Taneng 25 - 阿美語聖經-新約附詩篇箴言

O Saka Tosa a Lolod no Taneng ni Solomon

¹ Onini a sasa a matiliday i, o ni Solomon haca a taneng a sowal. O nitilidan no tamdaw no i laloma'ay no loma' ni Hicikiya o Yuta a hongti konini.

² O 'dil no Kawas i, o pisimed Ningra to pakakmoday a dmak, o katadamaan no hongti i, o pakahapinang ningra to so'linay ato tatiihay.

³ O faloco' no hongti i, caay ko kafana'an, matiya o takaraw no kakarayan ato talolong no riyar, caay ko mamalalat.

⁴ I 'ayawenho a mifalah ko ta'i no ^kim ta, manga'ay ko pisanga' no sayho to makapahay a lalosidan.

⁵ Malcad tonini, i 'ayawenho a mifalah ko tatiihay a tapatapang i tatihitihi no hongti ta, tomireng i mo^celay a paranaan ko pikowan no hongti.

⁶ Aka pisatadamaamaan kiso i ka'ayaw no hongti a pa'araw, aka tomireng kiso i kaitiraan no tadamaanay a tamdaw.

⁷ O nipitala to pitahidang no tamdaw a miati i tisowanan a patala'ayaw a pakamaro' ko nga'ay to nika laplap no tamdaw kiso a mapatararikor a pakamaro' ko ikakaay iso a tamdaw.

⁸ Aka pacfa a malawacay i pisawkitan, ano ira ko cima a pawacay to nika patlac iso i, samaan sato ko nika ngodo iso saw?

⁹ Ano ira ko maan a kacacolian iso ato fiyaw iso i, lonok han a malarihaday. Aka palsa' to nisimedan a dmak no tao,

¹⁰ ano ^ca i, o caay ka 'imer to nisimedan a dmak saan ko pilikaf no tao a mitongangan i tisowanan.

¹¹ Ano manga'ay ko pipatalahkal to ccay a sowal i, matiya o nitlian i ^kim a sala a tada^kim a lingko.

¹² Ano mitngil ko tamdaw to misalofay a sowal no matanengay a tamdaw, ikaka no pilayap ningra to so'linay a tada^kim a fiting ato odo' ko nika ci^poc.

¹³ O so'linay ko faloco' a tarokos i, o pasa'melay to faloco' no miocoray i cingraan, matiya o ki^tecay a nanom i kacidalan a mipanay cingra.

¹⁴ O caay pilahci to nisowalan ningra a pafli to sapakaolah i, matiya o caay ko mamala'orad a to'em.

¹⁵ Ano kodait ko faloco' a mipa'icel a somowal i, ma^deng a misako^ped to faloco' no ki^melay a pacoli a tamdaw, halomikowanay a mihaklong to damsayay a sma.

¹⁶ Aka pakinali ko kakomaen iso to waneng no 'odal, ano adihay ko nikaenan iso i, maota' kiso.

¹⁷ Aka kararid a miliso' to fiyaw iso, latek ma'fangto cingra a malasakateliito ningra i tisowanan.

¹⁸ O misamangahay a pawacay a miri'ang to fiyaw i, malcad to ta'angay a satoktok, matalemay a fonos ato macidemay a pana' a mipatay to tamdaw.

¹⁹ Yo mapades ano miti'er kiso to caay ko tati'eren a tamdaw i, malcad to mangawa'ay a wadis ko sapipa'pa' iso ato malcad to mapi'iway a wa'ay ko sakaromakat iso.

²⁰ Ano romadiw i ka'ayaw no mararomay a tamdaw i, malcad to mislongay to riko' ningra i kasi^nawan, matiya o misipasipay to cilah i doka' ningra.

²¹ Ano macahiw ko 'ada iso i, pakaenen cingra, ano maso'aw cingra i, pananomen.

²² Ano haenen iso i, o mamangodo cingra i tisowanan, o papakaolahen haca no Tapang kiso.

²³ O pisepen i, o palowaday to sakakter no tamdaw, matiya o nani 'amisay a lifes a mihawikid to 'orad.

²⁴ O nika itira i ciko no fadahong no loma' a maro' ko nga'ay, to nika laccay a maro' to karapo'iyay a fafahi.

²⁵ Ano matngil ko nga'ayay a ratoh nai maraayay i, matiya o pananomay i maso'away a tamdaw to ccay a takid no ki^tecay a nanom.

²⁶ Ano misorar ko mo^celay a tamdaw to tatiihay a tamdaw i, matiya o nicowaco'an a nemnem ano ^ca, matiya o mingotaan a nanom no tfon.

²⁷ Ano pakinali ko kakomaen to waneng no 'odal i, caay ka nga'ay, malcad tonini ano pakinali ko piharateng to sakahmekaw no tao i, ma'osi ko tao.

²⁸ O karafirangay a tamdaw i, matiya o caay ka ci'adipel a niyaro', narikay a malowid no tao a mipleng.