2 Kodintusi 1 - Anegisemee'm Mina Kapuge

Paudusi wai Kodintusi okaa yoo togea se Yesiusi mbaya bage “Aba, aba,” se asimi se mina da

¹ Me kapuge me ko me ni, Paudusi, ni'm ebe kaa mina kapuge. Ni ko ni Keditusi Yesiusi wa kaa napeyaami se mee to. Anegisemee wa'm gai kan Edaseo se mee to se nambeasimi koena. Kena Timotiusi, Yesiusi kaa eniikinaamee to, wa namba ni mbo aoo. Me kapuge me ko, me Akaya maa kaa en'ndo otuma togea se Anegisemee mbaya bage waa eki tao kapuge. Ebanaa ku Kodintusi okaa yoo Anegisemee kaa andagatagea se bage waa. Kena ebanaa ku Kodintusi okaa yoo yau-yau togea se bage waa. Eki tao kapuge eewee.

² Aba! Enii'm ebo se Tuhani, Yesiusi Keditusi me mesema Anegisemee Naamee me mesema, akaai aii se dama katoyaagea waa bada ae se kaanigeo, me ona. Kena ona me ko ese widigi tau se dimina da me nde miya kakumagea waa bada ae se kaanigeo, me ona. Ku wiya ku kaa-awatai waa bada ae, se kaanigimana “Aba, aba,” se kaseo.

Anegisemee wai enii'm dimina da waa ku takun natoyaabuu nai se mina da

^3-4 Enii'm ebo toke se Tuhani, Yesiusi Keditusi me me, wa'm Naamee me ko me Anegisemee. Kena me Anegisemee Naamee me me wa kaa mataae! Kase enta mugo ndoe, enii ko enii widigi aoo se dodo me kaa me Anegisemee Naamee me me wai enii kaa ese nagane aoo. Ese nagane kii yako enii'm dimina takun natoyaabuu nai. Mbeenaa ndo se ku tau. Enii'm dimina takun natoyaake en'ndo otuma ku wa'm ndo takun natoyaabuu nai. Mbao awasi na takun natoyaabuu se ee? Tau na. Enii'm yau-yau bage waa ebanaa ku nde miya widigi aoo togea. Kena ku widigi aoo togea ae se deta mugo ndoe Anegisemee wa'm takun natoyaapi sese ku enii nde miya masewena ogu bage kaa dimina takun yatoyaabuu taao sekii. Ku se ku awaao sekii kisi na Anegisemee wai enii kita dimina takun natoyaabuu nai.

⁵ Ku kaa dama masimasea na waya kasiinka ndeo. Eduga ko Keditusi wa bodi ababa simi. Kisena ndo waa ko wa'm bodi ababa se ku enii kaa nde miya meaneke. Enii kaa meaneke se dodo me kaa mbeenaa ndo se ku tau. Ese oba kam oba bodi ababa siwoo naka. Ku kaa kiyoo bodi aoo ko aoo koya enii Keditusi nda dipinimapea se bage waa kumana Anegisemee wa'm Keditusi kaa dimina takun yatoyaabuu simi sese ku enii kaa nde miya nameaniyaabuu nai. Mbeenaa ndo se ku tau. Ese oba kam oba takun natoyaabuu siwoo nai.

⁶ Ku kindo ko enii'm bodi ababa se ku eki tao maanisi na se kao sima. Kase enta mugo ndoe, Anegisemee wa'm takun natoyaapi sese ku eki nadegea yako “O, enii nde miya takun natoyaabuu taambi ae,” se nigaao sekii. Kena eki'm dimina takun katoyaabuu nai kumana ku kaa kiyoo kam eki enii'm sese mugo bodi ababa se se dodo nde miya aii dimina si katu kina aii magi tau ndo kusipimana towoo taambea ndo.

⁷ Kum seta kaa, eki enii'm sipa mugo bodi ababa se aoo ae se kadena ko enii eki kaa dim wiya-wiya se mbeenaa kaa miya emi tau. Aii dimina ona ndo kan se kanigina ko “O, Anegisemee wai eki tao nde miya dimina takun katoyaabuu taambi ae. Ese wa'm takun natoyaabuu nai sese mugo dodo, eki kaa nde miya dimina takun katoyaabuu siwoo taambi, ae,” se kanigeo.

⁸ Yesiusi kaa eniikinaa bage waa woe. Enii ko enii ogiyoo Asiya maa kaa towee sima se dodo me kaa ko enii'm bodi ababa siwoo sima ku se ene. Ku kaa eki mbeenaa si nige-neke aoo. Kena ku kaa eki si nige-neke ndo se towoo nakea ku enii be kumana enii'm bodi ababa sima ku dama kanige-maniinka ndeo. Dee, enii Asiya maa kaa ndigi se dodo me kaa ko enii moo kaa nadotaana ko ese em'mbee yataao kana edo se bodi ababa sisi na se aya nadotaa siwoo simea. Ku deo yako enii ese dim katu kan se nigina ko “O, waya wadobo toke iyo. Mike buwaanka ae,” se ku ndo nigiwoo sima.

⁹ Mike kaseo. Ku kaa kiyoo enii'm se nigina ko “Ai, ai, enii'm moo wado kiyoo mee'm naboyaasi na se mina nadotaapea ae. Ooke sekii tau ae,” se ku ndo nigiwoo sima. Ku koya enii'm buwaao pasi se toke yoo me enii'm dimina natupisi na se kao. Kase enta mugo ndoe, ku kaa kiyoo kam enii'm awaao sekii se yaa mani da me si diton ndo mee bota-pata ku maa poo yoo yandomei taao sekii se yaa mani da, Anegisemee wa'm yaa mani da me me, me kaa ndo kusipimana yadito sima.

¹⁰ Wa kaa ndo kusipimana yadito sita mugo ndoe ese mbeenaa aoo kumana waa ko buwaanka ae se dodo ndoe Anegisemee wa'm dama natoyaami. Wa'm dama natoyaai yako ku kaa kiyoo kam enii ese dimina ona ndo kan se yanigina ko “Waya wada nda naboyaao sekii se kao aoo kaambi nde miya, Anegisemee wai naedimiwoona dama natoyaabuu taambi. Enii aii dodo yima boke sekii tau ae,” se nigeo.

¹¹ Kena, eki'm naasetoo se mina ku nde miya namaaniyaabuu taambea se mina waa. Ku kumana Anegisemee mbo naasetoo siwoo taae. Dee, mee oba mugo ku Anegisemee mbo naasetoo se kipii kindo ko Anegisemee wai dama tosi na aya nadotaa siwoo nai. Kena wa'm enii tao dama natoyaabuu nai ku nadegea yako mee oba mugo ekii “Paamee Anegisemee, paamee,” se mina yasetoo taambea sima. Ku aoo kaambea kumana Anegisemee mbo naasetoo siwoo taae.

Paudusi wa'm Kodintusi bage mbo peao gai ku wa'm dime kan wisin'tami se mina da

¹² Endo ko ese mike mina kasiinka ndeo. Ni'm ese dimina ona ndo kan kaseao gai se mina me ko me se de. Enii'm maa en'ndo otuma mee en'ndo otuma yaawanaa se sese me ko me se de. Enii si maaneke sese awaan tau. Bea momo - bea momo se dimina da mbeenaa kaa miya emi tau. Waya na kiyaa Anegisemee wa'm nakumawoo nai sese ku kaa kiyoo kam ese dama ndumbo sese ku ndo awawoo sipa. Ndumbo kaseo. Enii'm awake-awake ku mee tuma kaa dim pame se dimina da kusipimana awawoo naka se ku tau. Anegisemee wa'm aii se nakumawoo nai se dimina me kaa kiyoo ndo kusipimana mee kaa dama ndo yaawawoo sipa. Kiyoo kam eki mbo nde miya enii ese asiyoo kam asiyoo dama ndo kaawawoo semuu sipa.

^13-14 Dee, enii'm kaseao kan sipa mina ku mbeenaa kaa miya koo gam'maan tau. Enii'm kaseao kan sipa mina ku otuma eki'm ndamapea kapuge me nda kaawudumapa se mina waa kui. Ku yeao kana se mina se ku tau. Ku otuma eki'm dama masimaao sekii se mina waa. Ku mugo mina ku ndo kaawudumapa. Se kaawudumapa koya endo nde miya enii'm nigeke-nigeke, enii'm awake-awake ku kaa eki mbeenaa namasimake ko namasimake koya mbeenaa tau. Ku kindo enii'm sese en'ndo otuma ku kaa dama namasimapea se gumba ni'm ese dimina ona ndo kan dito naka se kao. Dee, enii'm sese ku kaa dama namasimapea kipii kindo ko enii'm ebo toke se Tuhani, Yesiusi me me, wa'm waya ukaasi gapi pakemai ndoe enii ndepo bani-bani se kan a-apaa naa-apaaa taasea. Ku se ku awaao na enii'm ese ndumbo ndo awanaa se sese ku kaa dama masimana “Mike ae,” se ku ndo nigaae.

^15-16 Kiyoo kam ni dimina ona ndo kan se nigina ko “O, ku Kodintusi bage ku ko ekii nagai aoo. Naapake nde miya aoo ae,” se kanigeo. Se kanigeke kumana waya wada nda se nigina ko “O, ni ogiyoo Makedoniya maa kaa peao gai koya me kaa peao kan peta mugo ndoe, Kodintusi okaa yoo kiyoo kita mi-kaomeduwaata. Ni, eki mbo mi-kaomedona ndo waa ko waya muuna Makedoniya maa me kaa peeta. Makedoniya maa kaa pewena ndo waa ko mi-ndagidi medona Kodintusi okaa yoo waya mi-kaomeduwaata,” se nigima. Mbao awasi na eki mbo ea wiya mi-kaomeduwee taao gai ee, enta mugo ndoe, tau. Ona me ko dama tosi na mina katupaao kan ea wiya mi-katupaao gai, me ona. Ona me ko ku se ku awamana ndo waa ko nakayoo Yudea maa me kaa waya meenkea ae se dodo ndoe, ni'm penaa se yoo maanisi na se kao nena eki'm egi nda napeyaasea na ni'm eki mbo ea wiya mi-kaomeduwee taao gai, me ona. Ku aii dodo se dodo me kaa “Ni'm se awaata, ae,” se nigima.

¹⁷ Ni'm “Se awaata,” se kasima koya waya wadobo pakemai ndoe awaan tau. Ni'm awaao kan sima ku ba-gamitama koya ni'm dimina da “Membe-pembe aoo ae,” se ku si nanigaae. “O, Paudusi wai mbutu manipi se dodo me kaa mee tuma kaa dimina ditona mbutu maneke kumana ‘Ku se ku mike awaata,’ se mina aseke koya wa'm dimina da nda koo nigeke wa-nini. ‘Tau, ku si awaata,’ se ku ndo koo nigimi, Paudusi wa ko.” Ku si nanigaae. Kodintusi bage waa woe. Ku ni'm sese tau kumana ku mugo dimina ku mike si nanigaae.

¹⁸ Dama nigi si pe taae. Anegisemee wai mbae da mina aseao sekii yee? Tau na. Wa'm sese ko wa'm “Se awaamba,” se aseke se mina ku wa ba-gamitake sekii tau. Mike awake ndo. Ku mugo yaa, enii'm kasima mina ku nde miya kui. Enii'm si awaamba kao ku kaa kiyoo “Mike awaamba ndeo,” se mina ku mbeenaa kaa miya kasiin tau. Ku kaa makapa mina mbeenaa kaa miya kasiin tau.

¹⁹ Ku kindo ko eki'm nanigina ko “O, Paudusi wai mike mina ku ndo aseao gai ee? Mbae da mina ku nde miya aseao gai ee?” se ku nanigeke kipii kindo tau de! Me bage dimina si nanigi sisea na, ni'm eduga katupiwoo sima mina ku kaa dama nigi si pe taae. Dee, eduga ko Sidasi mesema Timotiusi mesema, enii wido eki mbo mina katupeke se dodo me kaa ko Anegisemee Yombai, Yesiusi Keditusi me me, wa kaa mina katupiwoo sima. Kena Yesiusi Keditusi wa ko wa'm enii tao naawaao gai se mina ku ko ebanaa ku mike pi-naapamiyaabuu taasi se mina koya ebanaa ku wa'm aii ba-gamitaasi mina waa se ku tau. Ku otuma wa'm mike pi-pamiyaabuu taasi se mina waa ku ndo.

²⁰ Kase enta mugo ndoe, Anegisemee wa'm “Se kaa-awaata. Se kaa-awaata,” se enimi mina kuwa ku otuma Yesiusi Keditusi kaa mike pi-pamiyaabuu nai se mina waa. Ku kumana Anegisemee wa'm awaao kan sipi mina ku yegea yako “Mbeduwa,” se mina aseao kana. Me aseao kana kumana wa ekaa da ebo mbeana yapapa taao kan “Kui,” se mina ku ndo asiwoo naka.

²¹ Kena enii, eki mesema Keditusi nda dipinimagea yako Anegisemee wai enii'm dimina da waa nakusipimana takun natoyaabuu nai, me ona. Ona me ko wa tao ndanda ku yaa-awawoo sisi na wa-nini nawenimapi, me ona.

²² Ona me ko Anegisemee wai wa'm Dim'mba enii tao nemi kumana me wa'm yaa dine enii kaa namatami mugo dodo. Enii wa'm bage ae se desi na se namatami, me ona. Ona me ko enii nduwawe Anegisemee wai wa'm Dim'mba nadomaami se dodo me kaa aii se nadomaami se ku tau. Wa kaa kiyoo enii'm se nigina ko “O, Anegisemee Dim'mba me kita nemi kumana waya wadobo daa naambembo se kao ku mike niisi, ae,” se ku ndo nigaao sekii, me ona. Dee, Anegisemee wa'm dimina me membe-pembe se dimina se ku tau. Kena wa'm mina donaa asinaa se mee to ni ko ni namba wa'm sipi mugo dodo, se kaseao kan sipa.

²³ Kiyoo kam Anegisemee'm emaa misi kaa ese ndumbo mina kasiinka ndeo. Ni'm kasiinka mina ku mbae da mina kipii, kindo ko Anegisemee ku nadei yako em nadake bada ae se nigeo. Ku koya tau. Ni'm ese ndumbo kaseao kan sipa mina me ko me se de. Ni'm eki mbo, Kodintusi okaa yoo kiyoo me kaa kameen tau me ko me ni'm dime awama. Kase enta mugo ndoe, eki mbo memama waa, eki'm peu-pau awawoo nakea ku kadeo yako ese oyu kan dim kakoesi na mina kasiyaa. Ku mugo mina si kaseao kan ni dime kan mani kameen tau.

²⁴ Enii'm kaseao kan sipa mina ku dama masimaae. Dee, eki'm “Mike ae,” nigeke dimina da me maaneke se dimina. Me dimina me me eki'm magi tau kan kusipimapea se dimina. Kum seta kaa enii ko enii eki'm moo wado pakemana “Ku kaa ‘Mike ae,’ nigaae. Ku kaa nde miya ‘Mike ae,’ nigaae,” se katupaao kan sipa se ku tau. Ku si kaseke nde miya sekii. Waya na kiyaa kabani-bani siyaasi na sese ku enii eki mesema dipinimana kaawawoo taao gai, me ndo.