'Olic 85 - 阿美語聖經-新約附詩篇箴言

O Pitolon to Sakalmed no Kitakit

O nitilidan no tloc no ngasaw ni Korah a 'olic. Mapatorod i kakridan no paradiway.

¹ Tapangaw, o miharatengay Kiso to sra Iso, palololen Iso ko kitakit no Israil.

² Hpolen Iso ko raraw no finawlan Iso, sololen Iso ko patlac nangra a ma^min.

³ Caayto ka kter Kiso i cangraan, mafasawto ko marafrafay a kter Iso.

⁴ O pa'oripay i tamiyanan a Kawas, nanay palowaden Iso kami, nanay caayto ka kter Kiso i tamiyanan.

⁵ Tahada'oc han Iso kami a makter haw? Tangasaen Iso i kasarayray no tloc niyam ko kter Iso haw?

⁶ Nanay liyawenho Iso a pacakat ko 'orip niyam, ta lipahak kami o finawlan Iso a pahmek i Tisowanan.

⁷ Tapangaw, nanay pahapinangen Iso kami to caay ka falic a olah Iso, nanay pa'oripen Iso kami.

⁸ Matngilto ako ko sowal no Tapang a Kawas, ano caay piliyaw kita a romakat to lalan no maapaay i, mikton Cingra a parihaday to so'linay ko faloco' a finawlan Ningra.

⁹ O papa'oripen Ningra ko mangodoay Cingraan, o mamatomes i kitakit ita ko 'dil Ningra.

¹⁰ Malalitmoh ko sini'ada ato so'lin, matatakec ko mo^cel ato rihaday.

¹¹ Nai sra a masadak ko so'linay a dmak no tamdaw, nai kakarayan a talahkal ko mo^celay a dmak no Kawas.

¹² Ano sapacakatan ko Tapang to 'orip ita i, paloficen Ningra ko hci no pinaloma no sra ita.

¹³ I ka'ayaw no Tapang a romakat ko mo^celay a mipatala to lalan Ningra.