'Olic 74 - 阿美語聖經-新約附詩篇箴言

O Saki Pades no Kitakit a Pitolon

O 'olic ni Asaf, o sapasifana' a 'olic.

¹ Kawasaw, nawiro matini ko nika halafin Iso a mifalah i tamiyanan saw? Tahada'oc han Iso ko nika kter to siri Iso haw?

² Nanay haratengenho Iso ko nipili'an Iso i ti:yaho a finawlan, o nipa'oripan Iso cangra, o no Misoto a finacadan cangra, nanay haratengenho ko nano kamaro'an Iso a Cion a lotok.

³ Plengen no 'ada niyam ko Fangcalay Pita'ongan, nanay katayniho Kiso a minengneng to malaklakay a niplengan nangra.

⁴ Milkal ko 'ada Iso i Fangcalay Pita'ongan Iso, tanektek a mapatireng ko fayfay nangra itira.

⁵ Matiya o mikilangay cangra a cicaklis.

⁶ Tastasen nangra to caklis ato satoktok ko nito^to'an a pa^res a hcek no Fangcalay Pita'ongan a ma^min.

⁷ Todohen nangra ko Fangcalay Pita'ongan Iso, paacken nangra ko pita'ongan i Tisowanan.

⁸ Mikton cangra to faloco' to sapitkopaw i tamiyanan, saka, todohen nangra ko Fangcalay Kaitiraan a ma^min i tini tonini a kitakit.

⁹ Awaayto a ma'araw niyam ko fangcalay a kacipinangan a ma^min, caayto ko aira ko pali'ayaway to sowal, awaay ko mafana'ay a tamdaw to nika tahacowa ko nika halafin nonini a pades.

¹⁰ Kawasaw, tahacowa ko nika tawa no 'ada niyam i Tisowanan saw? Tahada'oc ko pipaacek nangra to ngangan Iso haw?

¹¹ Nawiro caay pipadama Kiso i tamiyanan saw? Nanay laya'en ko kamay Iso a mipeleng i cangraan.

¹² Nikawrira, Kawasaw, nano to'as a o hongti niyam Kiso, kinapi:nato Kiso a pa'orip i tamiyanan.

¹³ O tadamaanay a 'icel Iso ko sapipalicinowas Iso to riyar, Pla'en Iso ko fongoh no kangic no riyar.

¹⁴ Pelpelen Iso ko fongohfongoh no 'a'adopen no riyar, Pakaenen Iso ko 'a'adopen no kohkohan to titi nira.

¹⁵ Fohaten Iso ko kasadakan no nemnem, krahen Iso ko tata'angay a 'alo.

¹⁶ O sa'osi Iso ko saka laliyon no romi'ad ato dadaya, o nitlian Iso ko cidal ato folad.

¹⁷ Kiso ko patirengay to kalangangan no sra, o sa'osi Iso ko saka ira no kafa^detan ato kasi^nawan.

¹⁸ Tapangaw, nanay haratengenho Iso ko nika tawa no 'ada Iso i Tisowanan, nanay haratengenho Iso ko nipi^pec no caay ka ngodo a tamdaw i Tisowanan.

¹⁹ Aka patoroden i miforiforay a 'ada ko awaay ko palawinaan a finawlan Iso, aka tawalen ko masamsamay a finawlan Iso.

²⁰ Nanay haratengenho Iso ko katatlekan ita, nawhani matomes i to'manay a cani'iw no sra ko miforiforay.

²¹ Nanay caay pakangodoen Iso ko masamsamay a tamdaw, nanay papipahmeken i Tisowanan ko pakosiya o awaay ko palawinaan a tamdaw.

²² Kawasaw, nanay lomowad Kiso a pa'ading to mo^celay a dmak Iso, nanay haratengenho Iso ko pisaromi'ad no caay ka ngodo a tamdaw a matawa i Tisowanan.

²³ Aka tawalen ko pilkal no 'ada Iso, aka tawalen ko nika ^ca pasla' no 'ada Iso a parawraw.