,’ se nasimi. ‘Mee'm woo-woo se ku kaa em si yadan ndo dama ndo omiwoo towoo sisi na se mina kuwa ku maa en'ndo otuma odeeniyaasi na a ko osee ao da mugo mee to kakiyaapa,’ se nasimi. Tuhani wa'm se nasimi,” se aseke.

⁴⁸ Ku mina ku yegea se dodo me kaa ko Yahudi tau se bage waa ekii ko ese bani-bani se aoo. Ese bani-bani se aoo kumana Tuhani'm mina ku kaa “Paamee! Mataae!” se aseke. Kena Yahudi tau se bage ku namba Anegisemee'm omiwoo towoo sisi na yambeasipi se bage kumana ekii otuma Anegisemee kaa “Mike ae,” se nigeke.

⁴⁹ Se nigimana ndo waa ko Tuhani'm mina ku dopeana ko ekii'm yau-yau maa kaa togea bage ku en'ndo otuma asinaa penaa, asinaa penaa nakea.

⁵⁰ Ku se ku dena ko Yahudi bage ekii ese beake. Ese beake kumana ekii ebo bage mbo peke. An'diokiya kota okaa yoo ebo toke bage waa ku nuwa, Anegisemee kaa widaagea se ebo toke se ambii waa ku nuwa, ku mbo pemake. Yahudi bage ku ebo bage waa ku mbo pemana dipu-dipu se mina se asina ko “Paudusi mesema Banabasi akaai kaa ese peu ese bodi se kao yaawaae! Ku se ku yaawaae!” se asigea. Ku mugo dipu-dipu se mina se aseke kumana Paudusi mesema Banabasi yabeagea. Yabeagea yako ekii'm maa kaa kam eba-mbeasigea.

⁵¹ Kiyoo kam eba-mbeasigea se dodo me kaa ko akaa'm awake me ko “Aa-oo enii akaai kaa dim'mba tau awamapea ae,” se nigisi na ebeabea da awake. Akaai akaa bado tabe kaa maa nuwa, pesi na pisi-pisi aseke. Pisi-pisi se asemana pedona Ikonium okaa yoo pemake.

⁵² Kiyoo pemake koya Yesiusi mina yaa mu-mu nakea se bage waa, An'diokiya okaa yoo togea se Yesiusi mbaya bage kuwa, ekii'm dimina da nda ese bani-bani se nde miya aoo. Kena Anegisemee Dim'mba wai oyu se yaa mani da yakumamoo nai nde miya aoo. Se tuta simea.