Taneng 11 - 阿美語聖經-新約附詩篇箴言

¹ Ma'osi ko Tapang to misa'fitay a satingting, maolah Cingra to marayasay so'linay a siro no satingting.

² O misatakaraway a tamdaw i, ira a mitoor i cingraan ko sakangodo ningra, o misapo^neray a tamdaw i, ira a patihi i cingraan ko taneng.

³ O mo^celay a tamdaw i, o so'linay a faloco' ningra ko mikriday i cingraan, o misafana'ay a dmak no misa'fitay a tamdaw ko sakatkop ningra.

⁴ Ano mamapatayto ko tamdaw i, o maanho ko ^poc to dafong, nikawrira, ma^deng a pa'orip to 'orip no tamdaw ko mo^celay.

⁵ O nika so'lin no mo^celay a tamdaw ko sakaromakat ningra i marayasay a lalan, nikawrira, o dmak no tatiihay a tamdaw ko sakatkop ningra.

⁶ Pa'oripen no mo^cel ko so'linay a tamdaw, o 'anof no misafana'ay a tamdaw ko saka tahalakal ningra.

⁷ Ano mapatay ko tatiihay a tamdaw i, malasawadto ko pafaloco'an ningra, o mitadi'ecay a tamdaw to payso i, o horac ko pahrekan ningra.

⁸ O mo^celay a tamdaw i, caay ko mamapades, nikawrira, caay ko mamaliyas no tatiihay a tamdaw ko pades.

⁹ O caay ka ngodo to Kawas i, mitiih to fiyafiyaw ko sowal ningra, ma^deng a pa'orip to tamdaw ko taneng no mo^celay a tamdaw.

¹⁰ Ano macakat ko 'orip no mo^celay a tamdaw i, malipahak ko niyaro', ano mapatay ko tatiihay a tamdaw i, milkal a lipahak ko finawlan.

¹¹ Pakayni i nika maro' no mo^celay a tamdaw ko sakacakat no niyaro', nikawrira, pakayni i sowal no tatiihay a tamdaw ko sakapleng no niyaro'.

¹² Milokes to fiyafiyaw ko caay ka fana' to maan aca a tamdaw, nikawrira, trep sa a caay ka caciyaw ko citanengay a tamdaw.

¹³ O mangoyosay a tamdaw i, malsa' ko nisimedan ningra a dmak, nikawrira, misimed to dmak ko so'linay a tamdaw.

¹⁴ Ano awa ko mikriday i, o mamalasawad ko kitakit, ano 'aloman ko tadamaamaanay a tamdaw i, o rarihaday ko kitakit.

¹⁵ O mihaydaay a mihosiw to kiyam no kafahalan a tamdaw i, o mamasipon cingra, o miliyasay to matiniay a dmak i, o rarihaday cingra.

¹⁶ O damsayay a fafahiyan i, o kangodoan no tamdamdaw, o 'amelasay a fafahiyan i, o pakangodoay to tireng ningra. O matokaay a tamdaw i, o awaay ko maamaan aca a dafong ningra, o tanohtohay a fa'inayan i, o cacidafong cingra.

¹⁷ O adayayay a tamdaw i, o sakalmed ningra, o miforiforay a tamdaw i, o miri'angay to tireng ningra.

¹⁸ Awaay ko ^poc to nikarorayan no tatiihay a tamdaw, o mo^celay ko dmak a tamdaw i, o papakalayap cingra to so'linay a sapakaolah.

¹⁹ O misafaloco'ay a tamdaw a midmak to nga'ayay i, o caci'orip cingra, o misafaloco'ay a tamdaw a midmak to tatiihay i, o sakapatay ningra.

²⁰ O tatiihay ko faloco' a tamdaw i, o ka'intelan no Tapang, o mo^celay ko dmak a tamdaw i, o kalipahakan Ningra.

²¹ Caay ko mamaliyas no tatiihay a tamdaw ko satfoc, nikawrira, o mamapa'orip ko mo^celay a tamdaw.

²² Ano makapakapah ko fafahiyan ano caay ka fana' to maan aca i, matiya o cikadangay to ^kim ko ngoso' a diyong cingra.

²³ Mangalay a cihci to nga'ayay ko mo^celay a tamdaw, o sakakter no finawlan ko nisafaloco'an no tatiihay a tamdaw.

²⁴ O halipalada'ay a tamdaw i, matongal a matongal ko nika kadofah ningra, o ma'idiay a pasadak to ccaccay aca a tampiya i, mangalef a mangalef ko nika lapakosiya ningra.

²⁵ O halipalada'ay a tamdaw i, mangalef a matongal ko nika cakat ningra, o pipadama to tao i, o sakaci^poc no tireng.

²⁶ O mina'angay to panay a caay pipacakay a tamdaw i, o a 'kaken no finawlan, o maolahay a tamdaw a pacakay to panay i, o kakahmeken no tamdamdaw.

²⁷ O misa'icelay a tamdaw to nga'ayay a dmak i, o rarahker a makangodo no tamdamdaw, o misa'icelay a tamdaw to tatiihay a dmak i, o aira i cingraan ko pades.

²⁸ O miti'eray a tamdaw to dafong i, matiya o marasrasay a papah no kilang i kafarawfawan. O mo^celay a tamdaw i, matiya o kidmolay ko papah a kilang, matiya o kangdaway ko papah a kilang i kacanglahan.

²⁹ O mifurifuray to paro no niyah i, o mamalasawad a ma^min ko dafong no loma' ningra. O maapaay a tamdaw i, o mamalakoli no citanengay a tamdaw.

³⁰ O cacihci to ma'oripay a kilang ko mo^celay a tamdaw, o mamihaklong ko tamdamdaw to citanengay a tamdaw.

³¹ Ano o caco'ayen no i hkalay a tamdaw ko mo^celay a tamdaw i, mangalef a maco'ay ko tatiihay ato ciraraway a tamdaw!