'Olic 79 - 阿美語聖經-新約附詩篇箴言

O Pitolon to Saki Kitakit

O 'olic ni Asaf.

¹ Kawasaw, mi'afas ko roma a finacadan i kitakit Iso, paaceken nangra ko Fangcalay Pita'ongan Iso, palahorac han nangra ko niyaro' no Yirusalim.

² Alaen nangra ko kodih no matayalay Iso to malosapakaen to lidep, pakaenen nangra ko 'a'adopen to kodih no fangcalay a finawlan Iso.

³ Samatiya sato o nanom no 'alo ko rmes no finawlan Iso a minawnaw to Yirusalim, awaayto ko ccaccay a fadoc to mamitadem to horac a tireng nangra.

⁴ Malalalokesento no i taliyokay a fiyaw a kitakit kami, malakatawaan, malalalikafento nangra kami.

⁵ Tapangaw, tahacowa ko nika kter Iso i tamiyanan saw? Tahada'oc haw? Tahacowa ko nika rafraf no kter Iso a matiya o namal saw?

⁶ Mamana oya mafokilay i Tisowanan ato caay pitahidang i Tisowanan a kitakit ko kakteren Iso.

⁷ Nawhani patayen nangra ko finawlan Iso, foriforen nangra ko kitakit Iso.

⁸ Nanay caay ka tfocen Iso kami to nano raraw no tato'asan niyam. Nanay kalamkamen Iso a adayay kami, nawhani awaayto ko pafaloco'an niyam.

⁹ Kawasaw, nanay padamaen Iso kami a pa'orip, to sakatadamaan Iso, pa'oripen kami, hpolen ko raraw niyam.

¹⁰ Nawiro pakonira han Iso ko pilikaf no kasakitakit to nika <> sanay. Nanay pa'arawen kami to pitfoc Iso to kasakitakit, nawhani patayen nangra ko matayalay Iso.

¹¹ Nanay tngilenho Iso ko pilaling no marofoay a tamdaw, nanay pakaynien Iso i tadamaanay a 'icel Iso ko pitdal to papatayen a marofoay.

¹² Tapangaw, tongalen no fiyaw a kitakit ko pipakangodo i Tisowanan, mamana pitoen Iso ko pitongal a paco'ay i cangraan.

¹³ Ta mida'oc a mikansiya i Tisowanan koya finawlan Iso ato nipakaenan Iso a masaflaway a siri, mipahmek kami i Tisowanan tangasa i da'oc no rayray.