Pa'arawan 9 - 阿美語聖經-新約附詩篇箴言

¹ Mila^pa ko sakalalima a coyoh, ta ma'araw ako ko ccay a matfaday i hkal nai kakarayan a fo'is. Mapatorod cingra to safawah no awaay ko para' a ofang.

² Fawahen ningra koya awaay ko para' a ofang i, masadak ko matiyaay o 'acfel no tata'angay a parod. Sato'man sa ko cidal ato kakarayan to nano 'acfel noya ofang.

³ Malahaklong atoya 'acfel ko riri' a masadak a mildef to sra. Mapafli i cangraan ko matiyaay o no rarikah a 'icel.

⁴ Mapalimo'ot caira to saka^caaw pikari'ang naira to rngos ato kilang ato masamaamaanay a molngaway. Deng o caay ka topa ko pising to satopa no Kawas a tamdaw ko kakari'angen naira.

⁵ Nikawrira, caay ka hayda ko nipipatay naira toya tamdaw. Deng o nipipasemsem aca toya tamdaw to lima a folad ko mahaydaay. Matiya o nikalatan no rarikah ko nipisemsem naira.

⁶ Itiya toya lima a folad i, o mamilongoc ko tamdaw to sakapatayaw. Nikawrira, caay ko mamapatay cangra. Sakapatayan cangra i, caay ka patay cangra.

⁷ Matiya o tatala'ayaw a milood a ^fa ko faco noya riri'. Matiya o citamohongay to tada^kim ko fongoh naira. Matiya o pising no tamdaw ko pising naira.

⁸ Matiya o fokes no fafahiyan ko fokes naira. Matiya o wadis no layon ko wadis naira.

⁹ Cisapatada ko falohang naira to matiyaay o marad a sapatada. Matiya o harengheng no comikayay a tayra i piloodan a nitarohan no 'alomanay a ^fa a sapilood a paliding ko soni no sapikpik naira.

¹⁰ Ira i wikol naira ko matiyaay o sakalat no wadis no rarikah. O wikol naira ko sakaci'icel naira a mikari'ang to tamdaw to lima a folad.

¹¹ Malahongti naira ko citodongay a coyoh toya awaay ko para' a ofang. Ano sano Hiprayen ko ngangan noya coyoh i, ci Apaton han. Ano sano Krisiyaen i, ci Apoliyon han.

¹² Mapahrekto ko saka ccay a nika cilafo. Iraho i ikor nonini ko tosa a sapalafo.

¹³ Mila^pa ko sakaa^nem a coyoh, ta matngil ako ko ngiha' i spatay a tadimocokan no tada^kim a pipacakatan i ka'ayaw no Kawas.

¹⁴ Sowal sa koya ngiha' toya sakaa^nem a mila^paay a coyoh, <> saan.

¹⁵ Itiya i, matdal koya saspatay a coyoh. O nipatalaan cangra to ha:tiniay to mamipatay to ccay no kalitolo no tamdaw i nipatonekan a toki toya romi'ad toya folad atoya mihcaan.

¹⁶ O 'aloman no paka^faay a sofitay i, tosa a ca'or (200,000,000) saan a matngil ako.

¹⁷ Ma'araw ako i mapolosi ko ^fa ato midakaway toya ^fa. Cisapatada cangra i falohang to matiyaay o kahngang no namal ato matiyaay o cngel no langdaway a fokloh ato matiyaay o cngel no malikatay a kaliyalaway a namal. Matiya o fongoh no layon ko fongoh noya ^fa. Masadak i ngoyos naira ko namal ato 'acfel ato miwarakay 'acfel.

¹⁸ Pakayni i masadakay i ngoyos noya ^fa a namal ato 'acfel ato miwarakay a 'acfel a makari'ang ko ccay no kalitolo no tamdaw i hkal a mapatay.

¹⁹ I tini i ngoyos i wikol ko 'icel nonini a ^fa. Matiya o 'oner ko wikol naira a cifongoh. Ora fongoh naira ko sapikari'ang naira to tamdaw.

²⁰ O romaroma a ma'oripayho a tamdamdaw, oya caay ka patay nonini a sari'ang i, caay haca ka pasasiyor to faloco', caay pisawad cangra a mita'ong to nisanga'an nangra a samiyay. Pararid sa cangra a mita'ong to palafoay ato nisanga'an nangra to tada^kim ato ^kim ato fodawan ato fokloh ato kilang, o caay paka'araw, o caay pakatngil, o caay ka romakat a samiyay.

²¹ Caay pifalic cangra to faloco' a misawad to mipatayay to tamdaw a dmak ato nipisatangki naira ato nika 'odang ato nipitakaw naira.