Taneng 21 - 阿美語聖經-新約附詩篇箴言

¹ O Tapang ko mikriday to faloco' no hongti, matiya o pilinah Ningra to rakat no nanom no 'alo.

² O harateng no tamdaw i, matamaay a ma^min ko no mako a dmak saan, nikawrira, mihapinang ko Tapang to rarangian no dmak ningra.

³ O pidmak to marayasay ato mo^celay a dmak i, ikaka no nika olah no Tapang a milayap to sapato'aya ko nika olah Ningra.

⁴ O pisalata'ata'ang a misatakaraw ato pisaseneseneng no tatiihay a tamdaw i, o raraw konini.

⁵ O masongila'ay ko pisahalaka a misafaco a tamdaw i, o sakacidafong ningra. O forifor sanay a macaloh ko dmak a tamdaw i, o sakalapakosiya ningra.

⁶ O caay ka mo^cel a mialaan a dafong i, matiya o mita'lifay a to'em, o sakapatay no tamdaw a matkop.

⁷ O miforiforay a dmak no tatiihay a tamdaw ko sakatkop nangra, nawhani mana'ay cangra a romakat to mo^celay a lalan.

⁸ O ma'akongay a lalan ko nirakatan no ciraraway a tamdaw, o mo^celay ko dmak no makoracay a tamdaw.

⁹ O nika itira i ciko no fadahong no loma' a maro' ko nga'ay, to nika laccay a maro' to karapo'iyay a fafahi.

¹⁰ O tatiihay a tamdaw i, saromi'ad salafii saan a miharateng to sapidmakaw to tatiihay a dmak, awaay ko sini'ada ningra to fiyafiyaw ningra.

¹¹ O malata'angay a tamdaw i, o mamatfoc cingra, halomafokilay a tamdaw a mapasifana'. O citanengay a tamdaw i, pakayni i nilayapan ningra a sifana' ko sakatongal no fana' ningra.

¹² Mita'sel to faloco' no tatiihay a tamdaw ko mo^celay a Kawas, Cingra ko sakatkop nangra.

¹³ O mipo^tay to tangila a caay pitngil to pingitangit no pakosiya a tamdaw i, ano mingitangitto cingra to pipadama no tao i, caayto pikihar ko tao i cingraan.

¹⁴ Ano padokdok han a pafli to sapakaolah i, ma^deng a mapatrep ko kter, ano pa'alofoen to payso i, ma^deng a mapatrep ko marafrafay a kter.

¹⁵ O pilahci to marayasay mo^celay a dmak i, o kalipahakan no mo^celay a tamdaw. Nikawrira, o sakapades no tatiihay a tamdaw a matalaw konini.

¹⁶ Ano miliyas ko tamdaw to no taneng a lalan i, mamalakapot to kaitiraan no mapatayay a maro'.

¹⁷ O haliacangay a tamdaw i, o mamalapakosiya, o awaayto ko patolasan a komaen, mita'owak a tamdaw i, caay ko cacidafong.

¹⁸ Sapiri'angan ko tatiihay a tamdaw to mo^celay a tamdaw, nikawrira, o tireng ningra ko tahapadesay.

¹⁹ O nika itira i kohkohan a maro' ko nga'ay to nika laccay a maro' atoya karapo'iyay a karangaliwngiway a fafahi.

²⁰ O 'orip no citanengay a tamdaw i, kadofah to dafong a rihaday ko 'orip, o 'orip no maapaay a tamdaw i, tona patahtah sa cingra a mila'om saka, malasawad ko dafong no loma' ningra.

²¹ O milongocay to mo^cel ato adayay ko faloco' a tamdaw i, o kako'daw ko 'orip ningra, o kakangodoan no tamdamdaw cingra.

²² Ano pakatayalen ko taneng i, ma^deng a mi'afas to niyaro' no cicdiay a sofitay, ma^deng a mipleng toya nitadi'ecan nangra a pisitaraan.

²³ O mina'onay to ngoyos ato sma a tamdaw i, o saka^ca ka pades ningra.

²⁴ O misalata'ata'angay a tamdaw i, o misatakarakaraway, o malata'angay ko faloco' ningra.

²⁵ O matokaay a tamdaw i, o ccay no kinapatay ningra korira, nawhani, caay ka ngalay cingra a matayal.

²⁶ Saromi'ami'ad sa cingra a mihaklong to 'anof ningra. Nikawrira, maolah a mipalada' ko mo^celay a tamdaw, caay ka 'idi.

²⁷ Ma'osi ko Tapang to nipato'ayaan no tatiihay a tamdaw, mangalef ko nika 'osi Ningra to nisafana'ay a pipacakat.

²⁸ O misamangahay a pawacay a tamdaw i, caay ko papaso'linen, oya so'linay a nitngilan ato dmak ko nisowalan i, o kakangodoen cingra.

²⁹ Misaharaterateng ko mo^celay a tamdaw to dadmaken ningra, nikawrira, misamangah a misatanektektek a nengnengen ko tatiihay a tamdaw.

³⁰ Oya taneng ato tangal ato nisahalakaan iso a ma^min i, caay ko papakatena' to Tapang.

³¹ Ma^deng ko tamdaw a misa'opo to sofitay, mi'aca to ^fa, mipatala to sapilood, nikawrira, o sapakalowid no tamdaw i, o Tapang ko pi'arawan.