Edaseo Bage 10 - Anegisemee'm Mina Kapuge

Konediusi wai iya-iya da kaa epo wado mee to demi se mina da

¹ Kaisedea okaa yoo kiyoo ko mee ona aoo. Mee ona me ekaa da ko Konediusi. Konediusi wa ko wai tentada wado ebo dito se mee to. Wa guna miyo tentada bage waa 100 aoo. Ekii mee ndo mee edibi aoo. Kena Konediusi nuwa, wa mesema tentada bage nuwa, ekii mbaya bage ekaa da ko “Itadiya Tentada Koo da” se ekaa maneke.

² Konediusi nuwa, wa'm sepaao waa nuwa, ekii otuma Anegisemee kaa se nigina ko “Yai, a ese asiyoo. Ese ebo se Anegisemee ae,” se nigeke kumana omiyaa siyaa ku ndo Anegisemee yaapapa se se bage waa. Konediusi wa ko wai ese kabu tau se mee to. Bakata bage mesema tapoo omeke mugo bage aoo kipii kindo ko wa'm se-kao we-kao ku aii se “Ee. Ee. Ee,” se awawoo nai se mee to. Ese kabu tau. Kena omiyaa siyaa ku ndo Anegisemee mbo asetoo siwoo nai. Konediusi wai me bage mee to.

³ Kena, ea na gapi ko yam 3 mugo Konediusi wai iya-iya da kaa se dena ko Anegisemee'm epo wado mee to ona deke. Deke se dodo ko epo wado mee to wai Konediusi mbo pasi kaa meke. Pasi kaa memana se asina ko “Konediusi woe,” aseke.

⁴ Konediusi wa ko wai ese widaana epo wado mee to dito sita mugo ndoe se asina ko “Mbao no, Tuhani?” aseke. Epo wado mee to me'm se asina ko “A'm Anegisemee mbo asetoo sipe se mina waa ku nuwa, a'm bakata bage mbo ekii tao aii se man'ta se ku nuwa, ku Anegisemee'm kaadei yako ‘O, ku ni tao naa-awawoo nai se kao waa ae,’ se kanigipi. Ku kaa kiyoo wai a kaa ese kabani-bani se aoo,” aseke.

^5-6 “Kena ogiyoo Yope okaa yoo kiyoo mee ona aoo. Mee ona me ekaa da ko Simoni Petadusi,” aseke. “Simoni Petadusi wa'm tuta se yoo maakaa uwo pasi kaa ee nda towee nai. Me ee me epomee me ekaa da ko me namba Simoni. Kena wa'm ndanda ko wai egina eba mugo agumina tunaa kiyaabuu nai se mee to. Kena Simoni wa'm ee nda omiwee nai me Simoni Petadusi kasipa mei!” se aseke. “Endo ko me Simoni Petadusi me me, me nakayoo a mbo bada kaamadona mesi ndeo, a'm bage ebanaa ku Yope okaa yoo ogiyoo yapeyaae,” aseke.

⁷ Se asemana ko epo wado mee to wai peke. Pepi se dodo waa ko Konediusi wai ekii wido mina woeweke. Mina woewepi kuwa wiya ku wa'm wa tao masii yaamata se bage waa. Ona wa namba wa tao masii yaamata se mee to koya wa'm guna miyo tentada se mee to. Wai Anegisemee kaa dimina ona ndo kan yaapapa nai se mee to. Ku wido kuwa Konediusi wa'm mina woeweke.

⁸ Mina woewena Konediusi mbo ukigea se dodo ndoe wa'm iya-iya da kaa depi ku ekii wido yanige-maneke. Yanige-manena ndo waa ko waya se asina ko “Endo ko ekii wido ogiyoo Yope okaa yoo me kaa pewee, Simoni Petadusi pi-bada naamawesea nde,” aseke.

Petadusi wa'm iya-iya da kaa demi se mina da

⁹ Se asemana ko ekii wido peke. Mu, mu, mu maa kaa omake. Omai tukuma mu, mu, mu mbeenaa daamee epopi se dodo me kaa Yope okaa yoo pasi kaa pemagea. Pasi kaa pemapea koya ekii wido ku Petadusi mesema ade taan tau yoo mbeenaa ogiyoo Petadusi wa ko wai ee wado tadi kaa pakaaneke, Anegisemee mbo asetaao kan.

¹⁰ Anegisemee mbo asetoo se se dodo ndoe namo naadi keke. Namo naadi kipi koya mee agumee'm yaayuwei nai ku mbeenaa apa. Odi poepi se dodo naambi ae se dodo ko iya-iya kaa deke.

¹¹ Iya-iya kaa dena ko asiyoo epo kaa asindaa ebe da mugo wadimapi ae se dei. Epo wadina ese em'mbee opee mugo kao namba deke. Me opee me me naa otou wiya, naa otou wiya ku yapamitana maa yoo domaai se dei.

¹² Maa kaa domaana opee ndago da nda se-egina we-egina, se-emii we-emii, se-mbainaa we-mbainaa, se-bido we-bido, ku se ku deke.

¹³ Ku se ku deke se dodo me kaa ko mina yeke. Me mina me se asina ko “Petadusi anowee. Ambuu mbatumana naae,” se aseke.

¹⁴ Kena Petadusi wa'm asina ko “Tuhani, ku tau sima,” aseke. “Yahudi bage'm okaa tupina mina kaa peu se kao nde miya, daa se kao nde miya ku ona kaa miya naan tau kumana endo nde miya naao be,” aseke.

¹⁵ Se aseke se dodo me kaa ko me mina me me waya se asina ko “Anegisemee wa'm dau kiyaapi kao ku kaa ‘Daa,’ se ku si aseae,” aseke.

¹⁶ Se asemana ko Petadusi wa'm iya-iya da kaa depi ku waya ea wiya deke. Wido aoo dei se dodo me kaa ko opee da aii asiyoo epo wado watapi se deke.

¹⁷ Asiyoo epo wado watana ko Petadusi'm nigina ko “Ni'm iya-iya da kaa depa me ko me kase bage kao ee?” se nigi si pe se. Wa'm se nigi si pe se se dodo me kaa ko ogiyoo Konediusi wa'm yapeyaami bage ekii'm “Simoni wa'm ee me kayoo?” se ku epi kipea se dodo me kaa ko wa'm ee me kaa memagea. Wa'm ee me kaa memana ko yau-yau eda gine kaa tomu ndoe

¹⁸ mina woeke. “Woe, Simoni, Petadusi me me, wai a mbo towee nai yee? Tau yee?” se aseke.

¹⁹ Se aseke se dodo me kaa ko ogiyoo Petadusi wa ko wa'm iya-iya da kaa depi mina ku kaa nigi si pe se. Ku kaa nigi si pe sita mugo ndoe Anegisemee Dim'mba wa'm Petadusi se asina ko “Simoni woe. Ekii wido bage ku a kaebinaa taao kan ukipea,” aseke.

²⁰ “Ku kumana inewee. Yigiyoo endee. Ku ni'm yapeyaama bage waa kumana ekii mesema peke ku kaa si dimi wiya-wiya kaae. Ekii mesema peenka se ku ndo nigaae,” aseke.

²¹ Se asemana ko Petadusi wai yoo kaa endeke. Yoo kaa endemana se asina ko “Eki'm ebinaa sipea mee to me ni,” aseke. “Mbao awaao kan mepea ee?” se aseke.

²² Se aseke se dodo me kaa ko ekii'm asina ko “Enii Konediusi mbo kam memapa,” aseke. “Konediusi wa ko wai tentada bage wado ebo dito se se mee to. Wa guna miyo tentada bage waa ekii mee ndo mee edibi aoo. Wai ese dimi ndumbo se mee to. Wai Anegisemee kaa widaake se mee to. Ogiyoo togea se Yahudi bage waa ekii otuma ku namba se yanigina ko ‘Konediusi wa ko wai ese dama ndumbo se mee to, ae,’ se yanigitakea,” aseke. “Kena Anegisemee'm yapeyaapi se epo wado mee to wa'm Konediusi mbo se asina ko ‘Petadusi wa'm eniimbi-eniimbi mina ku yeao kan, a'm bage ku wa mbo yapeyaake bada. Me Petadusi me a'm ee kaa pi-bada kaamawesi na, se awake bada,’ ” aseke. “Ku taao kan enii Konediusi mbo kam memapa,” aseke.

²³ Se asemana Petadusi wa'm asina ko “Bada o. Esimba nda meae. Nakayoo ndo omaao nde,” aseke. Omai tukuma Petadusi, ekii mesema peke. Peke se dodo me kaa ko Yope bage, Yesiusi'm mina yaa mu-mu nakea se bage ekii ebanaa ku namba Petadusi mesema pegea.

Petadusi wai Konediusi wa'm ee kaa pemana mina tupita simi se mina da

²⁴ Peta, peta maa kaa omake. Omai tukuma waya mu, mu, muuna ko Kaisedea okaa yoo me kaa ukeke. Ekii me ukaambea yoo Konediusi wa'm se nigimapi kumana wai wakinaa bage waa nuwa, wa'm ese ekiimugoi nakawa nuwa, ku se ku mina woewena andagatake. Andagatana ndo waa ko Petadusi ukii.

²⁵ Petadusi kiyoo ukimana ko me ee me nda ndemii se dodo ndoe, Konediusi mesema ade se. Ade se se dodo me kaa ko Konediusi wai Petadusi yaapapa taao kan, wa'm bado kaa kiyoo maa yoo endina amaa gapemake.

²⁶ Konediusi wa'm se awapi koya Petadusi wai yaa yawegeana ineweyaake. “Yai, inewee. Inewee. Ni namba aii mee to de, inewee,” se aseke. Petadusi wa'm Konediusi se asin.

²⁷ Se asemai se dodo ko akaai mina amoe-moe se. Mina amoe-moe sita mugo ndoe ee nda pi-ndemigea. Ee nda pi-ndemita mugo ndoe, Petadusi wa'm dena ko “Ai, ai ekii kooda waa andagatapea ae,” se deke.

²⁸ Se dei yako Petadusi'm ekii kooda se asina ko “Enii Yahudi bage'm sese ko eki epi. Yahudi bage'm sese ko enii Yahudi tau se bage mesema tomu se me daa. Eki'm ee nda ndemeke ku nde miya ese daa tamake kao,” aseke. “Ku enii Yahudi bage'm daa se kao koya Anegisemee wai wa-nini se mina natupimi. Wa-nini se mina se natupina ko ‘Mee agumee me ese peu, ese daa se mee to ku mina se ku si aseae,’ se natupimi,” aseke.

²⁹ “Se natupimi kumana eki ‘Meae,’ se nasigea ndoe ni ko dimi wiya tau kan eki mbo memapa,” aseke. “Kena endo ko mbao kaawasi na ‘Meae,’ se nasipea ee?” aseke.

³⁰ Se asemana Konediusi wa'm asina ko “Onu wui om'pa kuwa ni'm ee nda Yahawee asetaama. Mbeenaa endo mugo dodo. Yam 3 mugo, ni Yahawee asetaama. Yahawee asetaata mugo ndoe kuhai-kuhai ni egi kaa kiyoo mee ona aoo kidai. Wa'm manaa se kao ku ese wiki-wiki nai se dema.

³¹ Se dena ko wa'm se nasina ko ‘Konediusi woe, a'm asetaake mina me Anegisemee'm kayepi,’ se nasimi. ‘A'm bakata bage tao aii maniwoo sipe ku kaa namba kanigitapi, ndeo,’ se nasimi.

³² ‘Ku kanigitake kumana ogiyoo Yope okaa yoo kiyoo mee ona aoo. Mee ona me ekaa da ko Simoni Petadusi,’ se nasimi. ‘Simoni Petadusi wa'm tuta se yoo maakaa uwo pasi kaa ee nda towee nai. Me ee me epomee me ekaa da ko me namba Simoni. Kena wa'm ndanda ko wai egina eba mugo agumina tunaa kiyaabuu nai se mee to. Kena Simoni wa'm ee nda omiwee nai me Simoni Petadusi kasipa mei!’ se nasimi. ‘Endo ko me Simoni Petadusi me me, me nakayoo a mbo bada kaamadona mesi ndeo, a'm bage ebanaa ku Yope okaa yoo ogiyoo yapeyaae,’ se nasimi,” aseke.

³³ “Epo wado mee to wa'm se nasimi kumana ko ni'm bage ku a mbo mani yapeyaama, nakayoo bada kamadosi na. Kisena a nakayoo memape kumana ko ese paamee, se kanigeo,” aseke. “Endo ko enii otuma Anegisemee'm emaa misi kaa andagatapa. Aii se andagatake se ku tau. Anegisemee wa'm ‘Konediusi mbo pi-naaseae,’ se kasipi mina waa ku mina ku yeao kan enii otuma Anegisemee'm emaa misi kaa andagatapa,” aseke.

³⁴ Ken Petadusi wa'm se asina ko, “Oo, endo ko nige-neo ndeo,” aseke. “Anegisemee wai mee tuma da waa dene-wene taao be. Ku otuma dodo ndo se detai ae, se nigeo.

³⁵ Ku kindo Anegisemee kaa yawidaake kan yapapa sita mugo ndoe ese dama ndumbo ndo awata se bage en'ndo otuma ku Anegisemee'm emaa misi kaa maaneke se bage waa se detai ae. Mee en'ndo otuma maa en'ndo otuma dodo ndo se nadetai, ae, se nigeo,” se aseke.

³⁶ “Anegisemee wa'm dama mina me ko me wa'm Isedeo bage mbo nadoyaami mina da. Me mina me kaa kiyoo Anegisemee wa'm se nanige-manena ko ‘Yesiusi Keditusi wa ko wai enii Anegisemee mesema apoesi na se mee to,’ se nanige-maneke, me ona. Ona me ko ‘Me Yesiusi me me, me mee tuma en'ndo otuma enii'm moo wado ebo toke se Tuhani,’ se nanige-maneke, me ona. Wa'm dama mina me se nanige-manemi,” aseke.

³⁷ “Ese eduga edugana ko Yohanesi wa'm se eniwoona ko ‘Mee uwo ndoiba yatakumeweao sekii kisi na, woo-woo se ku mbana-mbeaseae,’ se mina ku eniwoo simi. Se eniwoona dai kaa waa ko Yesiusi wa'm awake-awake mina ku eki namba yemea. Wa'm Gadidea maa kaa kam kise Yudea maa en'ndo otuma ku maa ku kaa awanaa simi - awanaa simi mina ku eki yemea,” aseke.

³⁸ “Anegisemee wai Yesiusi, Naseadesi mee to wa tao manina ko wa'm yaa mani da nuwa, Anegisemee Dim'mba nuwa, ku manimi. Ku se ku manina ndo waa ko Yesiusi wai penaa se. Penaa, penaa, penaa sita mugo ndoe, dama ndo awanaa siwoo simi. Ibedisi guna miyo si maaniyaabuu nai se bage waa ku nde miya otuma dama yakiyaabuu simi ndo. Anegisemee wai Yesiusi mesema taa se kumana wa'm awami-awami ku otuma maaneke ndo. Ku mina ku namba eki yemea,” aseke.

³⁹ “Yesiusi wa'm Yahudi bage'm maa kaa awanaa simi - awanaa simi nuwa, wa'm Yedusedem okaa yoo kiyoo awami-awami ku nuwa, ku otuma enii Edaseo bage enii'm emaa misi kaa awawoo simi kao waa. Ku se ku ditona ndo waa ko ekii ogiyoo eda piya aoo se piya tukuu kaa Yesiusi yugumana yambatumamea.

⁴⁰ Yesiusi yambatumana dai kaa waa ko onu wiya omana wido aoo gapi Anegisemee'm maa poo yoo yandomami. Maa poo yoo yandomana ko Anegisemee wa'm Yesiusi mee mbo naadeyaami.

⁴¹ Mee mbo naadeyaai se dodo ko aii mee en'ndo otuma se ku tau. Anegisemee wai wa'm gai kan wa-nini wenimapi bage waa ku mbo ndo Yesiusi naadeyaami. ‘Yesiusi mike maa poo yoo ndomapi ae,’ se mina ku donaa asinaa sisi na Yesiusi naadeyaami. Yesiusi naadeyaana ko enii wa mesema enii ndepo noke kao noma. Uwo nde miya noma. Enii ndepo se awama,” aseke.

⁴² “Kena ndo waa ko Yesiusi wa'm enii mbo se nasina ko ‘Ni kaa mina kuwa naadopeana mee mbo pi-naa-eniwoo taae,’ se nasimi,” aseke. “Yesiusi wa ko wai enii mee tuma kaa bage, enii'm awake-awake ku kaa ndamana pikamoo taasi mee to. Ku ndamana pikamoo sita mugo ndoe, peu awapi se mee to wa kaa peu aya yadotaasi. Dama awapi mee to dama aya yadotaasi. Eduga bomea bage waa ku kaa nuwa, buwaan tau bage waa ku kaa nuwa, enii'm awapea-awapea ku kaa mina dasi na mee to me Yesiusi. Anegisemee'm se yambeasipi koena,” aseke.

⁴³ “Yahawee'm mina yaa-enei se bage waa ekii'm kapuge waa nda Yesiusi kaa nanige-manemea se mina me ko me se de. ‘Wa kaa mike ae, se nigipea se bage waa, ku en'ndo otuma ekii'm woo-woo se ku wa ekaa da kaa yaawise-mbeasiimbi se bage waa,’ se nanige-manemea,” aseke.

⁴⁴ Petadusi wai ku mina ku enei se dodo ndoe wa'm mina yayito sipea bage waa, Konediusi nuwa, wa'm ee nda andagatapea bage waa ku nuwa, ku kaa Anegisemee Dim'mba endaaneke.

^45-46 Ekii kaa endaaniina wa'm yaa mani da yakumai yako wa-nini maa ena kaa bage'm mina ku enei taao sekii kiyaai. Kena ekii'm eneao sekii kipea mina waa ku eniwoo nakea. Anegisemee namba yaapapa semuu nakea. Ekii'm se awagea se ku dena ko Petadusi mesema mepea se Yahudi bage kuwa, Yesiusi kaa “Mike ae,” se nigeke se Yahudi bage ku ko, ekii ku mina ku yemagea ndoe ese ndugidi se aoo. Ekii'm nigina ko “Abayai, Yahudi tau se bage ku nde miya Anegisemee Dim'mba ekii tao manipi ae,” se nigeke. Ku semana ndo waa ko Petadusi wa'm se asina ko

⁴⁷ “Dee! Eduga ko enii Yahudi bage enii tao nemi se Anegisemee Dim'mba me me, endo ko Yahudi tau se bage ekii namba manipi kui. Ku kumana ku Yahudi tau se bage ku uwo ndoiba si yatakumiyaasi na, uu yaamaao sekii se mee to me kayoo? Tau, ona kaa miya emi tau,” aseke.

⁴⁸ “Ku kindo ko ekii namba Yesiusi Keditusi ekaa da kaa uu ndoiba yatakumiyaawee,” aseke. Uu ndoiba yatakumewena ndo waa ko ku bage kuwa ekii'm se asina ko “Petadusi woe. A'm ee kaa mani si peae. A enii mbo ndo onu mbeenaa oba mugo naomana ndo waa ko a'm ee kaa peke bada o,” se asimea. Ekii'm se asimea kumana Petadusi mesema, wa mesema ukipea se Yahudi bage mesema, ekii'm awamea kui.