1 Yohanesi 1 - Anegisemee'm Mina Kapuge

Enii'm omiwoo towoo natoyaasi na se mee to Yesiusi Keditusi me me, me Yohanesi wa'm demi se mee to me kaa mina da

^1-2 Enii'm kanige-maniinka mina me ko me Yesiusi Keditusi wa kaa mina. Yesiusi Keditusi wa ko wai omiwoo towoo sisi na mina da me kaa nanige-manemi se mee to. Kena wa'm tomi yoo me ese maa nuwa, epo nuwa, ku se ku aoo kiyaan tau yoo nde miya wai Anegisemee Naamee mesema aii aoo-aoo aoo ku ndo se towoo simea. Kisena ndo waa ko Anegisemee wai omiwoo towoo natoyaasi na mee me me, me enii'm emaa misi kaa kiyoo uwa pana se naadeyaami. Ku ese mike mina kaseo. Mee me me enii'm emaa misi'm dema se mee to. Kena wa'm enimi mina ku enii'm opa'm yito sima se mina waa. Wa'm maa buboo ku enii'm yaa ku nde miya yaa-de sima se maa buboo. Dee, omiwoo towoo natoyaabuu taasi mee to me enii mbo agidimami ae, se kaseao kan sipa.

³ Enii'm Keditusi kaa dema-dema mina ku nuwa, enii'm yema-yema mina ku nuwa, ku kaa aii se kanige-maneo se ku tau. Dee, enii ko enii Anegisemee Naamee mesema, Wayombai Yesiusi Keditusi me mesema ese dadaa se enimoo. Enii ndepo ese dimina ona ndo se enimoo. Kiyoo kam enii'm kanige-maneao kan sipa mina ku kaa kiyoo eki nde miya enii mesema dipinimana enii papi enimoo kaao na se mina da kasipa.

⁴ Waya wada nda enii ndepo enii'm bani-bani se dimina me ese asiyoo kam asiyoo wa-nini kiyaao kan enii'm kapuge nda kaawudumaao kan sipa mina kui.

Anegisemee wa'm sipi mugo ao da nda tona ndumbo ndo awawoo sisi na se mina da

⁵ Enii'm kanige-maniinka mina me ko me ese Keditusi wa'm ebe kaa mina ku ndo kanige-maneao kan keo. Wa'm ebe kaa mina ku se de. “Anegisemee wa ko wai mbeenaa kaa miya woo-woo se emi tau. Kum seta kaa wa'm sese ko wai mbeenaa kaa miya tuku emi tau se mee to. Aii ao da ndo aoo se mee to.” Keditusi wa'm se nanige-manemi.

^6-7 Kena Anegisemee wa'm ndumbo ndo awawoo nai me ese ao da mugo dodo. Kena wa'm ao da me enii'm toke yoo osee naa-wake mugo dodo, enii namba wa'm sese ekokedosi na. Ku kindo wa'm osee naa-wapi ku masewena enii nde miya ndumbo ndo awake kipii kindo ko enii namba wa mesema ese enimoo kii takea, se ene. Waya wada nda Anegisemee'm emaa misi kaa enii'm si maaneke se kao en'ndo otuma ku wa'm naawise-mbeaseke. Aii se naawise-mbeaseke se ku tau. Wayombai, Yesiusi me me, wa'm emu ogayaana naatabemami kumana ku kaa kiyoo enii'm woo-woo se naawise-mbeaseao sekii. Enii ko wa'm ao da nda toke kindo. Ku koya enii ko enii woo-woo taao gai se dimina yaa mu-mu sita mugo ndoe, “Tau, ni Anegisemee mesema ese anamoo ndeo,” se aseke kipii kindo mbeduwa. Me dim dake mina. Me mugo sese me ko mee Anegisemee wa'm mike ndumbo se mina da ku dama yaa mu-mu se sese se ku tau. Me ese tuku nda toi sese mugo dodo koena.

⁸ Kena enii ko enii kaa to se asina ko “Tau. Ni mbeenaa kaa miya woo-woo taan tau se mee to,” se aseke kipii kindo ko yai, me enii kaa to deba semayaa mugo dodo. Anegisemee'm mike ndumbo se mina ku enii'm dim'mba nda kapaan tau ae, se ku ndo nigaao sekii.

⁹ Ku koya enii'm woo-woo sipa ku Anegisemee mbo uwa pana “Mike, ni woo-woo sipa,” se mina asetaake kipii kindo ko mina bota. Enii'm woo-woo se kaa mina ku wa'm aii wisin'take ndo. Waya wada nda enii wa'm emaa misi kaa dim ndumbo se bage waa ae se nakiyaao kan wai enii'm si maaneke ku en'ndo otuma ku naawise-mbeasiimbi sima. Wa'm naawaambi ku wa'm aii dodo amanimami mina kui. Ba-gamitake sekii tau. Ku wa'm ese ndumbo ndo awaao kan enii'm woo-woo se ku mike naawise-mbeasiimbi ndo. Enii'm woo-woo se ku Anegisemee mbo uwa pana aseke kindo.

¹⁰ Anegisemee wa'm se asina ko “Mee en'ndo otuma ku woo-woo se aoo,” se asimi. Wa'm se asimi kumana mee ona wai “Tau. Ni woo-woo taan tau,” se aseke kipii kindo ko yai, me mugo mina aseke me “Anegisemee wai dim dai aoo,” se asiyaa mugo dodo. Me mugo mina aseke kipii kindo ko “O, Anegisemee'm mina ku enii'm dim'mba nda mbeenaa kaa miya kapaan tau ae,” se ku ndo nigaao sekii.