'Olic 84 - 阿美語聖經-新約附詩篇箴言

O Nika 'Ilol to Loma' no Kawas

O nitilidan no tloc no ngasaw ni Korah a 'olic. Mapatorod i kakridan no paradiway.

¹ O mikomoday a Tapang, tada o kaolahan ako ko kamaro'an Iso.

² Tadama'ilol kako to loma' no Tapang, masarocod ko faloco' ato tireng ako a pasayra i mida'ocay a ma'orip a Kawas a milkal a romadiw.

³ O mikomoday a Tapang, hongtiaw ako, Kawasaw ako, halo'alic ato papa'ong a padipong to malokamaro'an no wawa nanira, itira i tatihi no pipacakatan i Tisowanan.

⁴ Tadamalmeday ko maro'ay i loma' Iso a tamdaw, nawhani mararid cangra a pahmek a romadiw i Tisowanan.

⁵ O miti'eray Tisowanan a mitado to 'icel Iso i, tadamalmeday, tamor sa cangra to sakatayraaw i Cion a lotok a mita'ong i Tisowanan.

⁶ Yo pakayra cangra i makdalay a sa'owac i, malatatapangan no nemnem koya karomakatan nangra a sra, ma'orad to kafarawfawan, cifanaw i cowacowa noya sa'owac.

⁷ Romakat a romakat cangra i, matongal a matongal ko 'icel nangra, nawhani o tatayra cangra i Cion a mita'ong to tadamaanay a Kawas.

⁸ O mikomoday a Tapang a Kawas, tngilen ko pitolon ako, Kawasaw ni Yakop, nanay tngilenho Iso ko longoc ako.

⁹ Kawasaw, nanay dipoten Iso ko sapatada oya hongti niyam, nanay palmedenho Iso ko nipili'an Iso a palahongti.

¹⁰ O nika maro' i loma' Iso to ccay a romi'ad ko kanga'ay to nika maro' i roma a kamaro'an to ccay a patek a romi'ad, o pitala ako i fawahan no loma' no Kawas ko kanga'ay to nika maro' ako i loma' no tatiihay a tamdaw.

¹¹ Nawhani, o cidal ko Tapang a Kawas, o midipotay Cingra, o pafliay Cingra to sini'ada ato sakatadamaan ita, caay ka 'idi Cingra a pafli to nga'ayay a maamaan i mo^celay ko dmak a tamdaw.

¹² O mikomoday a Tapang, tada o malmeday ko miti'eray i Tisowanan a tamdaw.