'Olic 9 - 阿美語聖經-新約附詩篇箴言

O Pikansiya to Mo^celay a Dmak no Kawas

O 'olic ni Tafiti. Mapatorod i kakridan no paradiway, o Patay no fa'inayan a wawa sanay a soni ko saparadiw. O no <> a hacong ko saparadiw.

¹ Tapangaw, sarocoden ako ko faloco' a pahmek i Tisowanan, o papalosiyangen ako ko kafahka'an a dmak Iso a ma^min.

² O nano Miso ko sakalipahak ako a romadiw, o Isatakaraway a Tapangaw, o papahmeken ako a romadiw ko nika tadamaan no ngangan Iso.

³ Yo sadak sa Kiso i, tangsol a tararikol a milaliw ko 'ada ako, tahafikod cangra a matolo' a ma^min a mapatay.

⁴ Kiso o maro'ay i tadamaanay a kamaro'an a milahciay to mo^celay a pisawkit a Kawas, pa'adingen kako, ta caay ka lasawad ko kacitodong ako.

⁵ Kakteren Iso ko roma a finacadan, tkopen Iso ko tatiihay a tamdaw, padengen Iso ko ngangan nangra a tahada'oc.

⁶ Awaayto ko 'ada ako, matkopto Iso ko niyaro' nangra, awaayto a maharateng cangra a ma^min.

⁷ Nikawrira, mida'ocay ko pikowan no Tapang, tanektek a tomireng ko tadamaanay a kamaro'an Ningra a misawkit.

⁸ O mo^celay ko pikowan Ningra to hkal, o malalenay ko pisawkit Ningra to kasafinawlan.

⁹ O piki'adingan no masamsamay a tamdaw ko Tapang, o piki'adingan haca no mapadesay a tamdaw Cingra.

¹⁰ Tapangaw, o pitadi'ecan no mafana'ay i Tisowanan Kiso, nawhani caay pifalah Kiso to milongocay i Tisowanan.

¹¹ Pahmeken a romadiw koya mikowanay i Cion a Tapang. Palosiyangen i kasakitakit ko dmak Ningra.

¹² O miharatengay ko Kawas to mapadesay a tamdaw, caay pitawal Cingra to longoc nangra, tfocen Ningra ko mikari'angay i cangraan.

¹³ Tapangaw, kaadayayenho kako. Nengnengenho ko pikari'ang no mi'intelay i takowanan. Tapangaw, pa'oripenho kako a paliyas nai patay,

¹⁴ Ta ma^deng kako a tomireng i ka'ayaw no tamdamdaw no Yirusalim a palosiyang i cangraan to nika hmek ako to polong no nga'ayay a dmak Iso. Malipahak kako a pahmek to nano pipa'orip Iso i takowanan.

¹⁵ Matfad ko roma a finacadan i nikarkaran nangra a rfong, o talakal nangra i, cangra ko tahalakalay.

¹⁶ Pakaynien no Tapang i nika mo^cel no pisawkit Ningra ko pipatalahkal to tireng Ningra, saka, tahafikod a mapolin ko tatiihay a tamdaw to nano raraw nangra.

¹⁷ O tatiihay ko dmak a tamdaw a ma^min, o mana'ayay to Kawas a tamdaw i, o tatayra a matfad i kaitiraan no mapatayay.

¹⁸ O pakosiya a tamdaw i, caay ka tahada'oc a matawal, o pafaloco'an no masamsamay i, caay ko mamalasawad.

¹⁹ Tapangaw, kalomowadto, aka haydaen ko pi^pec no hkal a tamdaw i Tisowanan. Nanay pasa'opoen Iso ko roma a finacadan i ka'ayaw Iso, sawkiten cangra.

²⁰ Tapangaw, nanay patalawen Iso cangra, pakafana'en cangra to nika o mamapatapatay aca a tamdaw cangra.