Taneng 3 - 阿美語聖經-新約附詩篇箴言

O Sapalimo'ot to Kapah

¹ Wawaaw, aka pitawal to sifana' ako, pakifaloco'en ko sifana' ako.

² O sakarihaday iso to romi'ami'ad ko sifana' ako ato sakako'daw no 'orip iso.

³ Aka piliyas kiso to mo^celay so'linay a dmak, ca'dongen i li'el iso, tiliden i faloco' iso konini.

⁴ Ano haenen iso i, o kaolahan no Kawas ato tamdaw kiso.

⁵ Sarocoden ko faloco' a miti'er to Tapang. Aka piti'er to fana' iso.

⁶ I masamaamaanay a dmak iso i, pasayraen i Tapang ko faloco' iso. Ta pasifana'en Ningra kiso to mo^celay a lalan iso.

⁷ O citanengay kako aka ka saan kiso, deng o pita'ong to Tapang a ccay ko nga'ay, liyasen ko tatiihay.

⁸ Ano haenen iso i, matiya o mialaay kiso to nga'ayay a sapaiyo. O sakaadah no doka' iso, o saka^caaw pisemsem iso konini.

⁹ Alaen ko safangcalay a kinaira no omah iso a pacakat to sapahmek to Tapang.

¹⁰ Ano haenen iso i, o mamatomes ko 'ariri iso to panay. Caay ko mama^deng ko koreng iso to piparoan to fa^lohay a ^pah.

¹¹ Wawaaw, aka pisakahmaw to nipipalatamdamdaw no Tapang i tisowanan ato aka pisakatalifokil to pipakmel ningra.

¹² Nawhani toro'en no Tapang ko raraw no kaolahan Ningra a tamdaw, matiya o pitoro' no mama to raraw no kaolahan ningra a wawa.

¹³ O pakakilimay to taneng ato pakatamaay to fana' a tamdaw i, o malmeday.

¹⁴ Ikaka no ^kim ato tada^kim ko nika ci^poc no taneng.

¹⁵ Ikaka no odo' ko nika ci^poc no taneng. Ano o maamaanto a kangalayan iso a dafong i, awaay ko mama^deng a sapasasotiri' tonini.

¹⁶ O sakakakaya' no 'orip iso ko nika citaneng iso. O romasato, o sakacidafong iso a malatadamaanay.

¹⁷ O sakalipahak ato sakarihaday no 'orip iso ko nika citaneng iso.

¹⁸ O mido^doay to taneng a tamdaw i, o malmeday. O mamalosakaci'orip a kilang ningra kona taneng.

¹⁹ Pakaynien no Tapang i taneng Ningra ko nipisanga' to hkal, pakaynien Ningra i fana' Ningra ko pipatli a patireng to kakarayan.

²⁰ Pakaynien Ningra i fana' Ningra ko sakaromakat no nanom i 'alo, tfaden Ningra ko 'o'ol nai kiftolay a to'em.

²¹ Wawaaw, ka'imeren ko taneng ato fana' iso, aka papilaliwen cinira.

²² Ta o mamalosaka^res no li'el iso, o sakarihaday ato sakalipahak no 'orip iso canira.

²³ Rihaday ko rakat iso i lalan, caay ka tahastol a mapolin kiso.

²⁴ Marihaday ko kati'nang iso i kafoti'an awaay ko katalawan, foti' saho kiso, tangasa i kata^ngadan.

²⁵ Aka ka talaw to talifahal sanay a ira a pades, oya matiyaay o faliyos a miforifor a tayni a tatiihay a tamdaw.

²⁶ Nawhani, o dadipoten no Tapang kiso a parihaday, caay ko tatfaden Ningra kiso i talakal.

²⁷ Sa'icelen a midmak to nga'ayay, padamaen ko papadamaen a tamdaw.

²⁸ Ano ira ko 'icel iso i matini a mipadama to fiyaw i, aka tahacilaen a papitala cingra.

²⁹ Aka piri'ang kiso to fiyaw iso, paso'lin cingra i tisowanan saka, i ngata iso cingra a maro'.

³⁰ Ano caay pikari'ang ko tao i tisowanan i, padteng aka ka saan a macacoli ato cingra.

³¹ Aka ka 'inal to mari'angay a tamdaw, aka pitodong to dmak ningra.

³² Nawhani ma'osi ko Tapang to tatiihay a tamdaw, ingiden Ningra ko mo^celay a tamdaw.

³³ 'Kaken no Tapang ko loma' no tatiihay a tamdaw, palmeden Ningra ko loma' no mo^celay a tamdaw.

³⁴ Kahmaw ko pinengneng Ningra to misatakarakaraway a tamdaw, kasini'adaen Ningra ko misapo^neray a tamdaw.

³⁵ O mamalatadamaanay ko citanengay a tamdaw, nikawrira, o mamapakangodo to adihayay ko maapaay a tamdaw.