2 Yohanesi 1 - Anegisemee'm Mina Kapuge

Yohanesi wa'm “Aba, aba,” se asimi se mina da

¹ Me kapuge me ko me ni, Yohanesi, ni'm wudumapa kapuge. Ni ko ni penatuwa se mee to. Anegisemee wa'm wa-nini kapikimapi se ambii to mesema, a'm yopaa se bage waa ku nde miya, me kapuge me eki tao kapuge, eewee. Ni ko ni ese mike kaembaake aoo. Ku koya ni ndo kaembaake se ku tau. Ogu bage ku nde miya, Anegisemee wa'm mike ndumbo mina ku kaa epi se bage waa, enii ndepo otuma ese kaembaake aoo.

² Enii ko enii aii se kaembaake se ku tau. Enii Anegisemee'm mike ndumbo mina me kaa “Mike ae,” se nigimagea yako ku mike ndumbo mina kuwa ku enii'm dim'mba nda kiyoo ndigi. Taa kiyaake sekii tau. Endo nde miya, bona dai kaa nde miya, ku mike ndumbo mina ku enii'm dim'mba nda ndo se tuta, tuta siwoo taasea se mina waa. Ku kindo ku mike ndumbo mina ku kaa kiyoo enii otuma ese kaembaake aoo.

³ Aba. Eki ko eki Anegisemee wa'm mike ndumbo mina nuwa, a-embaa naa-embaa nakea se dimina nuwa, ku se ku yaa mu-mu se bada. Ku yaa mu-mu nakea se dodo me kaa kiyoo ko Anegisemee Naamee mesema Wayombai, Yesiusi Keditusi me mesema, akaa'm kaa-awawoo taambea se mina wiya aoo. Ona me ko eki'm woo-woo se kaa em si kadan ndo aii se gane kan dama katoyaabuu taasea, me ona. Kena ona me ko, akaai eki tao widigi tau se dimina ku nde miya kakumawoo taambea me ona, wiya. Ku se ku kaa-awatai waa bada ae, se kaanigimana “Aba, aba,” se kaseo.

Mike ndumbo mina ku yaa mu-mu sita mugo ndoe a-embaa naa-embaa siwoo taae, se mina da

⁴ Ni ko ni ese bani-bani se aoo. Kase enta mugo ndoe, ni a kaa mina se yena ko a'm yopaa se bage ebanaa ku ko ekii Anegisemee'm mike ndumbo mina ku dama yaa mu-mu nakea ae, se mina se yema. Mike ndumbo mina yaa mu-mu se me ko me Anegisemee wa'm “Se awaae,” se nambeasimi mina mugo dodo awake. Ku kumana ekii'm awawoo sipea ku kaa mina yemata mugo ndoe ni ese bani-bani sipa.

⁵ Nikinaa ambii, ku kaa bani-bani se aoo koya endo ko dim kakoeta taao gai se mina mbeenaa aoo. Ni'm kakoeta taao gai se mina me ko me se de. A-embaa naa-embaa siwoo taae, se kakoeta taao gai. Me mina me ko me yipi se mina se ku tau. Me enii ese eduga edugana Yesiusi kaa “Mike ae,” se nigimagea ndoe yemea se mina da.

⁶ Me ekii'm ese eduga edugana yemea se mina kumana me mina me si taman ndo mee kaa yaembaawoo semuu taae. Kena mee kaa yaembaawoo nakea sese me ko me kase bage kao ee, tau. Anegisemee wa'm “Se awaae. Ku si awaae,” se mina ku kuwa ku dama yaa mu-mu se kipii kindo ko me mugo sese me mee kaa yaembaake sese kui.

Keditusi wa'm tupimi mina nuwa, wa kaa mike ndumbo mina nuwa, ku mina ku ndo oyu kan yaa mu-mu siwoo taae, se mina da

⁷ “A-embaa naa-embaa siwoo taae,” se mina kasipa kuwa ku eki kaa to edimisi na se mina waa. Kase enta mugo ndoe, mbae da mina donaa asinaa se bage waa ku ese oba aoo. Kena ekii'm mbae da mina tupinaa se ku ko ku se de. “Tau. Yesiusi Keditusi wa ko wai mee yombai one yadaan tau,” se tupinaa se. Me mugo mbae da mina tupinaa se mee to me ese Keditusi kaa yabeai yako wa mesema yape maseke mee to mugo dodo. Ku taao kan wa ese mike kadeba taao gai.

⁸ Ku kumana ekii'm kadeba taao kan sipea mina ku aii bada kisi na eki kaa to dama dito taae, se kaseao kan sipa. Mbao awasi na eki kaa to edimaao ndo bada ee, enta mugo ndoe, tau. Eki ko eki Anegisemee tao ndanda yaawawoo nakea bage waa. Eki wa tao ndanda yaawawoo nakea kumana anikee waa Anegisemee wai eki tao dama aya kadotaa taasi. Endo nde miya Anegisemee wai eki tao dama tosi na aya waa kaabai-bai semuu nai. Yibanda kiyaa, eki mbae da mina ku kaa pi-embeneke kipii kindo ko iyo. Eki'm wa tao yaawawoo sipea ndanda ku aii bada kaasea sima! Kum seta kaa, eki'm awawoo sipea ku si aii bada kisi na, wa'm kaabai-bai siwoo sipi ku kanesi na, eki kaa to tukuu wemana dama dito taae, se kaseao kan sipa.

^9-10 Mee ona wai Keditusi wa'm tupimi mina ku dama yaa mu-mu se kipii kindo ko me mugo mee to me Anegisemee Naamee mesema Wayombai mesema ese enimoo se mee to mugo dodo. Ku koya mee ona wai Keditusi wa'm tupimi mina ku dama yaa mu-mu taao be kipii, dama si yaa mu-muna ndo wa-nini mina mesema dipinimana katupitai kipii kindo, yai! Me Anegisemee wa mbaya se mee to tau. Me ese peu-pau awatai se mee to me ndo. Ku kindo me mugo mee to “Eniikinaamee, aba, aba,” se mina ku si aseae! “Ni'm ee nda mi-naomaae,” se mina me nde miya si aseae.

¹¹ Kase enta mugo ndoe, ku mugo mina aseke waa, eki nde miya wa mbaya anewei yako wa mesema peu-pau awayaa mugo dodo. Ku kumana me mugo mee to “Aba, aba,” se mina ku mbeenaa kaa mina si aseae.

Yohanesi wa'm wudumami se kapuge me dano kiyaasi na se mina da

¹² Ni'm kaseao gai se mina ku oba ndigi ko ndigi koya ku se ku kaseao kan kapuge me kaa ndo kaawudumaao be. Ni ebe'm ndo mi-kasei taao gai. Ku taao kan ni'm ese “Oowoo,” se kao me ko me eki mbo pi-ade taao gai. Pi-ade semana mina amoe-moe taao gai. Enii'm bani-bani se dimina me ese asiyoo kam asiyoo wa-nini kisi na ni eki mbo memana mina amoe-moe taao gai.

¹³ Anegisemee wa'm wa-nini pikimapi se ekikinaa ambii waya ona me nde miya nakayoo ni mbo aoo. Kena me ambii me wa'm yopaa se bage waa ekii “Aba, aba,” se ku kasigea ndeo. Ni, Yohanesi, ni'm mina se naa aoo.