Taneng 18 - 阿美語聖經-新約附詩篇箴言

¹ O caay pikapot to 'alomanay a tamdaw i, satked sa a mido^do to kangalayan no tireng, o matamaay a haratengen no tamdaw a dmak i, caay ka tama saan cingra.

² O maapaay a tamdaw i, ano caacaay ka fana' cingra, sano mafanafana'ay sa cingra a maolah a patalahkal i ka'ayaw no tamdaw.

³ Mala'afang a romakat ko tatiihay ato malata'angay, caay ka laliyas ko misamsamay ato caay ka fana' to ngodo.

⁴ O sowal no tamdaw i, ma^deng malotatapangan no taneng, matiya o nika talolong no riyar ato tingalaway a nemnem.

⁵ Ano pakonira han ko tatiihay a tamdaw i, caay ka mo^cel, ano palafoen ko awaay ko raraw a tamdaw i, caay ka rayas.

⁶ Ano caciyawho ko maapaay a tamdaw i, mipalowad to sakacacolicoli, pasowal saho cingra i, irato ko mamisti'.

⁷ O ngoyos no maapaay a tamdaw ko sakatfad ningra, o filfil ningra ko sakatahalakal ningra.

⁸ O sowal no karasmaay a tamdaw i, matiya o nga'ayay a kakaenen, tangsol sa a ma'noc.

⁹ O matokaay ato mangirosay i, matiya o malikakaay canira.

¹⁰ O Tapang i, matiya o tanektekay a pisitaraan, ano comikay a tayra ko mo^celay a tamdaw a micomod i, rihaday cingra.

¹¹ O cipaysoay a tamdaw i, kala'adipel han ningra ko dafong ningra, o harateng ningra i, takaraw tanektek konini a dafong, ma^deng a midipot takowanan saan.

¹² O misapo^neray a tamdaw i, o mamalatadamaanay, o misatakaraway a tamdaw i, o mamatkop cingra.

¹³ Caho ka hrek a mitngil halopaca'ofay a tamdaw i, o apa ningra ato sakangodo ningra konini.

¹⁴ O saka'oripananay a faloco' i, o sapakahadidi to adada, ano matoled ko faloco' i, awaay to ko pafaloco'an.

¹⁵ O faloco' no citanengay a tamdaw i, mangalay a mafana', o tangila no citangalay a tamdaw i, mangalay a mitngil to taneng a sowal.

¹⁶ O sapakaolah no tamdaw a maamaan i, o sakakakahad no lalan ningra, makrid cingra a mapatayra i ka'ayaw no tadamaamaanay a tamdaw.

¹⁷ O sa'ayaw a pakokot a pasowal to dmak i, o so'linay a matatodong hakiya, awaho ko pinang. Ano irato ko tatihi a tamdaw a maliclic ta mahapinangto.

¹⁸ Ma^deng a patrep to macacoliay a tamdaw ko nipiritos, ma^deng haca palali'ay to tatosaay a marari'angay.

¹⁹ Ano mipadama kiso to salikaka iso i, matiya o tanektekay a 'adipel no niyaro' ko pidipot ningra i tisowanan, ano macacoli kiso ato cingra i, o mama'edef ningra ko fawahan iso.

²⁰ O hci no kahaccay a sowal no tamdaw ko sakafcol no tiyad ningra, o nano sowal ningra ko sakarihaked.

²¹ O sowal iso ko sakadipot no 'orip iso, ano ^ca sakapatay iso. Ano masamaan ko nisadakan iso a sowal i, o hci nira ko lalayapen iso.

²² O cifafahiyay to citanengay a fafahi i, awaay ko tolas a malmed, mahapinang ko sini'ada no Tapang a palmed i cangraan.

²³ Ano milongoc ko pakosiya a tamdaw i cipaysoay i, samiming sa to ngiha' a somowal, nikawrira, cli' sa a paca'of ko cipaysoay a tamdaw a patalaw.

²⁴ O patelas sanay a ciwidang i, o sakasipon ningra, O talolongay ko kalawidang i, ikaka no pton ko nika nga'ay.