Taneng 30 - 阿美語聖經-新約附詩篇箴言

O Taneng ni Akur

¹ O taneng a sowal ni Akur o wawa ni Yaki, mahaenay ko sowal ningra ci Itiil aci Ukal.

² Matiya o pina'orip kako, caay ka matiya o tamdaw, awaay ko no tamdawan a taneng ako.

³ Caayho pinanam kako to taneng, caayho ka fanafana' kako to pakayniay i tadamaan no Kawas.

⁴ Cima ko tayraay i kakarayan ta malikelon? Cima ko pakarpetay to fali? Cima ko mipopotay i kiradom to nanom? Cima ko patirengay to salawacan no sra? Cima cingra? Cima ko ngangan no wawa ningra? Mafana'ay kiso haw?

⁵ So'linay mido^doay ko Kawas to niktonan Ningra a kahaccaccay a sowal, matiya o sapatada Cingra a midipot to miti'eray i Cingraan a tamdaw.

⁶ Ano mitongal milowan kiso to nisowalan Ningra i, makapo'i Ningra kiso a mitoro' to nika o misamangahay a tamdaw kiso.

O Romaroma a Taneng a Sowal

⁷ Kawasaw, ira ko tosa a dmak to lalongocen ako, nanay palahcien Iso i 'ayaw no nika patay ako.

⁸ Aka papisamangahen kako, aka palapakosiyaen, aka padafongen kako, patatodong han ko saka'orip aca ako a kakaenen.

⁹ Ano cirafas kako i, latek misafokil kako i Tisowan, <> a saan. Ano cango'ot kako i, latek mitakaw kako, mapakangodo ako ko ngangan no Kawas.

¹⁰ Aka pilikaf to koli no tawki, ano caay haenen iso i, ma'kak a matfoc kiso.

¹¹ O roma a tamdaw i, mi'kak to wama no tireng, caay ka fana' a miahowid to wina nangra.

¹² O roma a tamdaw i, makoracay kako saan, 'arawhani maldef no kaackan ko tireng ningra.

¹³ O roma a tamdaw i, o masongila'ay a makapahay kako saan a misatakaraw.

¹⁴ O roma a tamdaw i, hato 'idoc ato fonos a matalem ko wadis, mikari'ang a mi'afas to pakosiya a tamdaw, ta'moden ningra ko awaay ko palawinaan a tamdaw to saka'orip ningra.

¹⁵ Ira ko tatosa a fafahiyan a wawa no widi, o ngangan nanira i, <> sanay. Tolo ko caayay ka rahker, halo o caayho ka pasowal to <> sanay i, saspat to a mapolong, oya

¹⁶ kaitiraan no mapatayay, o ma'asicay a fafahiyan, o makdalay awaay ko 'orad a sra ato midapdapay a caay ka padeng a namal.

¹⁷ O miloksay a matawa to wama ato mi^pecay pacoliay to mato'asayto a wina i, o mamakaen no 'alilis, o dadicohen no palang ko mata ningra.

¹⁸ Ira ko tolo a pakakmoday a kafokilan ako, halo o caayay kafilo ako a mafana' i, ma^deng spat, oya

¹⁹ o ka^fer no 'alilis i kakarayan, o kanafoy no 'oner i kafkang no 'ongcoy, o karokamakatan a lalan no tamina i riyar, o kasasiolah no fa'inayan ato fafahiyan.

²⁰ O kangodoan ko dmak no ma'otitay a fafahi, maharek cingra a ma'odang i, mayno' cingra, sowal sa, <> saan.

²¹ Tolo ko mingiyangiay to hkal, spat ko caayay ko mamafilo no sra, oya

²² o kalahongti no koli, o kafcol no maapaay a tamdaw,

²³ o kaciramod no ka'osian a fafahiyan, maclol no fafahiyan a koli ko fafahiyan a tawki.

²⁴ Ira i hkal ko spatay a fao to mimingay ko tireng, nikawrira, tadamatanengay, oya

²⁵ talacowa miming ko kakonah, nikawrira, mafana' a misoped to kakaenen i kacidalan.

²⁶ Caay ko ki^melay ko koyo, nikawrira, misanga' to loma' i 'ongcongcoyan.

²⁷ Awaay ko hongti no riri', nikawrira, mafana' a marayaray a masakapokapot a mahadak.

²⁸ Ma^deng a marpet no tamdaw ko fatektekay, nikawrira, maro' i loma' no hongti.

²⁹ Ira ko tolo a kasenengan ko karomakat, halokakasenengan ko rakat i spat to a mapolong, oya

³⁰ o saki^melay i polong no 'a'adopen, o awaay ko katalawan a layon,

³¹ o okang a siri, o tangalawan a koko', ato marariday a pakalowid a hongti.

³² Ano maapa kiso a misatakaraw, ano ^ca misafaloco' to tatiihay i, sinanoten ko faloco' a misaharaterateng.

³³ Ano htecen ko hacol i, masadak ko simal, ano skongen iso ko ngoso' no tao i, masadak ko rmes, malcad tonini, ano makter kiso i, mapalowad ko kacacolicoli.