Taneng 4 - 阿美語聖經-新約附詩篇箴言

O Sakaci^poc ko Taneng

¹ Wawaaw, pitngil to sifana' no wama namo, sarocoden ko faloco' a milayap, ta mafana' kamo.

² O nga'ayay a ma^min ko nipatorodan ako a sifana' i tamowanan, pakifaloco'en a ma^min.

³ Yo ka^mangho kako, o kaolahan a dengan a wawa no wama ato wina ako kako.

⁴ Pasowal sa ko wama ako a pasifana' i takowanan. <

⁵ Pikilim to taneng ato fana', aka pitawal, aka pisakahmaw to sowal ako.

⁶ Aka pifalah to taneng, ta dipoten nira kiso, ano maolah kiso to taneng i, dipoten nira kiso a parihaday.

⁷ O pilongoc to taneng ko sakakaay a dmak, ka o polong no dafong iso ko sapifalic a miala to fana'.

⁸ Ano maolah kiso to taneng i, palahcien no taneng ko dmak iso, salimlaen ko taneng ta palatadamaanen no taneng kiso.

⁹ O mamaloma'dilay a tamohong i fongoh iso ko taneng,>> saan.

¹⁰ Wawaaw, pitngil to sowal ako, ano ma'imer kiso to sowal ako i, o kako'daw ko mihcaan iso a ma'orip.

¹¹ Mahrekto kako a pasifana' i tisowanan to lalan no taneng, o mamikrid i tisowanan a romakat i mo^celay a lalan no 'orip no tamdaw.

¹² Ano mafana' kiso a mido^do i, caay ka polin ko rakat ato cikay iso.

¹³ Pakifaloco'en a mararid ko minanaman iso, o nilayapan iso a sifana' i, o sakaci'orip iso.

¹⁴ Aka ka romakat to lalan no tatiihay a tamdaw, aka pinanam to pinangan no tatiihay a tamdaw.

¹⁵ Liyasen ko tatiihay, aka pitoor i cangraan, deng o no miso a lalan ko do^doen, aka pikihatiya a mikapot to kaackan.

¹⁶ Ano caay pidmak to tatiihay a dmak ko mari'angay i caay ka ala ko fafoti'en nangra.

¹⁷ Kala kakaenen han nangra ko tatiihay a dmak, kala ^pah han nangra ko piforifor.

¹⁸ O lalan no mo^celay a tamdaw i, matiya o ta^ngad to kaniharan, ta^ngad a ta^ngad a matdi tangasa i kalahokan.

¹⁹ O lalan no tatiihay a tamdaw i, sato'man sa a matiya o rawdengan, mapolin cangra i, caay ka fana' to nika o maan ko katahafikodan nangra.

²⁰ Wawaaw, pina'on a mitngil to sowal ako, do^doen ko sifana' ako.

²¹ Aka ka palasaken ko sowal ako, pakifaloco'en a mitilid i faloco' iso.

²² Nawhani ano marpet iso konini i, o saka ci'orip ato saka tanektek no tireng iso.

²³ Pina'on to niharatengan ato nisafaloco'an iso, nawhani nai nisafaloco'an iso a masadak ko pinangan no 'orip iso.

²⁴ Aka pasowal to caay ko so'linay a sowal, aka pasowal to mangah a sowal.

²⁵ Songila'en ko pinengneng a pasi'ayaw, aka pici'koy a matoled.

²⁶ Parayasen ko rarakaten a lalan iso, ta tanektek ko polong no rakat iso.

²⁷ Falahen ko tatiihay, pamo^cel han a pasi'ayaw a romakat, aka piliyas to mo^celay a lalan.