'Olic 86 - 阿美語聖經-新約附詩篇箴言

O Pitolon a Milongoc to Pipadama

O tolon ni Tafiti.

¹ Tapangaw, nanay tngilenho Iso ko longoc ako, paca'ofen kako, nawhani o tadancaay, awaay ko palawinaan ako.

² Nanay dipoten ko 'orip ako, nawhani, o so'linay ko faloco' ako a mitoor i Tisowanan, Kawasaw ako, pa'oripen kako, nawhani o matayalay Iso kako, o miti'eray kako i Tisowanan.

³ Tapangaw, nanay kaadayayenho Iso kako, saromi'ad sa kako a milongoc i Tisowanan.

⁴ Tapangaw, nanay palipahakenho Iso ko matayalay Iso, nawhani masarocod ko faloco' ako a milongoc i Tisowanan.

⁵ Tapangaw, o nga'ayay Kiso o maolahay a misolol to raraw, talolong ko sini'ada Iso to milongocay i Tisowanan.

⁶ Tapangaw, nanay tngilenho Iso ko pitolon ako, nanay tngilenho Iso ko pilongoc ako to pipadama Iso.

⁷ Ano mapades kako i, mitahidang kako a milongoc i Tisowanan, nawhani o mitngilay Kiso to pitolon ako.

⁸ Tapangaw, awaay ko roma a kawas to ikakaay Iso, awaay ko roma a pakadmakay to nidmakan Iso.

⁹ Tapangaw, o mamipitosor i ka'ayaw Iso a mita'ong i Tisowanan ko nisanga'an Iso a kasakitakit a ma^min, o papa'dil cangra to tadamaan no ngangan Iso.

¹⁰ Nawhani o Ci'icelay a Kawas Kiso, o kafahka'an ko dmak Iso, o dengan Kiso ko Kawas.

¹¹ Tapangaw, nanay pasifana'en Iso kako to rarakaten ako a lalan, o dado^doen ako ko so'lin Iso, nanay pasifana'en Iso kako to nika samaanen ko pisarocod a mangodo i Tisowanan.

¹² Tapang a Kawas ako, masarocod ko faloco' ako a pahmek i Tisowanan, o papa'dil kako a tahada'oc to ngangan Iso.

¹³ Nawhani tadamaan ko sini'ada Iso i takowanan, pa'oripen Iso kako a paliyas nai talolongay a kaitiraan no mapatayay.

¹⁴ Kawasaw, tayni ko malata'angay a tamdaw a mikari'ang i takowanan, sapipatayan i takowanan ko miforiforay a mari'angay a tamdaw, caayto paka'araw cangra i Tisowanan.

¹⁵ Tapangaw, o karaadayayay, o karasida'itay a Kawas Kiso, o caay ka narikay a makter, o matomesay no sini'ada ato so'lin.

¹⁶ Nanay haratengenho Iso kako, kaadayayenho kako, nanay pa'icelenho ko matayalay Iso, pa'oripenho kako, nawhani matiya kako ci winaan ako a mita'ong i Tisowanan.

¹⁷ Tapangaw, nanay patiri'en kako to nika sini'ada Iso i takowanan, ta mapakangodo koya mi'intelay i takowanan, nawhani padamaen Iso kako, hinomen Iso kako.