Taneng 19 - 阿美語聖經-新約附詩篇箴言

¹ Ano pakosiyasiya ko 'orip ano mo^cel ko dmak i, ikaka no misa'fitay maapaay a tamdaw ko nika nga'ay.

² Tano lalolalok aca ano awaay ko fana' i, awaay ko ^poc, o macalohay ko rakat i, narikay a mapolin.

³ O nano apa no tamdaw ko sakatfad ningra, 'arawhani ngaliwngiw sa cingra to Tapang.

⁴ O cipaysoay a tamdaw i, 'aloman a 'aloman ko widang ningra, o pakosiya a tamdaw i, haloya dengan a widang ningra i, miliyasto.

⁵ O misamangahay a pawacay i, o mamatfoc cingra, o misakaniway a somowal i, caay ko mamaliyas ningra ko satfoc.

⁶ O tadamaanay a tamdaw i, ta'ongen no tamdamdaw, o halipalada'ay a tamdaw i, misawidang ko tamdamdaw.

⁷ O pakosiya a tamdaw i, halosalikaka ningra a ma'osi i cingraan, mangalef ko widang ningra a miliyas i cingraan. Mikilim cingra to hawidang ningra i, awaay a matama ningra.

⁸ O milongocay to sakafana'aw i, o maolahay to tireng ningra, o ma'imeray to fana' i, caay ka citolas ko nika lmed ningra.

⁹ O misamangahay a pawacay i, caay ko mamaliyas ningra ko satfoc, o misakaniway a somowal i, o mamatkop cingra.

¹⁰ O maapaay a tamdaw i, caay ka tatodong a patahtah saan ko 'orip, o koli a tamdaw i, caay ka tatodong a mikowan to tawki ningra.

¹¹ O citanengay a tamdaw i, caay ka narikay a makter, caay pikadkad to patlac no tamdaw, o katadamaan ningra konini.

¹² Ano makter ko hongti i, matiya o piltoh no layon, nikawrira, o sini'ada ningra i, matiya o misngeray to talod a 'arsing.

¹³ O maapaay a wawa i, o sakapades no wama ningra, o karacoliay a fafahi i, matiya o caay pitolas a lsa' no 'orad.

¹⁴ O loma' ato dafong i, o nirocokan nai to'as, nikawrira, o citanengay a fafahi i, o nipaflian no Tapang.

¹⁵ O matokaay a tamdaw i, saromi'ad sa a mafoti', o sasalama sanay a tamdaw i, o mamacahiw.

¹⁶ O mido^doay a ma'imer to rikec no Kawas i, o kako'daw ko 'orip ningra, o misorikoray to lalan no Tapang i, o mamatkop cingra.

¹⁷ O palada'ay a padama to pakosiya a tamdaw i, o pacaliway i Tapang to payso, o nga'ayay a dmak ningra i, o Tapang ko papatikol i cingraan.

¹⁸ Yo ka^mangho ko mihcaan no wawa i, tangsolen a pasifana' a palatamdamdaw, nikawrira, aka pakinalien ko dmak to saka^caaw ka tkop nangra.

¹⁹ O karakteray a tamdaw i, o mamilayap cingra to hci no tatiihay a dmak ningra, ano pa'adingen iso cingra i, sariyariyaden a mipa'ading cingra.

²⁰ Pitngil a mihaklong to pisalof no tao, kaolah a minanam, ta malacitanengay a tamdaw kiso i pahrekan.

²¹ Alatek adihay ko nisafacoan no tamdaw a dmak, nikawrira, deng o nafaloco'an no Tapang ko malahciay.

²² O kakangodoan ko nika 'anof, o a ikaka no pakosiya a tamdaw ko nika nga'ay no misamangahay a tamdaw.

²³ O mita'ongay to Tapang i, o kako'daw ko 'orip ningra, rihaday ko aro' ningra a matayal, awaay ko pades ningra.

²⁴ O matokaay a tamdaw i, mitatoyto ko kamay ningra to kakaenen nai sala, kawrira, o pipacomato i ngoyos i, matokato cingra.

²⁵ Sti'en ko malata'angay a tamdaw ta, mapalal ko maapaay a tamdaw. Salofen a pa'icel ko citangalay a tamdaw ta, matongal ko nika citangal ningra.

²⁶ O misafaya'ay to wama ato milaplapay to wina a wawa i, o tadapakangodoay to polong no paro no loma'.

²⁷ Wawaaw, ano pasla'ho kiso a minanam i, miliyasto ko taneng ato sifana', halokafana'an iso a matawalto iso.

²⁸ O tatiihay a pawacayay a tamdaw i, awaay ko mo^celay a sowal ningra. O tatiihay a tamdaw i, deng o nika 'anof aca to caay ka mo^cel.

²⁹ O malata'angay a tamdaw i, o mamatfoc cingra. O maapaay a tamdaw i, caay ko mamaliyas ningra ko sasti'.