Taneng 1 - 阿美語聖經-新約附詩篇箴言

O Sakaci^poc ko Taneng

¹ O matiliday i tini tonini a cudad i, o taneng a sowal ni Solomon o hongti no Israil, o wawa ni Tafiti.

² Onini i, o sakacitaneng ato sakafana' no tamdaw to ci^pocay a dmak ato sakafana' no tamdaw to tatodong no talolongay a sowal.

³ O pakafana'ay to tamdaw konini to sakacitangal a milahci to dmak a ma'orip ato samaanen a malaso'linay ato malamarayasay ato malamo^celay a tamdaw.

⁴ O sakacitangal no mafokilay a tamdaw, o romasato, o sakafana' no kapah a masinanot ko harateng.

⁵ O sakatongal no fana' no citanengay a tamdaw ato sakacilalan no faloco' no citangalay a tamdaw konini

⁶ to sakafana'aw nangra to pakakmoday a tinako no taneng ato nipalowadan no citangalay a tamdaw a licay.

O Pipalimo'ot to Kapah

⁷ O tatapangan no sakacitaneng ko nika ngodo to Tapang. O maapaay a tamdaw i, caay ka limla to sakacitaneng, ma'osi a minanam.

⁸ Wawaaw, pitngil to sowal no mama iso, pakifaloco'en ko sowal no ina iso.

⁹ O mito'asay to faloco' iso ko sifana' nangra. O sakasalongan konini a matiya o nika citamohong ato nika cicangaw iso.

¹⁰ Wawaaw, ano ira ko tatiihay a tamdaw a mikayhid tisowanan i, aka pikihatiya.

¹¹ <

¹² Samatiya han ita o kaitiraan no mapatayay a misamanta' a mita'mod a mipatay cangraan.

¹³ O 'a'afasen ita ko masamaamaanay a dafong nangra a mitomes i loma' ita.

¹⁴ Tata. Pikihatiya i tamiyanan, o mamisakilac kita to ni'afasan ita a maamaan,>> ano sasaan cangra i.

¹⁵ Wawaaw, aka pihaklong to matiraay a tamdaw, liyasen cangra.

¹⁶ Makanir cangra a midmak to tatiihay, sapipatayan cangra to tamdaw.

¹⁷ Ano ma'araw no 'ayam ko pitlay iso to tilo i, awaay ko ^poc to pitilo iso.

¹⁸ Nikawrira, matiya o mitiloay to tireng nangra a mipatay ko matiraay a tamdaw.

¹⁹ O kala'orip sanay to pitakaw ato pikari'ang i, o sakapatay ningra ko mahaenay a dmak ningra.

O Pitahidang no Taneng

²⁰ Pitngil, mitahidangay ko taneng i niyaro' i kalali'acaan

²¹ a milkal itira i kasa'opoan no tamdaw, itira i sacomod no niyaro'. Sowal sa,

²² <

²³ Pitngil kamo to limo'ot ako, pakafana'en ako kamo to i faloco'ay ako to sakafana' namo.

²⁴ O mitahidangay kako i tamowanan to ha:tiniay, nikawrira, caay pitngil, caay picinga kamo i takowanan.

²⁵ O mi^pecay kamo to sowal ako, caay ka kahi kamo a salofen ako ko faloco' namo.

^26-27 Saka, ano mapadesto kamo i, o kakatawaen ako kamo. Ano ira ko katalawan namo, ano talifahal sa a matiya o faliyos ko nika ira no pades ato semsem a mikari'ang i tamowanan i, o kakatawaen ako kamo.

²⁸ Itiya i, o mamitahidang kamo a milongoc i takowanan, nikawrira, caay ko papaca'of kako, o mamikilim kamo i takowanan, nikawrira, caay ko mamatama namo kako.

²⁹ O mi^pecay kamo to fana', o caay ka ngodo kamo to Tapang.

³⁰ Satalifokil han namo ko sowal ako a misalof to faloco' namo a palatamdamdaw to ha:tiniay, caay ka limla kamo to sowal ako.

³¹ Orasaka, o lalayapen namo ko hci no nano dmak namo, o nano dmak namo ko sakapades namo.

³² Malasakapatay no mafokilay a tamdaw ko nika 'osi nangra a citaneng, sarihaday sanay a maapaay a tamdaw i, o sakatkop ningra ko nika matira ningra.

³³ Nikawrira, o mitngilay to sowal ako i, o rarihaday ko 'orip nangra, awaay ko katalawan nangra,>> saan.