Taneng 22 - 阿美語聖經-新約附詩篇箴言

¹ O nika nga'ay no lihaf iso ko nga'ay to nika cidafong ato nika cipayso iso.

² Malcaday a o nisanga'an no Tapang ko cidafongay ato pakoyocay a tamdaw.

³ Malitmoh no mafana'ay a miharateng a tamdaw ko nika aira no pades haw i, tangsol sa cingra a miliyas. Nikawrira, o mafokilay a miharateng a tamdaw haw i, tayra a miraod toya pades.

⁴ O mita'ongay to Tapang ato misapo^neray to faloco' a tamdaw i, o cacidafong, o tatadamaan, o kakakaya' ko 'orip ningra.

⁵ O limlaay to 'orip a tamdaw i, mafana' a miliyas toya sapirpet to tatiihay a tamdaw a satilo.

⁶ Pasifana'en ko wawa to mo^celay a lalan, ta caay ka piliyas cingra tonini a tahatolas.

⁷ O pakosiya a tamdaw i, o makowanay no cipaysoay a tamdaw, o mikiyamay a tamdaw i, o mamalakoli no pikiyaman ningra a tamdaw.

⁸ O mifolsakay to caay ka mo^cel a sapaloma i, o mamilitod cingra to pades, o mamapereng ko pikari'ang ningra to tamdaw.

⁹ O sini'adaay a pafli i pakosiya a tamdaw to kakaenen i, o mamalmed cingra.

¹⁰ Laplapen ko malata'angay a tamdaw, ta mapatrep ko kacacolicoli ato kala'odo'odot ato malalikalikafay a dmak a ma^min.

¹¹ O maolahay to makoracay a faloco' ato damsayay ko sowal a tamdaw i, o kalipahakan no hongti a widang cingra.

¹² Minengneng a midipot ko Tapang to so'linay a dmak. Palasawaden Ningra ko sowal no misamangahay a tamdaw.

¹³ I loma' sa ko matokaay a tamdaw, sowal sa cingra, iraay i papotal ko layon a mitala i takowanan to sapita'modan saan.

¹⁴ O ngoyos no ma'odangay a fafahiyan i, matiya o talakal, matfad itira ko ka'osian no Tapang a tamdaw.

¹⁵ Mingata i apa ko pinangan no ka^mangay, o sasti' ko sapisalof a palatamdaw i cangraan.

¹⁶ O mi'afasay to pakoyocay ko saka cipayso no tireng i, ato o patafoay to cipaysoay a tamdaw i, o mamalacango'otay.

O Toloay a Polo' a Sowal no Taneng

¹⁷ Pitngil, pasifana'en ako kiso to sowal no citanengay a tamdaw, pina'on kiso a minanam to fana'.

¹⁸ Ano pakifaloco'en iso konini i, alaen a pakatayal, o sanga'ayay korira.

¹⁹ O sapapiti'eraw ako i tisowanan to Tapang saka, pasifana'en ako kiso tonini a taneng.

²⁰ Tolo a polo' ko nitilidan ako to saki tisowanan, i laloma' nonini i, ira ko sakafana' ato sapisalof a pa'icel a sowal.

²¹ O sapasifana' i tisowanan to nika o maan ko so'linay a dmak, ta matama iso ko so'linay a sapaca'of toya niocoray tisowanan a tamdaw.

(1)

²² Aka ka pi'afas to maamaan no pakosiya a tamdaw, aka pisamsam a mipa^kel to awaay ko palawinaan a tamdaw.

²³ O Tapang ko pa'adingay cangraan, ano cima ko miri'angay to 'orip nangra i, haenen no Tapang a miala ko 'orip noya tamdaw.

(2)

²⁴ Aka ka pisawidang kiso to karakteray a tamdaw,

²⁵ latek minanam kiso to tatiihay a pinangan ningra, caayto ko mamasalof kiso.

(3)

²⁶ Aka ka pihai a mihosiw to kiyam no tao,

²⁷ ano caay pakapatikol kiso i, halokafoti'an iso a maala no tao.

(4)

²⁸ O nipatirengan no tato'asan nai tiyaho a kalangangan no sra a 'otoc i, aka pilinah kiso.

(5)

²⁹ Ma'araway iso ko malalokay a matayal a tamdaw haw? Caay pikapot cingra to misalamalamaay a tamdaw, o tatomireng cingra i ka'ayaw no hongti.