'Olic 88 - 阿美語聖經-新約附詩篇箴言

O Pitahidang a Milongoc to Pipadama

O nitilidan no tloc no ngasaw ni Korah a 'olic, o sapasifana' a 'olic, ci Himan o Icra a tamdaw. Mapatorod i kakridan no paradiway. O no <> a hacong ko saparadiw.

¹ Tapangaw, o pa'oripay a Kawas ako, saromi'ad sa kako a milongoc to pipadama Iso, salafii sa kako a milongoc i ka'ayaw Iso.

² Nanay tngilenho Iso ko pitolon ako, nanay tngilenho Iso ko pilongoc ako to pipadama Iso.

³ Adihay ko masamaamaanay a pades ako, o mamisi'ayawto i kaitiraan no mapatayay ko 'orip ako.

⁴ Matiyato o misi'ayaway to patay a tamdaw kako, awaayto ko 'ice'icel ako a ma'orip.

⁵ Mafalah kako a mapakapot i mapatayay, matiya o nipatayan a tamdaw kako a mati'nang i tadem, o matawalayto Iso a tamdaw kako, caayto ko papadamaen Iso kako.

⁶ Fahkolen Iso kako i talolongay a rfong, itira i to'manay talolongay a rfong.

⁷ Karteng a mipa^kel ko kter Iso i takowanan, mato taplik ko kter Iso a mistol i takowanan.

⁸ Papiliyasen Iso i takowanan ko widang ako, Kiso ko saka'osi nangra i takowanan, matiya o marofoay kako a awaayto ko pilaliwan.

⁹ Kadipohaw sato ko mata ako tona mararom kako. Tapangaw, milongoc kako i Tisowanan to romi'ami'ad, pasayra kako i Tisowanan a pakamay a mitolon.

¹⁰ Midmak Kiso to kafahka'an a dmak a patiri' to mapatayay saw? Lomowad ko salo'afang no mapatayay a pahmek i Tisowanan saw?

¹¹ Iraay ko pasowalay i laloma' no tadem to sini'ada Iso saw? Iraay ko palosiyangay i kaitiraan no mapatayay to nika so'lin Iso saw?

¹² Cima ko papaka'araw to kafahka'an a dmak Iso i to'manay saw? Cima ko papaka'araw to mo^cel Iso i katoledan saw?

¹³ Tapangaw, milongoc kako to pipadama Iso, mitolon kako to dafadafak i Tisowanan.

¹⁴ Tapangaw, nawiro falahen Iso kako saw? Nawiro liyasen Iso kako a caay pikihar saw?

¹⁵ Nano ka^mangan ako a mapades, kinapinapi:nato kako a sakapatayan, sararima sato kako to nano pitongal Iso a mitfoc i takowanan.

¹⁶ Ma'necto no kter Iso kako, o pikari'ang Iso ko sakatkop ako.

¹⁷ Saromi'ad sa ko pades a matiya o cdas a mi'alol i takowanan, ira ko nai cowacowaay a pades a milikot i takowanan.

¹⁸ Papiliyasen Iso i takowanan ko tadawidang ako, dengto o to'man ko patihiay i takowanan.