Taneng 17 - 阿美語聖經-新約附詩篇箴言

¹ O nika komaen to 'atkakayto a ccay a 'aplad no ^pang a rihaday ko nga'ay, to nika komaen a mitahka i cokoi to ^pah ato titi a macacolicoli a mala'odo'odot.

² O citangalay a koli i, o mamikowan to caay ka fana' to ngodo a wawa no tawki ningra, o romasato o mamikapot cingra toya malikakaay a mililam to omah no tawki.

³ O namal i parod ko sapi'olac to tada^kim ato ^kim. O Tapang ko milifetay to faloco' no tamdaw.

⁴ O tatiihay a tamdaw i, paso'lin a mitngil to tatiihay a sowal. O misamangahay a tamdaw i, maolah a mitngil to misa'fitay a sowal.

⁵ O matawaay to pakosiya a tamdaw i, o milokesay to misanga'ay cingraan a Kawas. O lipahakay to nika pades no tao i, caay ko mamaliyas ningra ko satfoc.

⁶ O sakacihrang no mato'asay ko fofo ningra, o sakatadamaan no wawa ko wama ato ina nangra.

⁷ O maapaay a tamdaw i, caay ka tatodong a somowal to damsayay, makapahay a sowal. Mangalef ko tadamaanay a tamdaw caay ka tatodong a misamangah a somowal.

⁸ O pinengneng no pa'alofoay a tamdaw i, o tadamaanay konini a dmak ako, malahci a ma^min ko nisahalakaan ako a dmak saan.

⁹ O misololay to patlac no tao i, o palowaday to sakasasiolaolah no tamdamdaw, o caay pitawal a mi'intel to katlangay a dmak i, o palasawaday to kalawidang.

¹⁰ Ano kapo'iyen to ccay a sowal ko citanengay a tamdaw i, ikaka no pisti' to smo'ot (100) i maapaay a tamdaw ko nika ci^poc.

¹¹ O tatiihay a tamdaw i, sarocod sa a midmak to tatiihay, saka o mamatiya o ma'edesay a coyoh ko patay a tayra i cingraan.

¹² O nika litmoh to masidayay ko wawa a tawinaan a tomay ko adahi to nika lalitmoh to mafolaay ko dmak a maapaay a tamdaw.

¹³ Ano o tatiihay ko sapaco'ay iso to nga'ayay a tamdaw i, caay ko mamiliyas i fawahan no loma' iso ko latiih a tahada'oc.

¹⁴ Matiya o nifowahan a nanom ko satapangan no kacacolicoli, orasaka, i 'ayaw no kacacoli i, 'meten ta caay pistol ko kacacoli.

¹⁵ O tatiihay a tamdaw i, o mo^celay sanay, o mo^celay a tamdaw i, o tatiihay sanay a mipastek i, o ka'osian no Tapang konini a tosa a dmak.

¹⁶ Tona mafula ko maapaay a tamdaw, saka awaay ko ^poc a pakapayso a micakay to saka ci taneng.

¹⁷ Mararid a masasiolaolah ko malawidangay, o mamipadang a miharateng to pades ko salikaka no tireng.

¹⁸ O mafokilay a tamdaw i, hai sa a mihosiw to kiyam no fiyaw ningra.

¹⁹ O maolahay a ciraraw a tamdaw i, maolah a macacoli, o maolahay a misatakaraw a tamdaw i, o sakaira no pades ningra.

²⁰ O tatiihay ko faloco' a tamdaw i, awaay ko kanga'ayan ningra, o misamangahay ko sowal a tamdaw i, o aira a mararid ko pades ningra.

²¹ Ano maapaay ko nihofocan a wawa i, o sakarawraw no wama ningra, awaay ko lipahak no wama no maapaay a wawa.

²² O lipahakay a faloco' i, matiya o nga'ayay a sapaiyo a patanektek to tireng, o mararomay a faloco' i, matiya o tatiihay a adada a mipatay to tamdaw.

²³ O tatiihay a misawkitay i, milayap to sapa'alofo, caay patalahkal cingra to mo^celay a dmak.

²⁴ O citangalay a tamdaw i, mataneng a dadmak, o maapaay a tamdaw i, caay ka saccay ko faloco' ningra a tahada'oc.

²⁵ O maapaay a wawa i, o sakararom no wama ningra, o sakaroray haca no wina ningra.

²⁶ Caay ka nga'ay a mitfoc to awaay ko raraw a tamdaw, caay ko mo^celay a dmak ko pisti' to nga'ay a tamdaw.

²⁷ O citanengay a tamdaw i, trep sa a caay ka caciyaw, o citangalay a tamdaw i, masinanot ko faloco' a damsay.

²⁸ Ano trep sa ko maapaay a tamdaw i, o citangalayto cingra, ano trep sa cingra a caay ka caciyaw i, o citanengayto cingra.