Pa'arawan 13 - 阿美語聖經-新約附詩篇箴言

O Tatosaay a 'A'adopen

¹ Ma'araw ako ko ccay a macakatay nai riyar a 'a'adopen. Mo^tep ko pohong, pito ko fongoh nira. Malarocek a citamohong to no hongti koya mo^tepay a pohong nira. Matilid i kahaccaccay no fongoh nira ko milokesay to ngangan no Kawas a sowal.

² Matiya o lokdaw koya 'a'adopen a nengnengen. Matiya o wa'ay no tomay ko wa'ay nira. Matiya o ngoyos no layon ko ngoyos nira. Paflien noya kangic koya 'a'adopen to 'icel ato kamaro'an ato tadamaanay a sakowan nira.

³ Matiya o mamapatay a nitka'an a padoka' ko ccay a fongoh noya 'a'adopen. 'Arawhani, maadah koya doka' nira. Saka, safahka' sa ko i hkalay. Toor sato cangra toya 'a'adopen.

⁴ Tona mapafli noya kangic koya 'a'adopen to sakowan saka, ta'ong sato ko tamdamdaw toya kangic. Haloya 'a'adopen a ta'ongen nangra. Sowal sa cangra, <> saan.

⁵ Mahayda koya 'a'adopen to nika lata'ang nira a somowal a milokes to Kawas. Mahayda koya 'a'adopen to nipikowan nira to spat a polo' ira ko tosa a folad.

⁶ Saka, lokes sato ciira to Kawas ato ngangan ato kamaro'an no Kawas. Halomaro'ay i kakarayan a tamdamdaw a lokesen nira.

⁷ Mahayda ciira to nipilood nira to finawlan no Kawas a milowid. O romasato, mahayda ciira to nipikowan nira to kasaniyaro', kasafinacadan, kasakitakit ato kasasiromaroma no sowal.

⁸ Nikawrira, ira ko pitilidan to ngangan no ma'oripay, o cudad no nano mapacokay a Tofor a Siri, o caay ka tilid ko ngangan toya cudad i satapangan no nipisanga' no Kawas to hkal a polong no maro'ay i tini i hkal a tamdamdaw i, o mamita'ong toya 'a'adopen.

⁹ <

¹⁰ O mamaroforofo aca a tamdaw i, o mamarofo. O papatapatayen aca to fonos a tamdaw i, o mamapatay to fonos. Mahaenay saka, o nika kodait no faloco' ato nipiti'er no finawlan to Kawas ko nga'ay.>>

¹¹ Ma'araw ako ko roma a ccay a masadakay nai sra a 'a'adopen. Tosa ko pohong nira. Matiya o pohong no tofor a siri ko pohong nira. Matiya o caciyaw no kangic ko caciyaw nira.

¹² Tadoen nonini a 'a'adopen ko polong no sakowan noya sa'ayaway a 'a'adopen a mipa'araw i ka'ayaw noya sa'ayaway a 'a'adopen a mikowan. Paci^ci han nonini a 'a'adopen ko maro'ay i tini i hkal a tamdamdaw a papita'ong toya maadahay ko doka' a sa'ayaway a 'a'adopen.

¹³ Midmak konini a saka tosa a 'a'adopen to masamaamaanay a kafahka'an a dmak. Tfaden nira ko namal nai kakarayan tahini i hkal i ka'ayaw no tamdamdaw.

¹⁴ Mahayda ko nipidmak nira to kafahka'an a dmak i ka'ayaw noya sa'ayaway a 'a'adopen. Saka, sawien nira ko maro'ay i tini i hkal a tamdamdaw. Palimo'oten nira cangra a papisanga' to faco noya ma'oripayho a namapadoka'ay to fonos a sa'ayaway a 'a'adopen.

¹⁵ O romasato, mahayda ko nipiiyof nira a pafli to sasla'an toya faco noya sa'ayaway a 'a'adopen to sakafana'aw noya faco a caciyaw ato sakaci'icelaw noya faco a mipatay to caay pita'ong i ciiraan.

¹⁶ Ano o tadancaayto, ano o tadamaanayto, ano o cidafongayto, ano o pakoyocayto, ano o kolito, ano caayto ko koli a tamdaw i, paci^cien nira cangra a papipatopa to kawanan a kamay ano ^ca i, i pising nangra.

¹⁷ O caay ka topa, oya caay ka citilid to ngangan noya 'a'adopen ano ^ca i, o sa'osi no ngangan noya 'a'adopen i, caay ka nga'ay a micakay, caay ka nga'ay a pacakay to maamaan.

¹⁸ Orasaka, o lalongocen ko sakacitaneng. Pakakadkad ko citangalay a tamdaw to tatodong no sa'osi noya 'a'adopen, nawhani o ngangan no tamdaw ko nitoro'an noya sa'osi. O sa'osi no ngangan nira i, ^nem so'ot ^nem polo' ira ko ^nem (666).