Titus 2 - 阿美語聖經-新約附詩篇箴言

O So'linay a Sifana'

¹ Nikawrira, ka o matatodongay i so'linay a sifana' ko sasowalen iso a pasifana'.

² Pa'icelen ko mato'asay a fa'inayan a papisatamdaw to faloco' nangra, papisinanoten, papina'onen cangra, papisongila'en cangra to piti'er nangra ci Kristoan ato olah ato kodaitay a faloco' nangra.

³ Haenen ko pipa'icel to mato'asay a fafahiyan a papilcad to fangcalay ko dmak a fafahiyan. Aka papilikafen, aka palakolien no ^pah cangra. Papipasifana'en cangra to nga'ayay a dmak.

⁴ Ta ma^deng cangra a pa'icel a somowal to ka^mangayho a fafahiyan a papiolah to fa'inay ato wawa nangra.

⁵ Papina'onen cangra a papi'imer to tireng a makorac, pakalaloken cangra a matayal to no loma' ato nga'ayay a dmak to saki tamdaw, papitooren cangra to fa'inay nangra, ta caay ka lokes ko sowal no Kawas.

⁶ O romasato, haenen ko pipa'icel to kapah a papina'on.

⁷ Ka o mamalopi'arawan nangra kiso i masamaamaanay a dmak. Ka o so'linay a faloco' ato masinanotay ko faloco' iso a pasifana'.

⁸ Ka o masongila'ay a sowal ko sapasowal iso. Ta awaay ko lalikafen no misa'adaay titaanan. Ta mapakangodo cangra.

⁹ Papitooren to tapang nangra ko koli. Papipalipahaken cangra to tapang nangra i masamaamaanay a dmak. Aka papipacolien cangra.

¹⁰ Aka papitakawen cangra. Papipatiri'en cangra to masongila'ay a so'linay a dmak. Ta pakayni i nga'ayay a dmak nangra a ma^min a makahmek no tamdaw ko sifana' to pakayniay i Pa'oripay titaanan a Kawas.

¹¹ Nawhani mapatalahkalto no Kawas ko mikomi Ningra a pa'orip to polong no tamdaw.

¹² Onini a mikomi ko sakafana' ita i hkal a mafana' a mipa^deng, mina'on a mo^cel ko dmak ato sakanga'ay ita a makorac ko 'orip,

¹³ i tini i pitala ita to kahalamhaman ita a kalmedan a romi'ad, oya katalahkalan no tadamaanay a Kawas ato Pa'oripay titaanan a Yis Kristo.

¹⁴ Kinafalah ci Kristo to tireng to saki titaanan a malasapatfoc to sapipaliyasaw titaanan nai masamaamaanay a tatiihay ato sapikoracaw Ningra titaanan a palacidek a palafinawlan Ningra a pakalalok to nga'ayay a dmak.

¹⁵ Aka paska kiso a somowal tonini a dmak a pa'icel a misalof to tamdaw. Aka ka o kacangalan no nimanima kiso.