Taneng 12 - 阿美語聖經-新約附詩篇箴言

¹ O maolahay a mafana' a tamdaw i, maolah a milayap to sifana', mi'intel to misalofay a pa'icel ko maapaay a tamdaw.

² Maolah ko Tapang to nga'ayay a tamdaw, matfoc ko misahalakaay to tatiihay a tamdaw.

³ Caay ko rarihaday ko tatiihay ko dmak a tamdaw, o mo^celay a tamdaw i, tanektek a caay ka ngiyangi.

⁴ O citanengay a fafahi i, o kacihrangan no fa'inay ningra, o pakangodoay a fafahi i, matiya o i kmoday no 'okak no fa'inay ningra a tatiihay a ^kang.

⁵ O mo^celay a tamdaw i, o milalenay ko dmak to saki tamdaw, o sapisa'fitaw to tamdaw ko nisahalakaan no tatiihay a tamdaw.

⁶ Mipatay to tamdaw ko sowal no tatiihay a tamdaw, nikawrira, mipa'orip to tamdaw ko sowal no mo^celay a tamdaw.

⁷ O mamalasawad ko tloc no tatiihay a tamdaw, nikawrira, o mamararid ko laloma'an no mo^celay a tamdaw.

⁸ O mamakahmek ko citangalay a tamdaw, o mama^pec ko maapaay a tamdaw.

⁹ O ma^pecay no tao a tamdaw i, ci koliho cingra, ikaka noya misatakaraway a misalata'ata'ang a macahiway a tamdaw ko nika nga'ay.

¹⁰ Maolah a midipot to 'a'adopen ko mo^celay a tamdaw, miri'ang to pina'orip ko tatiihay a tamdaw.

¹¹ Caay ka cango'ot to kakaenen ko malalokay a maomah, o milongocay to awaay ko ^poc a dmak i, tada o maapaay.

¹² Sapi'afasan to tama' no tatiihay a tamdaw ko ma'desay a tamdaw, o mo^celay a tamdaw i, tanektek a caay ka ngiyangi.

¹³ O ngoyos no tatiihay a tamdaw ko sakatfad ningra a tahatalakal, sanga'ay sa ko piliyas no mo^celay a tamdaw to pades.

¹⁴ O nano hci no sowal ato dmak no tamdaw ko sakapilayap to sapakaolah, o mamilayalayap aca cingra to tatodong no dmak ningra.

¹⁵ O maapaay a tamdaw i, matamaay ko no mako saan, nikawrira, mitngil to pisalof ato pipa'icel no tao ko citanengay a tamdaw.

¹⁶ Ano makter ko maapaay a tamdaw i, tangsol sa a patalahkal to kter ningra, nikawrira, trep sa a mihadidi to pisamsam no tao ko citangalay a tamdaw.

¹⁷ O so'linay a sowal i, o pahapinangay to mo^celay a dmak, o misamangahay a pawacay i, o miri'angay to awaay ko raraw a tamdaw.

¹⁸ Ano caay pina'on to sowal i, matiya o mikotangay a midoka' to tamdaw, nikawrira, o citanengay a sowal i, matiya o nga'ayay a sapaiyo a miadah.

¹⁹ O misamangahay ko sma a tamdaw i, ccay a mlet ko 'orip ningra, o so'linay ko filfil a tamdaw i, mida'oc ko 'orip ningra.

²⁰ O misahalakaay to tatiihay a dmak i, ira i faloco' ningra ko sapisa'fit, o pa'icelay a tamdaw to sakararihaday i, matomes no lipahak cingra.

²¹ Awaay a malitmoh no mo^celay a tamdaw ko pades, caay pitolas ko pades no tatiihay a tamdaw.

²² O ka'intelan no Tapang ko misamangahay a ngoyos, o kalipahakan Ningra ko so'linay a mido^do to sowal.

²³ Misimed to fana' ningra ko citangalay a tamdaw, mipatalahkal to fokil ningra ko maapaay a tamdaw.

²⁴ O mamikowan ko kamay no malalokay a tamdaw, o mamalakoli ko matokaay a tamdaw.

²⁵ O sakatoled no tamdaw ko rawraw no faloco', o sakalipahak no tamdaw ko nga'ayay a sowal.

²⁶ O mo^celay a tamdaw i, o nga'ayay a singsi ato widang no fiyafiyaw, nikawrira, pamoraraw to lalan ko tatiihay a tamdaw.

²⁷ O matokaay a tamdaw i, caay pihodhod to tama' ningra, nikawrira, o malalokay a tamdaw i, kakahad ko kasadakan no dafong ningra.

²⁸ O mo^celay a dmak i, o sakatayra i ci'oripay a lalan, awaay ko sakapatay a lalan tonini.