'Olic 90 - 阿美語聖經-新約附詩篇箴言

SAKA SPAT A MALOLODAY CUDAD ( 'Olic 90--106 ) O Kawas ato Tamdaw

O tolon ni Mosi, o tamdaw no Kawas.

¹ Tapangaw, o mida'ocay a piki'adingan niyam Kiso,

² Yo caho ka sanga' ko lotolotok, yo caho ka safaco ko sra ato hkal i, o Kawasto Kiso nai ti:yaho tangasa i da'oc.

³ Papinokayen Iso ko tamdamdaw i tatapangan nangra, saka, mapanokay Iso kami i sra.

⁴ O pinengneng Iso to ccay a patek a mihcaan i, mato ccayay a romi'ad, matiya o mata'lifayto a romi'ad inacila, matiya o ccay a cmet to dadaya.

⁵ Matiya o cdas ko pistol Iso a miala to 'orip niyam, mamoko' ko 'orip niyam a matiya o lmed. Matiya o molngaway to dafak a cngo' no rngos ko 'orip niyam.

⁶ Manga'ay ko lahad nira to dafak, dadaya sato i, mafadi'to a ma'icang.

⁷ Mapackok no kter Iso kami, saka, matkop no kter Iso kami.

⁸ Tlien Iso i ka'ayaw Iso ko raraw niyam, mapatalahkal Iso ko masimeday a raraw niyam.

⁹ Masakamoko' no kter Iso ko mihcaan niyam, matiya sa o ccay a picdaah ko 'orip niyam a malahdaw.

¹⁰ O mihcaan niyam a ma'orip i, pito aca a polo', ano tanektek ko tireng i, tangasa i falo a polo' ko mihcaan niyam, nikawrira, o malayapay niyam tonini a mihcaan i, deng o roray ato pades a ccay, sano ma^feray saan ko 'orip niyam a mita'lif.

¹¹ Cima ko mafana'ay to nika ci'icel no kter Iso? Cima ko mafana'ay to nika o katalawan ko kter Iso?

¹² Nanay pasifana'en kami a misa'osi to nika kamoko' no mihcaan niyam, ta matongal ko taneng niyam.

¹³ Tapangaw, tahacowa ta mapahrek ko kter Iso? Nanay kaadayayenho Iso ko polong no matayalay Iso.

¹⁴ Nanay to dafadafak parihakden kami toya caay ka falic a olah Iso, ta matomes no lipahak ko 'orip niyam.

¹⁵ O nipadesan Iso kami to pinapi:na a mihcaan, nanay haenen Iso kami a palipahak to pinapi:na a mihcaan.

¹⁶ Nanay pa'arawen Iso ko polong no matayalay Iso to tadamaanay a dmak Iso, nanay pa'arawen Iso ko wawawawa niyam to tadamaanay a 'icel Iso.

¹⁷ Tapang a Kawas niyam, nanay palmeden Iso kami. Nanay sanga'ayen Iso ko tayal niyam a ma^min. Nanay palahcien Iso ko nitayalan niyam a ma^min.