Taneng 13 - 阿美語聖經-新約附詩篇箴言

¹ O citanengay a wawa i, mitngil to pipasifana' no mama ningra, nikawrira, o malata'angay a tamdaw i, caay pitngil to pitoro' no tamdaw to patlac ningra.

² O nga'ayay a tamdaw i, o so'linay a sowal ningra ko sakalmed ningra, nikawrira, o misafana'ay a tamdaw i, o pikari'ang ko patosokan ningra.

³ O mina'onay to sowal a tamdaw i, o limlaay to 'orip, nikawrira, o pacfa sanay a somowal i, o mitkopay to tireng ningra.

⁴ Ano mangalangalay ko matokaay a tamdaw to maan i, awaay ko sapiala ningra, nikawrira, o malalokay a matayal a tamdaw i, ira ko sapiala ningra to kangalayan ningra a ma^min.

⁵ Ma'osi to misamangahay a sowal ko mo^celay a tamdaw, nikawrira, o katliian, o kaackan ko tatiihay a tamdaw.

⁶ Madipot no mo^celay a dmak nangra ko awaay ko raraw a tamdaw, nikawrira, o sakatfad no ciraraway a tamdaw ko tatiihay a dmak nangra.

⁷ O cidafongay a tamdaw kako saan ko roma a tamdaw, 'arawhani awaay ko maan aca ningra. O pakosiya a tamdaw kako saan ko roma a tamdaw, 'arawhani adihay ko dafong ningra.

⁸ O cidafongay a tamdaw i, o payso ningra ko sapi'aca to tireng ningra, nikawrira, awaay ko mipatalaway to pakosiya a tamdaw.

⁹ Matiya o matdiay a malikatay a dawdaw ko mo^celay a tamdaw, nikawrira, matiya o mapadengay a dawdaw ko tatiihay a tamdaw.

¹⁰ O palowaday to sakacacoli ko misatakaraway a faloco', o citanengay a tamdaw i, mitngil to pisalof no tamdaw i cingraan.

¹¹ Ano caay ko nika rorayan iso ko sakacidafong iso i, ranikay a malasawad, ano nano nika rorayan iso ko sakacidafong iso i, caay ko mamalasawad ko dafong iso.

¹² Ano malasawad ko nisafaloco'an i, matoled ko faloco', ano malahci ko nisafaloco'an i, matiya o ci'oripay a kilang.

¹³ O mi^pecay to sifana' i, o mamapades cingra, nikawrira, o mido^doay to limo'ot i, rihaday ko 'orip ningra.

¹⁴ O pasifana' no citanengay a tamdaw i, o nemnem no sakaci'orip, pakapaliyas to kacalemceman a patay ko taneng.

¹⁵ Kangodoen no tamdaw ko citangalay a tamdaw, nikawrira, o mamatkop ko caay ka so'lin ko faloco'.

¹⁶ O citangalay a tamdaw i, misaharateratengho ta midmak, nikawrira, o maapaay a tamdaw i, misaakoakoay to fokil ningra.

¹⁷ O sakalatiih ko sowal no mafolaay a tarokos, nikawrira, o sakarihaday ko sowal no so'linay a tarokos.

¹⁸ O mamalapakosiya a mapakangodo ko mana'ayay a salofen, nikawrira, o kahmekan no tamdaw ko mitngilay to pisalof no tamdaw.

¹⁹ Ano malahci ko kacifaloco'an i, lipahak ko faloco', nikawrira, caay ka kahi a miliyas to tatiihay ko maapaay a tamdaw.

²⁰ O minaolay to citanengay a tamdaw i, o cacitaneng cingra, o minaolay to maapaay a tamdaw i, o mamapakaroray cingra.

²¹ Milpel to ciraraway a tamdaw ko pades, nikawrira, milayap to nga'ayay a sapakaolah ko mo^celay a tamdaw.

²² Misiday to dafong ko nga'ayay a tamdaw to saki tloc ningra, nikawrira, misoped to dafong ko ciraraway a tamdaw to mamalo no mo^celay a tamdaw.

²³ Ano mipamatang a maomah ko pakosiya a tamdaw i, adihay ko kinaira ningra a kakaenen, nikawrira, o caay ka mo^cel a tamdaw i, caay ka ngalay a maomah.

²⁴ O caay pisti' to wawa a palatamdamdaw i, o caay ka olah to wawa ningra, o maolahay to wawa i, ca^des ko pipasifana' ningra to wawa ningra.

²⁵ O mo^celay a tamdaw i, caay ka cango'ot to kakaenen, o tatiihay a tamdaw i, mararid a macahiw.