1 Kodintusi 3 - Anegisemee'm Mina Kapuge

Anegisemee wa'm ndanda ku yaa-awanaa se bage waa, ekii kaa mina waa

¹ Yesiusi kaa kinaa bage waa woe. Ni'm eduga mina katupeke se dodo me kaa kiyoo eki'm sese ko me ese Keditusi nda yuwa mbee waa mugo dodo se kadema. Ku kumana ni'm katupima mina ku yuwa mbee to wa'm yeao sekii se mugo mina ku ndo katupiwoo sima. Kase enta mugo ndoe, Anegisemee Dim'mba wa guna miyo toke se bage ekii'm yeao sekii se mina ku kaseao kana. Ku eki yeao kana kaambea kumana aii mee tuma da kaa dimina me guna miyo toke se bage waa, ekii'm yeao sekii se mina ku ndo katupima.

² Ku kaa kiyoo ni'm katupima mina kuwa ku ama uwo noke se mina mugo dodo. Ese okaa namo noke se mina se ku katupaan tau. Eki ko okaa namo se mina naao kana koena. Kena endo nde miya eki'm sese dodo ndo se takea se kadeo.

³ Endo nde miya eki mee tuma kaa dimina yaa mu-mu nakea se bage waa kumana okaa mina katupaao kana. Dee, eki'm mee tuma kaa dimina yaa mu-mu nakea sese ku se de. Mina a-bade naa-bade se nde miya aoo, me ona. Ona me ko mee agumee mbeenaa ebo toke kipii, wa'm toke yoo mbeenaa dama kipii kindo ko ku kaa si yabani-baniina aii yawisineke ndo aoo, me ona. Eki'm se awatakea kumana “O, eki mee tuma kaa dimina ku ndo yaa mu-mu nakea ae. O, eki mee tuma'm sese ku ndo awawoo nakea ae,” se ku ndo kanigaao sekii, tau se?

⁴ Dee, eki ebanaa “Ni Paudusi mbaya,” se aseke. Kena ebanaa “Tau. Ni Apodosi mbaya,” se aseke. Yai, ku se ku asei se se dodo, eki'm sese ko yipi se dimina aoo se bage'm sese se ku tau. Aii mee tuma da kaa dimina me ndo aoo se bage'm sese dodo ndo awatakea, ku tau se!

⁵ Ni ma, Apodosi, anai ko ebo bage tau. Anai ko ese mbeedi se bage waa ku ndo. Anai Anegisemee wa tao wa'm ndanda yaa-awanaa se bage waa, ku ndo. Kena Tuhani wa'm nambeasipi ndanda yaa-awama se dodo me kaa kiyoo ko ana'm mina ku yemagea ndoe eki Yesiusi kaa “Mike ae,” se yanigimea. Ku kindo ko, anai ebo bage tau kasipa. Aii epota kaa bage ku ndo.

⁶ Ni'm kita mina katupima kumana ni'm sese ko iyoo weke mee to wa'm sese mugo dodo. Kena ni ogudi Apodosi wa nde miya mina katupimi kumana wa'm sese ko iyoo wemapa yoo uwo iyemoo se mee to mugo dodo. Ana'm se awama koya ana'm katupima mina ku eki'm dim'mba nda kaa-iyaabuu nai se mee to me ko me Anegisemee wa ndo. Anai se ku tau.

⁷ Ku kumana iyoo wemapi mee to nuwa, uwo iyemoo sipi mee to nuwa, ku aii mbeedi se bage waa. Anegisemee wa ndo ese ebo. Kase enta mugo ndoe, ana'm katupima mina ku eki'm dim'mba nda kaa-iyaabuu nai se mee to me Anegisemee wa ndo.

^8-9 Ku kaa ni waya kasiinka ndeo. Anegisemee wa'm bai mugo me ko me eki. Kena wa mesema masii yaamata se bage waa ku anai. Ku kindo ko wa naa iyoo weke, wa naa uwo iyemoo se koya tau. Ana papi mbaya ona ndo. Ana papi Anegisemee'm bayoo masii masiwoona ndo waa ko ana'm masii yaamata sipa ku kaa kiyoo wa'm naediisi. Wa naedeke se dodo me kaa ko otuma dodo ndo naedeke se ku tau. Dee, mee ona wai ese ebo masii maseke kipii kindo ese ebo yaediisi. Eé, mee ona wai mbeenaa ndo kipii kindo ko ku nde miya mbeenaa ndo yaediisi. Me ko me Anegisemee wa'm wa tao ndanda yaa-awapea bage waa ku pikamoona yaedeke sese, kui. Waya mina ebeabea da kasiinka ndeo. Eki ko eki Anegisemee wa'm ee mugo dodo se bage waa.

^10-11 Me mugo ee kameao kan Anegisemee wai aii se nagane kan ee meao epi se dimina da ni kaa nakumapi. Me dimina me kaa kiyoo ni eki mbo oo taa wemama. Ese ee meao epi se mee to wa'm sese mugo dodo masewena dama wemama. Ni'm ee oo taa wemama me ko me Yesiusi Keditusi. Mee agumee wa-nini oo taa wemake sekii tau. Yesiusi wa ndo oo taa, kam tau. Kena waya eki mbo Yesiusi kaa mina mi-katupitakea se bage waa ku ni'm oo taa wemapa yoo me kam wado ee metakea se bage waa mugo dodo. Ku kindo ko ni'm wetapa se ee oo taa me kam wado metakea se bage waa woe. Andimana meae. Tagu-wagu se si meae. Yesiusi mbaya bage ku Anegisemee tao ee mugo yaameao kan andimana mewoo taae.

^12-13 Kase enta mugo ndoe, anikee waa se gapi me kaa ko Yesiusi wai enii'm wa tao yaamemamea ku otuma uwa da kaa nakiyaabuu taasi. Uwa da kaa nakiyaabuu sita mugo ndoe, “O me dama awamea ae. Me peu awamea ae,” se ku napikamoo taasi. Dee, Yesiusi wa'm enii'm awamea-awamea ku uwa da kaa kiyaake sese me ko me enii'm awamea-awamea ku bidea kaa yitake mugo dodo. Bidea kaa yuwitai se gumba ndoe, ponopi kipii kindo ko “O, a'm Anegisemee tao ee yaametai se dodo me kaa ko adiga mbeedi, ponoyaao sekii se kao waa ku ndo masewena yaamemame mugo dodo. Aii piya-piya, boo-boo, yapao-yapao ku mugo kao ku kaa ndo masewena yaamemame ae,” se mugo uwa da kaa naadeyaake. Eé, bidea kaa ponaan tau kipii kindo ko “O, a'm awake ku maaneke ae. A'm memame ku eamasi oma - eamasi oma, pedaki oma - pedaki oma, edeao kana se oma waa ku nuwa, ku mugo kao ku ndo masewena yaamemame ae,” se mugo uwa kaa naadeyaake.

¹⁴ Ku kindo ko ee oo taa me kaa waya wadobo metakea ku ndamana si ponoyaake kipii kindo ko maaneke. Kase enta mugo ndoe, ese dama memami mee me me, me Anegisemee wa'm ogayo paao kan dama se kao maniisi se mee to.

¹⁵ Eé, mee'm awami ku ndamana otuma ponoyaapi kipii kindo ko tau. Wa'm awami-awami ku otuma aii bada kaasi. Dee, wa'm sese me ko me se de. Ee ona bidea yitai ndoe epomee me me, wai yoo da kaa endaaneke. Yoo da kaa endaanii se dembea ndoe, iyaao tai koya wa'm se-kao we-kao otuma ponoyaapi kidai. Yesiusi kaa tagu-wagu memami se mee to wa namba dodo kaasi. Anegisemee mesema omiwoo towoo toke ko toke koya wa'm awami-awami ku aii bada kaasi. Ku kaa dama se kao si maniisi koena. Se.

Anegisemee mbaya bage ku wa'm okaa ee mugo dodo se bage ku kaa mina da

¹⁶ Anegisemee wa'm okaa ee me ko me eki. Kena eki nduwawe toi me ko me Anegisemee wa'm Dim'mba. Ku mina ku eki eo baa.

¹⁷ Ku kindo eki ko eki aii bage waa se ku tau. Eki Anegisemee wa'm okaa ee to se bage waa. Wa'm wa kaa wa tao daa mbeana wa-nini wenimapi se ee to, eki ko. Ku kumana Anegisemee'm okaa ee se bage waa ku kaa mee ona'm si maaniyaake kipii kindo ko Anegisemee wai si maaniyaapi mee me me wa kaa namba wa'm toke yoo si yamaaniyaambi sima. Se.

Mee ogumee ku si yaapaan ndo Keditusi ndo yaapaae se mina da

^18-19 Anegisemee wa'm emaa misi kaa kiyoo ko wa kaa eo se bage waa ekii'm dim pame se dimina ku ese dim'mba tau se dimina da waa. Ku ese aii bada kaambea se dimina da waa. Ku kindo eki mbaya se mee ona wa'm nigina ko “O, mee tuma da bage ekii'm dim pame se dimina da waa ku ni epi kumana ni ese dim pame nomata se mee to ae,” se nigeke kipii kindo mbeduwa! Me dimina da me wa kaa to deba semake se dimina da mugo dodo kumana ku si nigaae. Waya na kiyaa Anegisemee wa'm emaa misi kaa dim pame nomata se mee to kisi na mee'm dim pame se dimina duwa matana Anegisemee wa'm dim pame aoo se dimina ku ndo yaa mu-mu taae. Ku ndo yaa mu-mu sita mugo ndoe Anegisemee kaa eo se bage ekii'm se kanigina ko “A ese dim kapaan tau se mee to,” se kanigaambea koya tau. “Bada o. Awas! Nanigiwee o,” se ku ndo nigaae. Ni'm kasipa mina me ko me Anegisemee'm mina kapuge nda wudumami mina mugo dodo. Dee, me nda mina ona me se asina ko “Mee'm dim pame kan awaao kan sipea ku Anegisemee wa'm kawitai yako ekii kaa mbeo pinemapea yoo mugo dodo se yaepipi se. Ekii'm dim pame kan awaao gai ku Anegisemee wa'm masewena yagadimiyaana aii bada yakiyaabuu taambi koena.” Se wudumami.

²⁰ Waya wudumami mina ona me ko me se de. “Maa kaa dim pame nomata se bage waa ekii'm se-nigemoo we-nigemoo ku otuma Tuhani wa yaepi. Ku wa yaepi kumana wa'm se nigina ko ‘Ekii'm nigeke ku otuma aii bada kaambea se dimina da waa, ae,’ se yanigii.” Anegisemee'm mina kapuge nda se wudumami.

^21-23 Ku se ku ese mike mina kumana mee tuma da kaa bage ku kaa si yaapaae. Kase enta mugo ndoe, ese asiyoo me ko me Anegisemee. Kena Anegisemee wa'm guna miyo me ko me Keditusi. Kena Keditusi wa'm guna miyo se bage waa ku enii ndepo otuma. Kena enii otuma Keditusi wa'm guna miyo toke kumana wa kaa ndo ya-apawoo taao ndo bada. Kase enta mugo ndoe, ni, Paudusi, ni nuwa, Apodosi nuwa, Petadusi nuwa, enii otuma eki kaa maanisi na se bage waa. Enii kaa napapa sisi na se bage waa se ku tau. Waya wada nda maa en'ndo otuma ku nde miya eki kaa maanisi na se maa waa. Kena eki'm toke yoo nuwa, eki'm boke yoo nuwa, endo se gumba aoo kaambea kao waa ku nuwa, anikee waa aoo kaasea kao waa ku nuwa, ku en'ndo otuma nde miya eki kaa maanisi na se kao waa. Eki otuma Keditusi wa'm bage waa koena. Ku kumana mee ogumee kaa si yaapaae. Keditusi wa kaa ndo ya-apawoo taao ndo bada.