'Olic 78 - 阿美語聖經-新約附詩篇箴言

O Kawas ato Finawlan Ningra

O 'olic ni Asaf, o sapasifana' a 'olic.

¹ Kamo o finawlan Ako, pitngil to pipasifana' Ako, pina'on a mitngil kamo to sowal Ako.

² Pakaynien Ako i tinako ko pitadtad a somowal, pakaynien Ako i pakakawakawasay a sowal ko pikadkad to kakmoday a rayray,

³ oya matngilay, kafana'an ita a dmak to nano nisowalan no tato'asan ita a dmak.

⁴ Caay ko sasimeden ita konini a dmak i wawawawa ita, o papasowalen ita cangra to pakayniay i fangcal ato tadamaanay a 'icel no Tapang ato kafahka'an a dmak Ningra.

⁵ Paflien Ningra to rikec ko finawlan no Israil, paflien Ningra to rikec ko tloc ni Yakop. Palimo'oten Ningra ko tato'asan ita a papipasifana' to rikec Ningra i wawawawa nangra.

⁶ Ta mafana' ko tlotloc a paratoh i tlotloc nangra.

⁷ Ta mafana' cangra a miti'er to Kawas a caay ka tawal nangra ko nano nidmakan Ningra, ta mida'oc cangra a ma'imer to limo'ot no Kawas.

⁸ Ta caay ka matiya o tato'asan ita cangra a pacoli to limo'ot, caay ka tanektek ko piti'er nangra to Kawas, caay ka so'lin ko pitoor nangra i Cingraan.

⁹ Talacowa cipana' a milood ko tlotloc ni Ifraim, nikawrira, yo piloodanto a romi'ad i, milaliw cangra.

¹⁰ Caay ka 'imer cangra to katatlekan nangra ato Kawas, caay pido^do cangra to rikec no Kawas.

¹¹ Matawalto nangra ko nano dmak no Kawas, matawalto nangra ko nipahapinangan no Kawas i cangraan a kafahka'an a dmak.

¹² Pahapinangen no Kawas i ka'ayaw no tato'asan ita ko kafahka'an a dmak, itira i Icip, i Coan a pala.

¹³ Latosaen Ningra ko riyar, matiya sa o patih a tomireng ko nanom. Kriden Ningra ko tato'asan ita a pakayra a romakat.

¹⁴ O romi'ad i, pakaynien no Kawas i to'em ko nipikrid i cangraan, o dadaya i, pakaynien Ningra i likat no namal ko nipikrid i cangraan.

¹⁵ I kohkohan i, pla'en Ningra ko 'ongcoy a pasadak to nai kmod a nanom.

¹⁶ Papowaren Ningra ko nemnem a nanom a pasadak nai 'ongcoy, samatiya sa o kalidkid no nanom no 'alo ko kapowar nira.

¹⁷ Nikawrira, pararid cangra a ciraraw i ka'ayaw no Kawas, pacolien nangra i kohkohan ko Isatakaraway a Kawas.

¹⁸ Padteng sa cangra a milifet to Kawas a milongoc to kangalayan nangra a kakaenen.

¹⁹ Sangaliwngiw sa cangra a somowal, <

²⁰ So'linay sti' han Ningra ko 'ongcoy i, powar sa ko nanom a masadak, nikawrira, ma^deng Cingra a pafli to ^pang ato titi to malokakaenen ita o finawlan Ningra saw?>> saan.

²¹ Mitngil ko Tapang tonini a sowal i, makter Cingra, saka, todoh han Ningra ko Yakop a finawlan Ningra, caayto paka'met Cingra to kter Ningra to Israil.

²² Nawhani caay paso'lin cangra i Cingraan, caay piti'er cangra to 'icel Ningra a pa'orip.

²³ Nikawrira, palimo'oten no Kawas ko kakarayan a papifawah to fawahan nira,

²⁴ Tfaden Ningra nai kakarayan ko kakaenen nangra, mapa^pod ko mana a pakaen i cangraan.

²⁵ Saka, komaen ko tamdaw to kakaenen no coyoh, pafcolen no Kawas cangra.

²⁶ Palowaden no Kawas ko fadat a fali a papifiyok, pakaynien haca Ningra i 'icel Ningra a palowad ko safalat a fali a papifiyok.

²⁷ Ta matfad ko ma^feray a 'ayam a matiya o alafoh, paflien Ningra cangra to malokakaenen nangra a titi, samatiya sa o tafok no riyar ko nika adihay nanira.

²⁸ Tfaden Ningra konini a 'ayam i kamaro'an nangra i taliyok no talo'an.

²⁹ Komaen cangra a ma^min, mafcolto cangra a komaen, do^do han no Kawas ko kangalayan nangra a pafli.

³⁰ Nikawrira, awaay ko pa^dengan nangra a komaen, yo mipa'pa'ho cangra i,

³¹ makter ko Kawas i cangraan, patayen Ningra ko ci'ice'icelay nangra, tkopen Ningra ko satadamaanay a kapah no Israil.

³² Talacowa ira ko matiniay a kafahka'an a dmak no Kawas, nikawrira, oyananto a pararid cangra a ciraraw, talacowa ira konini a kafahka'an a dmak, oyananto a caay paso'lin cangra.

³³ Orasaka, talifahal han no Kawas a pahrek ko 'orip nangra, saka, talifahal sa a mapades ko 'orip nangra.

³⁴ Yo patayen no Kawas cangra i, pasasiyor a mifalic to faloco' ko romaroma nangra, misa'icel cangra a milongoc to Kawas.

³⁵ Maharatengto nangra ko Kawas o midipotay i cangraan, o pa'oripay i cangraan Cingra o Isatakaraway a Kawas saan.

³⁶ Nikawrira, sahto o misa'fitay o misamangahay ko sowal nangra to saki Cingraan.

³⁷ Caay ka so'lin ko faloco' nangra i Kawas, caay pido^do cangra to katatlekan nangra ato Kawas.

³⁸ Nikawrira, adayay ko Kawas to finawlan Ningra, kinapinapi:nato Cingra a mi'met to kter Ningra, hpolen Ningra ko raraw nangra, caay pitkop Cingra i cangraan.

³⁹ Nawhani, maharatengto no Kawas ko nika o tadancaay, o mamapatapatay aca ko tamdaw, matiya o nifiyokan no fali cangra, caay patiko.

⁴⁰ Kinapinapi:nato cangra a pacoli to Kawas a mararid a mipakararom i Cingraan itira i kohkohan.

⁴¹ Kinapinapi:nato cangra a milifet to Kawas, pakakteren nangra Cingra o Fangcalay a Kawas no Israil.

⁴² Caayto ka harateng nangra ko tadamaanay a 'icel Ningra, caayto ka harateng nangra koya pipa'orip Ningra i cangraan a paliyas nai 'ada,

⁴³ matawalto nangra koya kafahka'an a dmak no Kawas i Icip, matawalto nangra koya kafahka'an a dmak Ningra i dafdaf no Coan.

⁴⁴ Palarmesen Ningra ko nanom no 'alo, ta caayto ka nga'ay a nanomen no Icip a tamdaw.

⁴⁵ Papiri'angen Ningra ko masafrengay a lalangaw i cangraan, papikari'angen Ningra ko takora' to omah nangra.

⁴⁶ Papi^minen Ningra a papikaen ko kakloy to pinaloma nangra, papiri'angen Ningra ko riri' to liomah nangra.

⁴⁷ Tfaden Ningra ko masa'ika'ikayay a so^da a mipatay to fadisoso' a kilang, o malaso^daay a 'o'ol ko sapipatay Ningra to sokon a kilang.

⁴⁸ Tfaden Ningra ko masa'ika'ikayay a so^da a mipatay to masaflaway a kolong nangra, o fitili' ko sapitodoh Ningra to masaflaway a siri.

⁴⁹ Tata'ang ko kter no Kawas saka, ocoren Ningra ko mipatayay a coyoh a papikari'ang i cangraan, saka, caay ka samadah ko pades nangra.

⁵⁰ Caayto pi'met Cingra to kter Ningra, caayto ka limla Cingra to 'orip nangra, saka, pakaynien Ningra i lifong ko nipipatay i cangraan.

⁵¹ Patayen Ningra ko fisac a wawa no tloc ni Ham, oya Icip a tamdaw a ma^min.

⁵² Nanoya, samatiyaen no Kawas o pakaenay to siri ko nipikrid to finawlan Ningra, kriden Ningra cangra a matiya o masaflaway a siri a pakayra i kohkohan.

⁵³ Manga'ay ko pikrid Ningra i cangraan, saka, awaay ko katalawan nangra, tahpoen no riyar ko 'ada nangra.

⁵⁴ Kriden Ningra cangra a patayra i fangcalay a pala Ningra, patayraen Ningra cangra i nialaan Ningra a lotok.

⁵⁵ Yo micomod ko finawlan Ningra i, i 'ayawto Cingra a milaplap toya roma a finacadan, pakilacen Ningra to sra ko kasangasangasaw no Israil a pakamaro' i cangraan i nano loma' no roma a finacadan.

⁵⁶ Nikawrira, pacoli cangra to Isatakaraway a Kawas a milifet i Cingraan, caay pido^do cangra to limo'ot Ningra.

⁵⁷ Milcad cangra to tato'asan nangra a pacoli to Kawas a caay ka so'lin ko faloco' nangra, matiya o mafrayay a focol no pana' cangra a caay ko tati'eren.

⁵⁸ Misanga' cangra to pisalisinan to kawas no roma a finacadan a pakakter to Kawas, to^to'en nangra ko samiyay a paka'inap a pakatlii i Cingraan.

⁵⁹ Minengneng ko Kawas tonini i, kter sato Cingra, saka, falah hanto Ningra ko Israil.

⁶⁰ Liyasen no Kawas ko talo'an Ningra i Silo, oya kamaro'an Ningra yo mikapot i titaanan.

⁶¹ Pakonira hanto Ningra ko pi'afas no 'ada toya pipahapinangan to 'icel ato 'dil Ningra a Katatlekan a Lipa.

⁶² Makter Cingra to finawlan Ningra, saka, pakonira hanto Ningra ko 'ada a mitatoy to fonos ato 'idoc a mipatay i cangraan.

⁶³ Mapatay i piloodan ko kapah nangra, saka, awaayto ko malofa'inay no kaying.

⁶⁴ Mapatay no fonos ko citodongay to ta'ong, caayto ka rarom ko maponengay nangra.

⁶⁵ Nanoya, matiya o talipa'lalay na mafoti' ko Tapang, samatiya sa o mapalowaday no ^pah a malasangay a ci'icelay a tamdaw Cingra.

⁶⁶ Laplapen Ningra ko 'ada, caayto samadahen Ningra a milowid a pakangodo cangra.

⁶⁷ Falahen Ningra ko tloc ni Yosif, caay pili'en Ningra ko ngasaw no Ifraim.

⁶⁸ O ngasaw ni Yuta ko nipili'an Ningra, o kaolahan Ningra ko Cion a lotok.

⁶⁹ Patirengen Ningra itira ko Fangcalay Pita'ongan, matiya o nika takaraw no kakarayan ko nika takaraw nira, matiya o nika tanektek no sra ko nika tanektek no loma' Ningra a tahada'oc.

⁷⁰ Pili'en Ningra ko malomatayalay Ningra ci Tafiti, tahidangen Ningra cingra nai pipakaenan to siri.

⁷¹ Caayto papipakaenen Ningra cingra to masaflaway a siri, patirengen Ningra cingra a palahongti no Israil a papidipot to finawlan no Kawas.

⁷² Sarocod sa ko faloco' ni Tafiti a midipot i cangraan, citaneng cingra a mikrid i cangraan.