'Olic 92 - 阿美語聖經-新約附詩篇箴言

O Sapahmek a Radiw

O saki Pasla'an a Romi'ad a 'olic.

¹ Tapangaw, tada o nga'ayay a dmak ko pikansiya i Tisowanan, Isatakaraway a Tapang, tada o makapahay a dmak ko pipahmek a romadiw i Tisowanan.

² O dafak i, mipalosiyang kami to mida'ocay a olah Iso, o dadaya i, mipasowal kami to nika so'lin Iso.

³ Ka o mo^tepay ko kliw a datok ato tomirengay a datok, ato masamaamaanay a soni no datok a pahaklong a pahmek.

⁴ Tapangaw, o nika tadamaan no dmak Iso ko sakalipahak ako, o nika tadamaan no tayal Iso ko sakapilkal ako a romadiw.

⁵ Tapangaw, wata: ko nika tadamaan no dmak Iso, tadatalolong ko niharatengan Iso.

⁶ Caay ko mamafana' ko mafolaay a tamdaw, caay ko papakapalita ko maapaay a tamdaw.

⁷ Talacowa matiya o lahad no talod i palapalaan ko nika lahad no tatiihay a tamdaw, latek macakat ko 'orip no tatiihay a tamdaw, nikawrira, o mamatkop cangra a ma^min.

⁸ Nawhani o mida'ocay a tadamaanay a Tapang kiso.

⁹ Tapangaw, mafana' kami, o mamatkop a ma^min ko 'ada Iso, o mamaliwasak a ma^min ko tatiihay a tamdaw.

¹⁰ Matiya o nika ci'icel no pala a kolong ko pipaki^mel Iso i takowanan, paflien Iso kako to mida'ocay a sakalmed.

¹¹ Ma'araw ako ko nika tfad no 'ada ako, matngil ako ko pilaling no tatiihay a tamdaw.

¹² O mamatiya o sarengad ko lahad no mo^celay a tamdaw, o mamatiya o fidngal a kilang no Lipanon ko nika takaraw nangra.

¹³ O mamatiya o nipalomaan a kilang i Fangcalay Pita'ongan to Tapang cangra, malahad canira i potal no Fangcalay Pita'ongan to Kawas ita.

¹⁴ Yo mato'asto canira i, oyananto a cihci, o ca'ang ato papah nira i, sakidmol sa a kangdaw a caay ka faar.

¹⁵ Onini i, o pahapinangay to nika mo^cel no Tapang, awaay ko caay ka mo^cel no midipotay i takowanan.