'Olic 76 - 阿美語聖經-新約附詩篇箴言

O Pakalowiday ko Tapang a Kawas

O 'olic ni Asaf, o ccay no radiw. Mapatorod i kakridan no paradiway.

¹ O kafana'an no tamdamdaw no Yuta ko Kawas, o kangodoan no tamdamdaw no Israil ko ngangan Ningra.

² Ira i Yirusalim ko loma' Ningra, ira i Cion a lotok ko kamaro'an Ningra.

³ Itira Cingra a mipitek to pana' no 'ada, pelpelen Ningra ko sapatada ato fonos ato masamaamaanay a sapilood a lalosidan nangra.

⁴ Kawasaw, wata: ko nika tadamaan Iso, o kasnengan ko pinokay Iso namilowid to 'ada i lotolotokan.

⁵ Oya macodahay a 'ada a ma^min i, ma'afasto ko ni'afasan nangra a dafong, mapatayto cangra i matini, awaayto ko 'icel nangra a pacoli.

⁶ O Kawas ni Yakop, kapoi' han Iso cangra i, mapatay a ma^min ko paka^faay a sofitay ato ^fa nangra.

⁷ Kawasaw, o kangodoan o katalawan Kiso, ano makter Kiso i, cima ko mama^deng a tomireng i ka'ayaw Iso saw?

^8-9 Nai kakarayan Kiso a pasowal to pisawkit Iso, yo tomireng Kiso a misawkit a pa'orip to masamsamay a tamdaw i, matalaw ko polong no hkal, trep sato.

¹⁰ O kter no tamdaw i, o mamalasapahmekto i Tisowanan, o fadoc a tamdaw i piloodan i, o mama'imerto to pisalisinan i Tisowanan a romi'ad.

¹¹ Lahcien ko niktonan namo a sowal a pafli i Tapang a Kawas namo, kamo o i fiyaway a kitakit, pipacakat i Cingraan, kangodoen Cingra.

¹² Tfaden Ningra ko misatakaraway a wawa no hongti, o katalawan no hongtingti i hkal Cingra.