Taneng 16 - 阿美語聖經-新約附詩篇箴言

¹ O tamdaw ko misahalakaay to dadmaken, nikawrira, o Tapang ko miktonay to sakalahci no dmak.

² O harateng no tamdaw i, matamaay ko polong no nidmakan ako saan, nikawrira, mahapinang no Tapang ko lalngatan no faloco' ningra.

³ Patorod han i Tapang ko polong no nisahalakaan iso a dmak, ta ma^deng kiso a milahci to polong no dmak iso.

⁴ Matatodong a ma^min to sakatayal ko nisanga'an no Tapang, o sakatkop i pahrekan ko sakasanga' no tatiihay a tamdaw.

⁵ Ma'osi ko Tapang to malata'angay a tamdaw, caay ko papaliyasen Ningra cangra to satfoc.

⁶ O nano sini'ada ato nika so'lin ko sakahpol no raraw, o nika ngodo to Tapang ko saka^ca ka pades.

⁷ Ano kalipahakan no Tapang ko dmak no tamdaw i, halo'ada ningra a malawidangto ningra.

⁸ Ka o mo^celay ko dmak to nika ^ca ka hakowa ko kinaira, mana'ay to nika caay ka mo^cel a adihay ko kinaira.

⁹ O tamdaw ko misahalakaay to halalan no tireng, nikawrira, o Tapang ko mikriday to rakat no wa'ay ningra.

¹⁰ Ira i sowal no hongti ko sakowan no Kawas, caay ka patlac ko pisawkit ningra.

¹¹ O marayasay a satingting i, o no Tapang, o marayasay a siro no satingting i, o nisanga'an Ningra.

¹² O ka'osian no hongti ko tatiihay a dmak, nawhani, o mo^celay a dmak ko sakatanektek a tomireng no sakowan ningra.

¹³ Maolah ko hongti a mitngil to mo^celay a sowal, maolah cingra to so'linay ko sowal a tamdaw.

¹⁴ Pakapipatay to tamdaw ko marafrafay a kter no hongti, nikawrira, o citanengay a tamdaw i, pakapipatrep to kter no hongti.

¹⁵ O lipahakay a pising no hongti ko sakaci'orip no tamdaw, matiya o mihawikiday a to'em to 'orad i katiposan ko sini'ada ningra.

¹⁶ Ikaka no tada^kim ko taneng, ikaka no ^kim ko fana'.

¹⁷ O lalan no mo^celay a tamdaw i, miliyas to tatiihay, mina'on cingra a romakat to mo^celay a lalan, madipot ko 'orip ningra.

¹⁸ Pasayra i katkopan ko rakat no malata'angay a tamdaw, o misatakaraway a tamdaw i, caay ka ^ca ka tfad.

¹⁹ O misapo^neray ko faloco' a mikapot to pakosiya a tamdaw i, ikaka noya mikapotay to malata'angay a tamdaw a mililam to ni'afasan a dafong ko nika nga'ay.

²⁰ O pakifaloco'ay to sifana' i, adihay ko ha^poc ningra, o miti'eray to Tapang i, mida'oc a malmed.

²¹ O citanengay a tamdaw i, o mafana'ay a tamdaw wa han cingra, damsay ko sowal ningra, ci'icel a misolot to faloco' ko sowal ningra.

²² O taneng no citangalay a tamdaw ko tatapangan no nemnem no 'orip ningra, nikawrira, awaay ko ha^poc to pitfoc to maapaay a tamdaw.

²³ O citanengay a tamdaw i, misaharateratengho ta pasowal, ci'icel ko sowal ningra a misolot to faloco' no tamdaw.

²⁴ O sida'itay a sowal i, matiya o 'odax no 'odal, o sakalipahak no faloco' ato sakatanektek no tatirengan.

²⁵ Iraay ko roma a lalan, mo^cel a nengnengen, 'arawhani o sakatayra i kapatayan a lalan.

²⁶ O sakatayal no matayalay i, o sapafcol to fitoka, nawhani, o sapafcolaw to tiyad saka, caay ka toka ko matayalay.

²⁷ O mari'angay a tamdaw i, misahalaka to sapiri'angaw to tamdaw, matiya o mitodohay a namal ko sowal ningra.

²⁸ O mi'akongay to sowal i, misanga' to sakacacolicoli, o pacfaay a sowal i, o sakalaliyas no malawidangay.

²⁹ O miforiforay a misa'fit to fiyafiyaw i, o mikriday to tamdaw a pakaromakat to tatiihay a lalan.

³⁰ O misaknikni'ay to mata a tamdaw i, o caay ka mo^cel ko faloco', o misatoetoemay a tamdaw to katofil i, o misahalakaay to tatiihay.

³¹ O nika 'ofad i, o tadamaanay a tamohong, o sapakaolah to mo^celay ko pinangan a tamdaw.

³² O kodaitay a faloco' i, ikaka no cicdiay a sofitay ko nika ci'icel, o paka'emetay to tireng i, ikaka no mi'afasay to niyaro' ko nika ci'icel.

³³ Miritos a mipa'edaw ko tamdaw, nikawrira, o Tapang ko miktonay a misa'osi to 'orip no tamdaw.