Yakop 3 - 阿美語聖經-新約附詩篇箴言

'Meten ko Sma no Tireng

¹ Salikakaaw ako, aka ka 'aloman kamo a malasingsi. Nawhani mafana' kita to nika caay ka kahmaw ko piliclic titaanan o malasingsiay.

² So'linay adihay ko patlac no mita a ma^min. O caay ka patlac ko sowal a tamdaw i, o masongila'ay a tamdaw, o paka'metay to tireng ningra a ma^min.

³ Papitooren ako to faloco' ako ko ^fa ano saan kita i, pakadangen ita ko ngoyos nira. Ta ma^deng kita a misasiwasiwar to tireng nira.

⁴ Haratengen ko lonan. Wata: ko nika tata'ang no tireng nira. Ano mackrokroh no tata'angay a fali i, ma^deng a masiwar no mamangay a sawihawih a papihaklong to faloco' no miwihawihay a tamdaw.

⁵ Malcad tonini ko sma. Talacowa miming cinira i, tata'ang ko dmak nira. Haratengen ko namal. Talacowa miming cinira i, mailoh nira ko tata'angay a kilakilangan.

⁶ Malcad to namal ko sma, o kasadakan no tatiihay a dmak no hkal. O ccay no i tirengay ita cinira. Nikawrira, pa'oningen nira ko tireng ita a ma^min. O namal no pisemseman ko milikatay ciniraan. O miilohay cinira to 'orip ita a ma^min.

⁷ Ano masamaamaanayto a 'a'adopen ato 'ayam ato manafoyay i sra ato ma'oripay i riyar i, mafilo no tamdaw a papinanam. So'linay, mapananamayto no tamdaw konini a ma^min.

⁸ Nikawrira, awaay ko pakafiloay a tamdaw a papinanam to sma. Nawhani caay ko mamafo'ot a tatiihay cinira. Matomes no mipatayay to tamdaw a sawarak cinira.

⁹ O sma ko sapipahmek ita to Tapang a Wama ita i kakarayan. O romasato, o sma ita ko sapi'kak ita to niparingian no Kawas to tireng Ningra a misanga' a tamdaw.

¹⁰ Oyananto a ngoyos ita ko sapipahmek ato sapi'kak ita. Salikakaaw ako, caay ka nga'ay a matira ko dmak ita.

¹¹ Caay ka sadak ko ko^sanay a nanom ato 'angreray a nanom toyanan a nemnem.

¹² Salikakaaw ako, caay ko cacihci ko sokon a kilang to hci no olif. O romasato, caay ko cacihci ko fadisoso' to hci no sokon. Malcad tonini, caay ko mamasadak ko ko^sanay a nanom i kahciday a nemnem.

O nai Kakarayanay a Taneng

¹³ Ira i tamowanan ko citanengay ato mafana'ay a tamdaw haw? Ano ira i, o pipatiri' ningra tonini i nga'ayay a dmak pakayni i nika damsay no faloco' ningra ato nika citaneng ningra ko nga'ay.

¹⁴ Ano ci'inap, ci'intel, misatked kamo i, aka ka lata'ang kamo to nika citaneng namo. Ano haenen namo i, o misamangahay, o mipacoliay kamo to so'lin.

¹⁵ Caay ko nai kakarayanay ko hatiraay a taneng. O no hkalan, o no tamdawan, o no palafoay korira.

¹⁶ Nawhani ano ira ko ma'inapay ato misatkeday a faloco' i, ira ko rawraw ato masamaamaanay a tatiihay a dmak.

¹⁷ Nikawrira, iraay o micidekay a tadamaanay a nai kakarayanay a taneng, o makoracay, do^do i, o parihadayay, o damsayay, o halipa'ayaway, o matomesay ko sini'ada, cihci to makadofahay a nga'ayay a dmak, o caay pisakakinih, o caay pisamangah.

¹⁸ O nano mifolsakan to pararihadayay ko sakacihci to mo^celay, o mo^celay a dmak ko hci no pararihadayay a tamdaw.