2 Kodintusi 2 - Anegisemee'm Mina Kapuge

¹ Ku kaa nigi si pe sita mugo ndoe, ni'm nigina ko “Eduga ko ni eki mbo memana dim kakoeta sima kumana dim bodi kimea. Kena anikee waa waya wadobo ni eki mbo memana eki'm si maaneke ku ndigi ae se kadeo yako waya dim bodi kakiyaabuu taata,” se nigeke. Ku kindo eki'm dimina waya si dim kabodi kiyaao kan “Eki mbo waya meao be ae,” se nigima.

² Kase enta mugo ndoe, ni ko ni dim bodi kakiyaake waa, eki mbo kam dim nabani-bani siyaabuu nai se mee to me kayoo kiyaa? Tau, iyo! Dim bodi kakiyaake kindo eki nabani-bani siyaake sekii tau. Kum seta kaa, ku taa kisi na eki mbo waya mi-kakoeta taao be.

³ Eki ko eki ni'm dimina nabani-bani siyaambea se bage waa se kadeo. Ku koya eki'm woo-woo nakea ku kaa kiyoo ni'm nigina ko “Eki mbo kaukeke waa, si nabani-bani siyaa. Aii dim bodi ndo nakiyaayaa,” se nigima. Kum seta kaa, dim bodi si nakiyaasea na eki mbo mani kameen tau. Aii kapuge ndo kaawudumaao ndo sekii se nigima. Kena ni ese dimina ona ndo kan eki kaa se kanigina ko ni'm kaawudumama mina ku si taman ndo dama yaa mu-mu se kipii kindo ko anikee waa ni eki mbo memana eki kaa kabani-bani taata, se nigeo. Waya ni'm bani-bani se dimina ku nadegea yako eki namba bani-bani taasea, se nigeo.

⁴ Me kapuge me kaawudumeke se dodo me kaa ko dimina etaa kan kaawudumama se ku tau. Ese dim kai-bai kan kaawudumama. Ese, ese dim dano-dano se kan, ese yee gumba ku aoo nde miya kaawudumama! Yibanda kiyaa dim bodi kakiyaao kan kaawudumama se ku tau. Ni'm eki kaa kaembaake se dimina me ese ebo kam ebo kaembaake ae se ku nanigi sisea na kapuge kaawudumama.

Woo-woo se mbana-mbeasipi mee to wa kaa mina ku aii wisin'take ndo sekii se mina da

⁵ Endo ko si maaneke awana dim bodi kiyaabuu nai se mee to wa kaa mina me ko me se de. Mee me me wai dim bodi nakiyaake koya ni ndo se ku tau. Eki otuma nde miya dim bodi kakiyaabuu simi. Ebanaa mbeenaa ndo dim bodi kimea. Ebanaa ese em'mbee dim bodi kimea. Ku kaa kiyoo dim bodi kakiyaan tau se mee to ona kaa miya emi tau se dema.

⁶ Ku semana ndo waa ko mee me me wa kaa em yadasi na eki oba mugo mina yadotaamea. Ku koya endo ko ebata. Mee me me wai wa'm woo-woo se ku mbana-mbeasimi kumana endo ebata.

⁷ Wa'm woo-woo se kaa mina ku aii wisin'take ndo sekii. Ku aii wisin'tana ndo wa mbaya emba matana dama yatakuniyaabuu taae. Wa'm dim bodi se dimina ku ebo kiwoona ese edo duwaao kana se dim bodi se aya aoo kaambi koena.

⁸ Ku kindo ku taa kisi na ni'm ese oyu kan kaseao gai se mina me ko me se de. “Eki'm wa kaa yaembaake se dimina ku uwa da kaa yadeyaao kan wa'm dimina yatakuniyaabuu taae,” se ku ndo kaseao kan sipa.

⁹ Eduga ko kapuge kaawudumama se dodo me kaa ko ni'm nigima mina me ko me se de. “Kodintusi bage ku ni'm mina ku dama nayito taambea ee? Aii natamaambea ee?” se ku nigima. Se nigimaa yako eki'm dimina ku kano-deao kan kapuge kaawudumama.

¹⁰ Ku kindo eki ni'm mina yitona mee me me wa'm woo-woo se kaa mina “Mina bota,” se yaambeaseke kipii kindo ko ni namba “Mina bota,” se yanigeo. Waya kiyoo kam ese ndumbo mina kasiinka ndeo. Ni'm mee'm woo-woo se kaa mina wisin'take kipii kindo ko me aii se mina wisin'take se ku tau. “Mina bota,” se asemata mugo ndoe, Keditusi wa'm egi kaa kiyoo “Mina bota,” se asipa kui. Me ko me eki kaa eki tao maanisi na se kao kumana se aseke bada.

¹¹ Kase enta mugo ndoe, Ibedisi wa ko wai nadeba semana si namaaniyaabuu taao gai koena. Wa'm si namaaniyaabuu taao gai se dimina me eki eo baa. Ku kindo wa'm pata oba kakiyaao kan sipi ku aii bada kisi na, mee me me wa'm woo-woo se kaa mina ku mani-mani ndo wisin'take ndo bada.

Paudusi wai Todoas okaa yoo pena ko dim gado kimi se mina da

¹² Eduga ko ni Keditusi kaa dama mina ku donaa asinaa taao kan Todoas okaa yoo me kaa pemama. Me kaa pemata mugo ndoe, “O, Tuhani wai ni tao mina enei taao sekii se enda da naawadimapi ae,” se dema. Se deke ko dema koya tau.

¹³ “Yesiusi kaa nikinaamee, Titusi wa ko, wai eki mbo kam Todoas okaa yoo me kaa ukaan tau ae,” se deke. Titusi emi tau ae se deo yako dimina gado kima. Wa kaa dimina gado kimana ko kiyoo tomu se sekii tau. Aii Todoas bage ku ndo “Eki'm ee kaa tuwaae,” se ku ndo atana Makedoniya maa kaa peao kan pema, Titusi ebaao kan.

Keditusi kaa dama mina donaa asinaa se me ko me mee'm yaa mani da kaa awaao kana se ndanda, se mina da

¹⁴ Dim gado kan pema koya, tau. Ni Anegisemee kaa ese “Paamee,” se nigeke. Kase enta mugo ndoe, enii Keditusi nda dipinimake kumana Ibedisi wa'm peu-pau naawaao kan sipi ku otuma Anegisemee wa'm enii tao mbeedi naambembo siwoo nai, me ona. Ona me ko Anegisemee wa'm enii nduwawe namugu-mugu siyaai yako enii wa'm mina donaa asinaa naka. Donaa asinaa sita mugo ndoe, Keditusi kaa epi kisi na se mina ku maa en'ndo otuma mee en'ndo otuma odeeniyaabuu siwoo nai. Ese dama eponu peyaabuu semai yako mee en'ndo otuma yeao sekii se eponu mugo dodo, me ona. Ku wiya ku kaa kiyoo ni Anegisemee kaa “Paamee,” se nigeo.

^15-16 Dee, enii ko enii Keditusi kaa mina eniwoo naka se dodo me kaa kiyoo ko Anegisemee'm emaa misi kaa ese dama eponu aoo se bage waa mugo dodo se nadetai. Yibanda kiyaa, enii'm mina yito sipea se bage ku kipii, ekii'm dimina ku otuma dodo tau. Dee, ebanaa bage ku Anegisemee wa'm si em yadan ndo omiwoo towoo yatoyaabuu taasi se bage waa. Ku kindo ko ku mugo bage ekii enii'm mina yeke se dodo me kaa “Yai, me omiwoo towoo natoyaabuu sisi na se mina kumana ku ese eponu bada se mina mugo dodo ae,” se nigeke. Yibanda kiyaa, ebanaa bage ku ko tau. Ebanaa bage ku “Mike ae,” nigaao be kumana okaa buwaasea se bage waa. Ku kumana Keditusi kaa mina me ekii'm yaboyaana bidea uwo ndoiba ndemaasea ae se nigisi na se mina da. Kiyoo kam ekii'm se nigina ko “Yai, me dibita eponu aoo se mina mugo dodo se yeo,” se nigeke. Enii'm eniwoo naka mina yemana ebanaa yeao gai, ebanaa yeao be, se ku deo yako enii'm nigina ko “Yai. Keditusi kaa epi kisi na se mina ku donaa asinaa se ndanda me ko me ese ebo se ndanda. Me enii'm yaa mani da kaa mbeenaa kaa miya awaao kana se ndanda ae,” se nigeke.

¹⁷ Ku koya Anegisemee'm mina eniwoo nakea se bage waa ese oba mugo ekii me mugo dimina emi tau. Ku mugo bage ekii'm nigina ko “Kipe oba maseao kan Anegisemee'm mina eniwoo taao gai, ae,” se nigeke. Yibanda kiyaa enii'm sese mina eniwoo naka me ese wa-nini keo. Dee, enii mina eneke se dodo me kaa enii'm nigina ko “Enii ko enii Anegisemee wa'm mina donaa sisi na napeyaabuu nai se bage waa ae. Kena wa'm mina ku eniwoo sita mugo ndoe Anegisemee wa nadito nai ae,” se nigeke. Ku kaa nigimaa yako bea momo - bea momo se dimina da me kaa kiyoo kam mina eneao be. Enii Keditusi nda dipinimai yako ese ndumbo mina ku ndo eniwoo taao gai. Me ko me enii'm sese.