2 Timotiusi 1 - Anegisemee'm Mina Kapuge

Paudusi wa'm Timotiusi tao “Aba, aba,” se asimi se mina da

¹ Me kapuge me ko me ni, Paudusi, ni'm kaawudumeo kapuge. Ni ko ni Keditusi Yesiusi wa'm wa kaa wa tao napeyaami se mee to. Anegisemee wa'm gai kan se nambeasimi koena. Kena wa'm napeyaami me ko me wa'm enii tao ba-gamitaao kana se mina da me mee mbo donaa asinaa sisi na napeyaami. Wa'm enii tao ba-gamitaao kana se mina me se de. Keditusi Yesiusi mesema dipinimake se bage waa ku Anegisemee wa'm mike omiwoo towoo yatoyaabuu taasi se bage waa. Me mina me ko me ni'm donaa asinaa naka se mina da.

² Me kapuge me ko me Timotiusi a tao kaneo kapuge. Timotiusi woe, aba! Ni'm kadena ko ai ni'm ese kaembaake se niyombai mugo dodo se kadeo. Kena Anegisemee Naamee mesema enii'm Tuhani, Yesiusi Keditusi me mesema, akaai a'm woo-woo se ku kaa em si kadan ndo aii se kagane kan dama katoyaai waa bada ae se nigeo, me ona. Kena ona me ko, widigi tau se dimina da me nde miya kakumai waa bada ae se nigeo, me ona. Ku se ku akaa'm kaawagea waa bada ae, se nigimana “Aba, aba,” se kaseo.

Timotiusi woe! Anegisemee wa'm a tao kamatami ku ko ku si ono-ono sise na dama yaa mu-mu taae se mina da

³ Eduga ko ni'm eedoo bage waa ekii'm Anegisemee wa kaa wa tao ndanda yaawamea ku ese dama, ese ndumbo ndo yaawawoo simea. Kisena ndo waa ko endo se gumba ni nde miya ekii'm simea mugo dodo ndo awawoo naka. Ni peniyada ee nda nadomaapea koya ni kaa to se nigina ko “Tau! Ni Anegisemee wa tao ndanda ku yaawawoo sita mugo ndoe mbeenaa kaa miya peu-pau awaan tau, ae,” se nigeo. “Ni, ese dama, ese ndumbo ndo yaawawoo naka ae,” se nigeo. Kena me Anegisemee me me, me ni'm ndeemaa nde miya, apikaa nde miya, asetoo siwoo naka se Anegisemee to. Wa mbo asetoo siwoo naka se dodo me kaa ko ni a kaa kanigi seo yako a kaa “Anegisemee paamee!” se mina nde miya kaasetoo siwoo naka.

⁴ Eduga ko anai enda awade se se dodo me kaa ko a dimi bodi kan yee sime se kadema. Kena a'm yee sime ku kaa nigi simaa yako ni'm ese “Oowoo,” se kao me ko me a mesema waya ade taao gai. Ni'm dimina da bani-bani taao kan waya ni a mesema ade taao waa “Oowoo,” se nigeo.

⁵ Ni a kaa nigi se pe se se dodo me kaa ko ni a kaa ndo kanigi si pe se se ku tau. A'm sepao ku kaa namba nigi simake. Dee, ese eduga ko abai, Doisi me nuwa, kena ayoi Eunike me nuwa, akaa'm sese ko akaai Anegisemee kaa ese dimina ona ndo kan “Mike ae,” se nigiwoo simea se ambii waa. Kam waa ko a namba ese dimina ona ndo kan “Mike ae,” se nigiwoo sime. Kisena ndo waa ko endo nde miya me dimina me me, me a'm dim'mba nda ndigi ae, se kanigeo. Ni ese dimina ona ndo kan se kanigeo.

⁶ A ko ese dimina ona ndo kan Anegisemee kaa “Mike ae,” se nigiwoo nae kumana ku kaa kiyoo ni waya dim kakoeta taao gai se mina ona aoo. Ni'm dim kakoeta taao gai se mina me ko me se de. Eduga ko a ko ai Anegisemee tao ndanda yaawawoo sise na a moo kaa yaa da kadapimama. Se kadapimaa yako Anegisemee wa'm aii se kanena ko wa'm awaao epi se yaa mani da kamatami. Me awaao epi se yaa mani da me me, me bidea mugo dodo. Kase enta mugo ndoe, me yaa mani da si dito se waa, bidea mugo aii deoyaayaa. Bidea puu aseke waa, bidea gida mugo pakeyaayaa. Ku mugo yaa, a'm awaao epi se yaa mani da me bidea gida pakeyaase na bidea pupu se sese mugo dodo awaae. Wa'm kamatami se yaa mani da me yaataa-yaataa semuuna Anegisemee tao ndanda yaawawoo semuu taae.

⁷ Kase enta mugo ndoe, Anegisemee wai wa'm Dim'mba enii nduwawe nadomaake se dodo me kaa ko me mee kaa widaasi na nadomaami se ku tau. Waya na kiyaa, ona me ko enii tao yaa mani da aoo kisi na wa'm Dim'mba nadomaami me ona. Ona me ko Anegisemee kaa nuwa, mee kaa nuwa, ku kaa yaembaasi na nadomaami me ona. Ona me ko enii kaa to enii yimbi maneao sekii kisi na nadomaami me ona. Ku wido ku enii tao aoo kisi na wa'm Dim'mba enii tao nadomaami.

⁸ Enii nduwawe me bage Dim'mba nadomaami kumana enii'm Tuhani kaa mina ku kaa si ego kaae. Ku kaa si ego kin ndo mee mbo uwa pana pi-yaeniwoo taae. Kena ni ko ni peniyada ee nda toke ko toke koya ni kaa nde miya si naego kaae. Ni kaa si naego kina ni'm sipa mugo dodo awawoo taae. Ni'm sipa me ko me se de. Ni ko ni Anegisemee'm dama mina ku mee mbo donaa asinaa taao kan bodi ababa se kan donaa asinaa naka. Ku kindo ko ni'm awapa ku dodo ndo masewena a namba dodo ndo awawoo taae. Anegisemee'm yaa mani da kaa bodi ababa se aoo nde miya, tau. Wa'm dama mina ku mee mbo si dan ndo donaa asinaa siwoo taae.

⁹ Me Anegisemee me me, wai enii'm woo-woo se ku mbeedi naambeana dama natoyaabuu simi se Anegisemee to, me ona. Ona me ko wai, enii enii-nini nawenimana dama se kao ku ndo awawoo sisi na, mina nawoewemi se Anegisemee to, me ona. Kena me Anegisemee me me, wai enii tao dama naawake se dodo me kaa ko ku enii'm dama awake-awake ku naadei yako dama aya nadotaake se ku tau. Ku wa'm gai kan aii se dama natoyaabuu sipi me ndo. Dee, ese eduga edugana ko maa nuwa, epo nuwa, ku ona kaa miya anegi taan tau yoo se dodo me kaa ko Anegisemee wa'm enii tao se naambeana ko “Anikee waa Keditusi Yesiusi wa'm awaasi me kaa kiyoo kam mee tuma kaa bage ekii tao aii se dama yatoyaabuu taata,” se asimi. Wa'm aii dodo se naambeasimi.

¹⁰ Kise, kise, kisena ndo waa ko Keditusi Yesiusi wai maa me kaa tomi se gumba ndoe, Anegisemee wa'm aii dodo naambeasimi mina waa ku uwa da kaa pi-naapamiyaami. Kase enta mugo ndoe, me Keditusi Yesiusi wai enii'm woo-woo se kaa em si nadan ndo dama natoyaasi na mee to. Kena ku enii tao naawaao kan wai maa kaa tomi se dodo me kaa mee tuma ku boke ndo sekii se yaa mani da me naadano kiyaami. Enii boke ndo sekii se yaa mani da me naadano kiyaana ndo waa ko wa'm waya se naadeyaana ko Anegisemee'm dama mina me kaa kiyoo mee tuma da bage enii si dan ndo omiwoo towoo tuwaao sekii ae, se naadeyaami.

¹¹ Se naadeyaana ndo waa ko me dama mina me ko me mee mbo pi-eniwoo sisi na Anegisemee wa'm se nambeana ko “Paudusi ai Edaseo se mee to se kambeaseo. A mee tupeke mee to se kambeaseao,” se nambeasimi.

¹² Wa'm se nambeasii yako Keditusi kaa dama mina ku dopeana mee mbo donaa asinaa naka. Ku donaa asinaa sita mugo ndoe, mee'm nabeagea yako peniyada ee nda nadomaana bodi naababa siyaabuu nakea. Ni ko ni peniyada ee nda bodi ababa se aoo ko aoo koya mbeenaa kaa miya ego kaan tau. Kase enta mugo ndoe, ni'm “Mike ae,” se yanigimama mee to me ni'm eo se mee to tau. Wa'm sese ni ese epi keo. Ku kaa kiyoo ni wa kaa ese dimina ona ndo kan se yanigina ko wa'm dama mina da, wa'm namatami se mina me ko me wa'm dama edimitai se mina kumana ogu bage ku'm si maaniyaake sekii tau. Mbae da mina mesema dipinimake sekii tau. Me wa'm dama edimitai se mina kumana wa'm waya ukaasi yoo me gapi me kaa miyo wa'm dama mina me maaneke se mina ndo se tai. Ku kaa nigi seo yako ego tau ndo se taka.

¹³ Timotiusi woe. Ni ko ni eduga a mbo mina katupeke se dodo me kaa ko kupoo se mina ku katupaan tau. Ese dama, ndumbo se mina ku ndo katupiwoo sima. Ku kindo ni'm sese ku a namba dodo ndo ekokeduwaae. Ni'm katupiwoo sima mina ku dama yaa mu-mu sita mugo ndoe mee mbo ndumbo ndo pi-yatupiwoo taae. Pi-yatupiwoo nae se dodo me kaa ko a'm yaa mu-mu taao bada se dimina wiya aoo. Ona me ko Anegisemee kaa “Mike ae,” nigimana wa kaa egan'ta taao gai se dimina, me ona. Ona me ko wa kaa nuwa, mee kaa ogu kaa nuwa, ku kaa yaembaake se dimina, me ona. Ku dimina ku Keditusi Yesiusi wa'm kakumawoo nai se dimina kumana ku kaa kiyoo kusipimana ndumbo se mina ku ndo tupiwoo taae.

¹⁴ A'm tupeke se mina me ko me Anegisemee wa'm a yaa da kaa kamatami se mina da. Ese dama se mina da kamatami me ko. Me ogu bage ekii'm koo yoowitaao gai se mina kumana ku taa kisi na dama dito taae. A nduwawe toi se Anegisemee Dim'mba wa'm yaa mani da me kaa kiyoo Anegisemee'm dama mina me dama edimiwoo taae.

Paudusi wamugoi nakawaa ku ebanaa ku duwa yamatamea koya Onesipodusi wa ko tau se mina da

¹⁵ Kena Timotiusi, a'm yeme se mina ku kaa waya kasiinka ndeo. Asiya maa kaa kiyoo togea se Yesiusi mbaya bage ekii otuma ni kaa duwa namagea ndeo. Kena ku mesema duwa namagea se bage waa ku Pigedusi mesema Hedemogenesi, akaa nde miya ni kaa duwa namagea ndeo.

^16-18 Ku se ku duwa namatapea koya Onesipodusi wa ko tau. Dee, eduga ko wai Edoma okaa yoo me kaa ukimana ko “Paudusi wa kayoo?” se nigimai yako naebinaa siwoo simi. Naebinaa, naebinaaina ko “O, Paudusi wai peniyada ee nda yaa pineana yadomaamea ae,” se nadei ndoe wai ni kaa ego tau. Wa ni kaa ego tau kan ni mbo memai yako ni'm dimina da aii natakuniyaabuu siwoo simi ndo. Ea oba mugo natakuniyaai yako ni'm dimina etaa nakiyaami! Onesipodusi wa ko. Ese eduga nde miya ni ogiyoo Epesiusi okaa yoo ndigi se dodo me kaa wai ni tao dama tosi na se kao ku oba naawawoo simi. Me mina me nde miya a yeme sima! Onesipodusi wa'm ni tao dama naawawoo simi kumana ku kaa kiyoo ni'm Anegisemee mbo se yaasetoona ko “Anegisemee woe. Onesipodusi mesema wa'm ee nda togea bage waa mesema ekii tao aii se gane kan dama aya yadotaai waa bada ae, se nigeo,” me ona. Ona me ko “Anegisemee woe. Anikee waa nde miya, Tuhani wa'm waya ukaasi gapi me kaa kiyoo, me Onesipodusi wa tao aii se yagane kan dama yatoyaasi waa bada ae,” se nigeo, me ona. Ku wiya ku Onesipodusi wai ni tao dama naawawoo simi kumana ni'm wa kaa wa tao se yanigeo.