Taneng 14 - 阿美語聖經-新約附詩篇箴言

¹ O citanengay a fafahiyan i, mipatireng to loma', o maapaay a fafahiyan i, to^to saan a mipleng to loma'.

² O mo^celay ko dmak a tamdaw i, o mangodoay to Tapang, o ma'akongay ko dmak a tamdaw i, mi^pec to Tapang.

³ Mararid a matefoc ko maapaay a tamdaw to nano nika lata'ang ningra, o citanengay a tamdaw i, madipot no sowal ningra ko tireng ningra.

⁴ Ano awaay ko kolong to sapikangkang i, nanicowa a ira ko panay, ira ko kolong to sapikangkang saka, adihay ko panay.

⁵ O tati'eren ko pipawacay no so'linay a tamdaw, o kaniw ko pipawacay no misasamangahay a tamdaw.

⁶ O mi^pecay a tamdaw i, caay pakalayap to taneng, o citangalay a tamdaw i, narikay a mafana'.

⁷ Piliyas to maapaay a tamdaw, nawhani awaay ko aalaen i cangraan to sakafana'.

⁸ O taneng no citangalay a tamdaw ko sakapakatama ningra to rarakaten ningra a lalan, o apa no mafolaay a tamdaw ko sapisafana' ningra to tireng ningra.

⁹ Ano ciraraw ko maapaay a tamdaw i, caay sapifalican a mimli to faloco', o mo^celay a tamdaw i, maolah a mikilim to sakararihaday a masasisolol to raraw.

¹⁰ O roray no faloco' iso i, deng kiso ko mafana'ay, o lipahak no faloco' iso i, caay ko mama'isal no tao.

¹¹ O mamalefek ko loma' no tatiihay a tamdaw, o tatanektek a tomireng ko loma' no mo^celay a tamdaw.

¹² Iraay ko roma a lalan, mo^cel a nengnengen, 'arawhani o sakatayra i kapatayan a lalan.

¹³ Ma^deng a mitahpo to rarom ato ksem ko nika lipahak a matawa, nikawrira, ano mahrekto ko nika lipahak i, oyananto a ira koya rarom.

¹⁴ O ma'akongay ko faloco' a tamdaw i, cingra ko kakomaen to hci no tatiihay a dmak ningra, o mo^celay a tamdaw i, o mamilayap to tatodong no nga'ayay a dmak ningra.

¹⁵ O maapaay a tamdaw i, paso'lin to maamaan a dmak a ma^min, o citangalay a tamdaw i, mina'on to rarakaten ningra a lalan.

¹⁶ Miliyas to sakalatiih ko citanengay a tamdaw, nikawrira, pakonahira sa ko maapaay a tamdaw a misacimacima.

¹⁷ O karakteray a tamdaw i, o maapaay ko dmak ningra, o mafana'ay a miharateng a tamdaw i, caay ka rawraw ko faloco'.

¹⁸ O mafokilay a tamdaw i, cingra ko komaenay to hci no apa ningra, o mafana'ay a tamdaw i, kalatamohong han ningra ko fana' ningra.

¹⁹ O mamihinokop i ka'ayaw no mo^celay a tamdaw ko tatiihay a tamdaw, o mamiki'a'am i ka'ayaw no fawahan no mo^celay a tamdaw ko tatiihay a tamdaw.

²⁰ O ka'osian no tamdamdaw ato fiyafiyaw ko pakosiya a tamdaw, nikawrira, 'aloman a 'aloman ko widang no cidafongay a tamdaw.

²¹ O sini'adaay to pakosiya a tamdaw i, o malmeday, o mi^pecay to fiyafiyaw a tamdaw i, o ciraraway.

²² O nga'ayay ko dmak a tamdaw i, o tata'ongen no tamdaw a mikangodo, o tatiihay ko dmak a tamdaw i, o mamatfad a moraraw to lalan.

²³ O malalokay a matayal a tamdaw i, caay ka rawraw to saka'orip, o saromi'ami'ad sanay a misacaciyaw i, o mamalapakosiya.

²⁴ O kadofah no citangalay a tamdaw ko malotamohong ningra, o fokil no maapaay a tamdaw ko sakalata'ang ningra.

²⁵ O so'linay a pawacayay a tamdaw i, mipa'orip to 'orip no tamdaw, o misamangahay ko sowal a tamdaw i, miri'ang to tamdaw.

²⁶ O mangodoay to Tapang i, ira ko piti'eran ningra, halo paro no loma' ningra a rihaday a tanektek.

²⁷ O nika ngodo to Tapang i, o nemnem no sakaci'orip, pakapaliyas to kacalemceman a patay ko taneng.

²⁸ O sakatadamaan no hongti i, o nika 'aloman no finawlan, ano awaay ko finawlan no hongti i, awaayto ko maamaan ningra.

²⁹ O caay ka narikay a makter a tamdaw i, o citanengay a tamdaw, o karakteray a tamdaw i, o patalahkalay to apa ningra.

³⁰ O nika sinanot no faloco' i, o sakatanektek no tatirengan, o ma'inapay a faloco' i, o i laloma'ay no 'okak a ^kang.

³¹ O mipa^klay to pakosiya a tamdaw i, o pisamsam to misanga'ay cingraan a Tapang, o adayayay to pakosiya a tamdaw i, o so'linay a mita'ongay to Tapang.

³² O miforiforay a dmak no tatiihay a tamdaw ko sakatkop ningra, ano miso'aya'ayaw to patay ko mo^celay a tamdaw i, o mamadipot cingra.

³³ Ira i faloco' no citanengay a tamdaw ko fana' ningra, nikawrira, awa ko fanafana' no maapaay a tamdaw.

³⁴ O mo^celay a dmak ko sakacakat no kitakit a ki^mel, o sakangodo no finawlan ko raraw.

³⁵ O citanengay a matayalay a tapatapang i, o mamapakaolah no hongti, nikawrira, o matokaay a matayalay a tapatapang i, o mamatfoc no hongti.