1 Kodintusi 16 - Anegisemee'm Mina Kapuge

Ogu Yesiusi mbaya bage tao uwani aii se manisi na se mina da

¹ Endo ko Anegisemee wa'm bage ku kaa ku tao manisea na se uwani, ekii tao uwani yaawenei sisea na mina kuwa, ku kaa mina katupaanka. Eduga ko ni Gadasiya maa kaa andagatagea se Yesiusi mbaya bage ekii mbo “Uwani wenei taae,” se mina yatupima. “Uwani wenei taae,” se yatupima mina kuwa endo eki Kodintusi bage eki namba dodo ndo awaae.

² Ni'm Gadasiya bage mbo yatupima mina me ko me se de. Min'gu ona omana ese eduga edugana gapi me kaa ko eki'm uwani naa ku wa-nini wenimana bai-bai taae. Eki otuma Hadi Min'gu gapi pakemai ndoe se awawoo taae. Eki'm min'gu ona kaa masipea uwani ku oba masipea kipii kindo ko oba bai-bai taae. Mbeenaa ndo kipii kindo ko mbeenaa ndo bai-bai taae. Se awawoo taae. Kase enta mugo ndoe, ni eki mbo ukimana ndo waa ko bai-bai se ni be. Ku taa kisi na, ni tau yoo bai-bai siwoo taao ndo bada.

³ Ku uwani ku aii dodo bai-bai siwoona ndo waa ko ni eki mbo ukaata. Eki mbo ukimana ko eki'm aii se maneao gai se uwani kuwa ku dopeana ogiyoo Yedusedem okaa yoo togea se bage pi-manisi na eki'm yapeyaao kan sipea bage ku ni'm yapeyaata. Aii se yapeyaake se ku tau. Ni'm wudumapa kapuge ona me nde miya yamatana yapeyaata. Me Yedusedem okaa yoo togea se bage ekii ndamasi na se kapuge. Me mbao kaa nigi sisi na se kapuge ee? Tau. Ku kayoo kam mepea bage waa ee? Ekii'm nepea uwani ku kayoo kam do-mena nepea uwani waa ee? Ku mina ku ogiyoo Yedusedem bage ekii dama masimasi na uwani dosi na bage yapeyaata mugo ndoe me mugo kapuge me nde miya yamatana yapeyaata.

⁴ Eé, “Paudusi namba ekii mesema pei waa bada ae,” se nanigeke kipii kindo ko me nde miya bada. Enii ndepo peao ndeo. Se awaata.

Paudusi wai Kodintusi bage mbo mi-omiwee taao gai se mina da

⁵ Ni ko ni eki mbo mi-kaomiwee taao gai koya eki mbo ukaan tau yoo ogiyoo Makedoniya maa me kaa kita penaa taao gai. Makedoniya maa me nda penaina eki mbo memaata.

^6-7 Eki mbo memana ko mani mi-kadewena waya muuna penaa se se ku ni be. Ni eki mbo onu oba omiwee taao gai. Ku kumana eki mbo memana ko eki mesema mbeenaa oba omiweena odibi se gumba ku nde miya eki mesema omiwoo towoo taao gai. Ku koya Tuhani wa'm gai-gai ku ndo awaata. Ni'm eki mbo mi-omiwee taao gai me ko me kase enta mugo ndoe, ni'm wadobo peeta yoo si nige-neke koya ni'm medaa peke yoo maanisi na se kao ku nena eki'm egi nda mugo napeyaasea na ni eki mbo kita mi-omiwee taao gai.

⁸ Ni eki mbo mi-omiwee taao gai koya Pentakoseta Badii naan tau yoo me kaa miyo si meemba. Epesiusi okaa yoo nakayoo ndo omiwee taamba.

⁹ Kase enta mugo ndoe, Epesiusi okaa yoo me kaa kiyoo mbeedi nambeaseao gai se bage waa ku oba aoo ko aoo koya tau. Anegisemee'm mina yaa-eniwoo taao sekii se gine to me Anegisemee wa'm naawademapi kumana nakayoo kam mani peao be. Wa'm naa-awapi ku kaa kiyoo ni'm awake-awake ese mike maan'dai taambi ae, se nigeo yako mani si meemba.

¹⁰ Timotiusi wa ko wai Tuhani tao ndanda yaa-awanaa se mee to. Ese ni'm sese awanaa se mee to mugo dodo. Ku kumana wai eki mbo kaukaasi se dodo me kaa ko wa kaa widaasi na se kao ku si yaawaae. Wai eki mbo widigi tau tosi na dama ndo yaawaao ndo bada.

¹¹ Ku kaa kiyoo yawisinaao gai se mee to aoo kipii kindo ko “Ku tau de! Tau de!” se mina ku mani yayaamaae. Kena Timotiusi waya ni mbo meao kan meenki ae se dodo me kaa widigi tau mesi na eki'm egi nda mugo naameyaae. Dee, wa nuwa, wa mesema penaa se se Yesiusi kaa kinaa bage waa ku nuwa, ekii'm ukaasea yoo ku ni dito naka kumana dama ndo naameyaae, wai dama widigi tau kan ni mbo mesi nde.

¹² Kena eniikinaamee to, Apodosi me me, wa kaa mina me ko me se de. Eduga ko ni wa mbo ese oyu kan se asina ko “Ai, ogu Yesiusi kaa kinaa bage mesema pedona ogiyoo Kodintusi bage mbo pi-deweae!” se asima. Ni oyu kan se asima koya aii bada ndo. “Endo ko peao be,” se nasimi. “Anikee waa maaneke se gumba pakemai se gumba ndoe ekii mbo pi-omiwee taata nde,” se nasimi, Apodosi wa ko. Wa kaa mina ku ndo kaseao kan sipa.

Kodintusi bage kaa “Se awagea waa bada ae,” se mina da

¹³ Endo ko ni oyu mina kasiinka ndeo. Si kamaaniyaambea kao waa ku oba aoo kumana dimina wodonina dama dito taae! Mbugu tau se dimina me ndo yaa mu-mu taae! Anegisemee kaa oyu kaae! Kena enii'm Anegisemee kaa “Mike ae,” nigeke se mina waa ku kaa kusipimana magi tau ndo se towoo taae!

¹⁴ Kena eki'm awake-awake ku otuma mee kaa yaembaake kan awawoo taae.

¹⁵ Akaya maa me kaa kiyoo ese eduga edugana Keditusi kaa “Mike ae,” se nigimamea se bage waa ku Sepanusi sepao. Sepanusi sepao ekii “Mike ae,” se nigimana dai kaa waa ko ekii Anegisemee wa'm bage ku tao maanisi na se ndanda ku ese dimina ona ndo kan yaa-awawoo semuu nakea. Ekii'm sese ku eki eo baa. Ku kindo ko nikinaa bage waa woe. Ni'm ese oyu kan kaseao gai se mina me ko me se de.

¹⁶ Sepanusi sepao nuwa, ekii'm sese mugo dodo awatakea se bage waa ku nuwa, ku mugo bage waa ekii'm guna miyo dama towoo taae. Kena ogu Anegisemee kaa ndanda yaa-awanaa se bage waa ku namba ku guna miyo towoo taae. Ku bage kuwa ekii oyu kan ndanda yaa-awanaa se bage kipii kindo ko ku mugo bage otuma ekii'm guna miyo nde miya dama towoo taae.

¹⁷ Eki Kodintusi bage ko eki nakayoo ni mbo emi tau kumana dimina nakumake sekii tau. Dimina nakumaao kana koya eki mbo kam memapea ku ko Sepanusi ma, Potunatusi ma, Akaikusi ma, ku wido kuwa ekii eki mbo kam ukimagea ndoe ni ko bani-bani se aoo. Ku Kodintusi bage eki kumo-kumo kumatana dimi natakuniyaabuu sipea koena.

¹⁸ Eki kumo-kumo dimi natakuniyaagea yako ni nuwa, Kodintusi bage eki nuwa, enii otuma dimina etaa nakiyaagea. Ku kumana ku ekii wido ku kaa nuwa, ku inda-banda matana awawoo nakea se bage waa ku kaa nuwa, ku mugo bage ku kaa “Paowaa! Awankea, awankea!” se yaenei taao bada.

Kodintusi bage mbo “Aba, aba,” se asimi se mina waa

¹⁹ Asiya maa me kaa kiyoo Yesiusi kaa andagatagea se yoo oba aoo. Ku nda andagatagea se bage ekii “Aba, aba,” se kasigea. Kena Akawida mesema wa'm ambii Pedisikida mesema, akaa'm ee nda andagatagea se Yesiusi mbaya bage waa ku nuwa, ku ese, ese kagai kan “Aba, aba,” se kasigea.

²⁰ Kena ogu Yesiusi kaa kinaa bage waa ku otuma ku nde miya “Aba, aba,” se kasigea. Kena ogu Yesiusi kaa eniikinaa bage mesema ade se se dodo me kaa ko “Aba, aba,” aseao kan ku otuma yaembaake kan poko kaa ebe a-dudu taae.

²¹ Me kapuge me ko me mee agumee'm ni'm mina masewena ni tao naawudumapi se kapuge. Ku koya endo ndo ni'm “Aba, aba,” se kaseao kan sipa mina ku ko ku ni, Paudusi, ni yaa'm kaawudumeo.

²² Kena Tuhani kaa si yaembaake se bage en'ndo otuma ekii'm moo kaa kiyoo omiwoo towoo em yadasi na aya yadotaai waa bada, se nigeo. Ku awasi na “Madanata!” se nigeo. “Madanata,” se mina aseke me ko me “Enii'm Tuhani, mani mee!” se asiyaa mugo dodo.

²³ Tuhani Yesiusi, wai aii se dama katoyaabuu nai waa bada ae, se nigeo.

²⁴ Enii ndepo Keditusi Yesiusi nda dipinimagea yako ni'm dimina ekii mbo aoo. Ku kaa kiyoo ese kaembaawoo semuu naka sima. Ni, Paudusi, ni'm mina se naa aoo!