Titus 1 - 阿美語聖經-新約附詩篇箴言

¹ O malatarokosay ni Yis Kristo a koli no Kawas ci Pawlo kako. O sakatahidang ako a malatarokos i, o papa'icel to piti'er no nipili'an no Kawas a tamdaw. O mamikrid kako i cangraan a pasifana' to matatodongay i piti'eran ita a so'lin a sifana'.

² Onini a so'lin i, o kacipinangan a kacifaloco'an ita to mida'ocay a 'orip. Saka, ira konini a sifana'. O nano nisowalan no caay pisamangah a Kawas i 'ayaw no satapangan no hkal konini a mida'ocay a 'orip.

³ Itiya i nipatonekan no Kawas a romi'ad a mapatalahkal konini i tini i sowal Ningra. Mapaconohto i takowanan konini a sowal. O nano limo'ot no Pa'oripay titaanan a Kawas ko sakapipatnak ako tonini.

⁴ Titusaw, patilid kako i tisowanan i matini, o malcaday ko piti'er a so'linay a wawa ako. Nanay, mapaini no Wama a Kawas ato Pa'oripay a Kristo Yis ita kiso to mikomi ato rihaday!

O Tayal ni Titus i Kriti

⁵ O sakapisiday ako i tisowanan i Kriti i, o sapilahciaw iso a milosimet to caayho ka lahci a dmak ato sapatirengaw iso to ciwlo i kasaniyaroaro'. Haratengen ko sowal ako i 'ayaw.

⁶ O mamalaciwlo i, o awaay ko tatoro'en a raraw, o ccayay ko fafahi, o paso'linay ko wawa, o caay ka cilikaf to macilasay ato pacoliay ko wawa.

⁷ Tona o kakridan no kiwkay cingra, o matayal no Kawas. Saka, o awaay ko tatoro'en a raraw a tamdaw, o caay pisatakaraw, o caay karakter, o caay ka hali^pah, o caay ka tomay, o caay ka 'anof to payso,

⁸ o halilafangay, o maolahay to nga'ayay, o mina'onay, o mo^celay, o fangcalay, o paka'metay to tireng ko mamalokakridan.

⁹ O mama'imer cingra to papaso'linen a sowal, oya matatodongay i sifana' a sowal. Ta ma^deng cingra a pasifana' to tao to so'linay a sifana'. O romasato, ma^deng cingra a misalof to moraraway a dmak no pacoliay a tamdaw.

¹⁰ Nawhani 'aloman ko miliyangay a tamdaw, o somowalay to caay ka ci^poc a sowal, o misa'fitay to tamdaw. Oya saca a mitooray to krit a lisin ko mihaenay.

¹¹ O 'a'meten ko nika somowal nangra. Nawhani o ma'anofay cangra to payso. Saka, pasifana' cangra to caay ko papasifana'en a sowal. Pakayni tonini a maparawraw ko polong no lomaloma'.

¹² Sowal sa ko ccay a pali'ayaway to sowal a Kriti ito a tamdaw. <> saan.

¹³ So'linay konini a sowal. Orasaka, aka samadahen ko nika somowal i cangraan to sakatanektek no piti'er nangra ci Kristoan

¹⁴ ato saka^caaw pasayra nangra i awaay ko ^poc a kimad no Yutaya a tamdaw ato limo'ot no misiikoray to so'lin a tamdaw.

¹⁵ O tingalaway ko faloco' a tamdaw i, o makoracay ko kalomaamaan a ma^min saan ko harateng nangra. Nikawrira, o ma'oningay ko faloco' ato caay paso'lin to Kawas a tamdaw i, awaay ko ccaccay aca a makoracay a harateng nangra. Nawhani o mapa'oningayto ko nga'ayay a faloco' ato harateng nangra.

¹⁶ Mafana' kami to Kawas ano saasaan cangra a somowal, nikawrira, o no mafokilay to Kawas ko dmak nangra. O katliian cangra, o pacoliay. Awaay ko ^poc nangra a midmak to nga'ayay.