Titus 3 - 阿美語聖經-新約附詩篇箴言

O Wayway no Mitooray

¹ Papihaklongen ko nidipotan iso a salikaka to mikowanay a tamdaw a papitoor. Ta lonok o sasaan cangra a matayal to masamaamaanay a nga'ayay a dmak.

² Aka pilokes to tao. Aka ka cacoli. Ka o mararihadayay kamo. Ka o damsayay ko faloco' namo to sakipolong no tamdaw.

³ Nawhani nano maapaay kita, o pacoliay, o moraraway, o koli no masamaamaanay a 'anof ato acang kita. Sahto o tatiihay, o mapodohay ato masasi'intelay ko pinangan ita a ma'orip i ti:yaho.

⁴ Nikawrira, yo patalahkalto ko Pa'oripay titaanan a Kawas to sida'it ato olah Ningra i,

⁵ pa'oripen Ningra kita. Onini i, caay ko nano nika mo^cel no dmak ita. O nano adayay Ningra pakayni i nipihofoc ato nipipafli no Fangcalay 'Adingo titaanan to fa^lohay a 'orip a misawsaw.

⁶ Pakaynien no Kawas ci Yis Kristoan o Pa'oripay titaanan ko pipafli tonini a Fangcalay 'Adingo i titaanan a palmed.

⁷ Ta pakayni i mikomi Ningra a manga'ay kita a malayap no Kawas. Ta malamamilayap kita to kacifaloco'an ita a mida'ocay a 'orip.

⁸ O papaso'linen konini a sowal. Saka, mangalay kako to pipa'icel iso tonini a dmak. Ta malalok ko paso'linay to Kawas a tamdaw a misa'icel to nga'ayay a dmak. O fangcalay, o sakaci^poc no tamdamdaw konini a dmak.

⁹ Liyasen ko maapaay a nika laliyaliyang no tamdaw ato kimad to pakayniay i rayray no tato'asan ato nika cacolicoli ato tao ato nika laliyaliyang no tamdaw to pakayniay i Rikec. Awaay ko ^poc to matiniay a dmak.

¹⁰ O palowaday a tamdaw to sakalacinowas no sa'opo no mitooray i, sowalen to kinaccay ano ^ca i, kinatosa. Ano caay pitngil cingra i, akato pikihar cingraan.

¹¹ Mafana' kiso to nika o tatiihay ko matiniay a tamdaw. O raraw ningra ko pawacayay to nika o moraraway cingra.

O Sapaikor a Limo'ot

¹² Ano ocoren ako ci Artimas ano ^ca i, ci Tikikus a patayra i tisowanan i, ano mama^deng kiso i, katayni i Nikopolis. Nawhani maktonto ko faloco' ako to sakaitiraaw ako tonini a kasi^nawan.

¹³ Ano mama^deng kiso i, patonoen ko rakat ni Apolos atoya pasifana'ay to Rikec a tamdaw ci Cinas. Hapinangen ano o maan ko kacango'otan nangra.

¹⁴ O papasifana'en ko salikaka no mita to sakalalokaw nangra to nga'ayay a dmak a mipadang to kacango'otan nangra to sakaci^pocaw no 'orip nangra.

¹⁵ Nga'ayho saan i tisowanan ko kapot ako a ma^min. Nga'ayho han a paratoh ko maolahay tamiyanan a miti'eray ci Kristoan a salikaka. Nanay, mapaini no Kawas kamo a ma^min to mikomi!