'Olic 80 - 阿美語聖經-新約附詩篇箴言

O Pitolon to Sapiliyaw no Kitakit a Lomowad

O 'olic ni Asaf, o ccay no pipawacay. Mapatorod i kakridan no paradiway. O no <> a hacong ko saparadiw.

¹ Kiso o midipotay to Israil, Kiso o mikriday to tloc ni Yosif matiya o mikriday to masaflaway a siri, nanay tngilenho Iso ko pilongoc niyam! O maro'ay i kafkang no kirupim a Tapang, nanay patdien ko likat Iso!

² Nanay pahapinangen Iso i ka'ayaw no Ifraim, Pinyamin, Manasi a ngasaw ko tadamaanay a 'icel Iso. Nanay tayni Kiso a mipa'orip i tamiyanan.

³ Kawasaw, nanay palowaden Iso kami, nanay patiri'en Iso kami to sini'ada Iso, ta ma^dengho a mapa'orip kami.

⁴ Tapang a Kawas, o mikomoday a Tapang, tahacowa ko nika ^ca ka rahker Iso to pitolon no finawlan Iso saw?

⁵ O Kiso ko saka kalakakaenen han niyam ko losa', paflien Iso kami to ccay a tata'angay a takid a losa' to malonananomen niyam.

⁶ Pakonira han Iso ko nika la'afa'afas no fiyaw a kitakit to sra niyam, malakatawaanto no 'ada kami.

⁷ Kawasaw, o mikomoday a Tapang, nanay palowaden Iso kami, nanay patiri'en Iso kami to sini'ada Iso, ta ma^dengho a mapa'orip kami.

⁸ Ira ko nihawikidan Iso nai Icip a fadisoso' a kilang, laplapen Iso ko roma a finacadan, palomaen Iso konini a fadisoso' a kilang.

⁹ O nipamatangan Iso konini a sra, saka, talolong ko pipalamit nira a milalad i polong no sra.

¹⁰ Mitahpo to kasataporoporo no lotok ko lidong nira, mitahpo to takaraway a fidngal ko ca'ang nira.

¹¹ Tangasa i Tnokay a riyar ko pilalad no ca'ang nira, tangasa i Iofratis a 'alo ko pilalad no lamit nira.

¹² Nawiro tastasen Iso ko i taliyokay nira a 'adipel a palalan to mitakaway to hci nira saw?

¹³ Nawiro papicorcoren Iso ko fafoy no lotok tonini saw? Nawiro papikaenen Iso ko 'a'adopen tonini saw?

¹⁴ Kawasaw, o mikomoday a Tapang, nanay pasasiyorenho ko faloco' Iso, nengnengenho kami nai kakarayan, pa'oripenho ko finawlan Iso.

¹⁵ Nanay tayni Kiso a midipot tonini a nipalomaan Iso a fadisoso' a kilang, oya nipalahadan Iso a patanektek a sapal a kilang.

¹⁶ Lteken no 'ada niyam konini a kilang a mitodoh, nanay pasayra Kiso a makter i cangraan a mitkop.

¹⁷ Nanay pa'adingen Iso ko nipatirengan Iso a kitakit, dipoten ko nipili'an Iso a finawlan Iso.

¹⁸ Caayto ko mamiliyaw kami a miliyas i Tisowanan, haydaen ko nika 'orip niyam, ta ma^deng kami a pahmek i Tisowanan.

¹⁹ Tapang a Kawas, o mikomoday a Tapang, nanay palowaden kami, nanay patiri'enho kami to sini'ada Iso, ta ma^dengho a mapa'orip kami.