'Olic 73 - 阿美語聖經-新約附詩篇箴言

SAKA TOLO A MALOLODAY CUDAD ( 'Olic 73--89 ) O Nika Mo^cel no Kawas

O 'olic ni Asaf.

¹ So'linay sini'ada ko Kawas to Israil, manga'ay ko pidipot Ningra to makoracay ko faloco' a tamdaw.

² Nikawrira, kinapinapi:nato kako a sakapolinan, mangatato a tahoriyac ko wa'ay ako,

³ nawhani ma'inap kako to nika cakat no 'orip no malata'angay a tamdaw, ma'araw ako ko nika cidafong no tatiihay a tamdaw i, ngaliwngiw ko faloco' ako.

⁴ Nawhani awaay ko pades nangra, ci'icel a tanektek ko tireng nangra.

⁵ Caay ka matiya o tao cangra a misemsem, caay ka matiya o tao cangra a milifet to pades.

⁶ Kala saka^res han nangra ko pisatakaraw nangra, kalariko' han nangra ko pikari'ang to tao.

⁷ Sahto o tatiihay ko masadakay i faloco' nangra, matomes no misa'fitay ko harateng nangra.

⁸ Matawa cangra a milokes to tao, o tatiihay ko sowal nangra, misatakarakaraw cangra a miples to tao.

⁹ Milokes cangra to Kawas i kakarayan, miples cangra to tamdamdaw i hkal.

¹⁰ Saka, halofinawlan no Kawas a pasayra i cangraan, laccay sa ko faloco' nangra a paso'lin to sowal nangra.

¹¹ Sowal sa cangra, <> saan.

¹² Mahaenay ko tatiihay a tamdaw, makadofahayto cangra i, mitongal haca to dafong cangra.

¹³ Kako sa to no mako i, mina'on a ma'imer to tireng, caay paka^ses a ciraraw, o pihaen ako i, awaay ko ^poc haw?

¹⁴ Kawasaw, padesen Iso kako a misaromi'ad, tfocen Iso kako to dafadafak.

¹⁵ Ano nisowalan ako konini a dmak i 'alomanay i, caay ko so'linay ko faloco' a finawlan Iso kako.

¹⁶ Misa'icel kako a miharateng to sakafana'aw tonini a dmak i, 'arawhani, awaay ko ^poc, o sakaroray aca ako.

¹⁷ Yo tayrato kako i Fangcalay Pita'ongan i, itiyato a mahapinang ako ko pahrekan no tatiihay a tamdaw.

¹⁸ Tlien Iso cangra i kamlengay a pala, ta matolo' cangra itira a matkop.

¹⁹ Ccay a mlet cangra a matkop, tada o katalawan ko pahrekan nangra.

²⁰ Matiya o lmed cangra, dafak sato i, malasawadto, Tapangaw, mapalalto Kiso i, awaayto a ma'araw cangra.

²¹ O nano cihinapecay ko faloco' ako a masmer a miharateng,

²² matiya o 'a'adopen kako a maapa, caay ka fana' kako to dmak Iso.

²³ Nikawrira, mararid kako a mikapot i Tisowanan, mararid ko kamay Iso a mikayat i takowanan.

²⁴ Pakaynien Iso i pipa'icel a sowal ko pikrid i takowanan, saikorayto i, o hahamhamen Iso kako a pacomod i 'dil Iso.

²⁵ Cimaho ko roma a kacifaloco'an ako i kakarayan saw? Cimaho ko roma a kacifaloco'an ako i hkal saw?

²⁶ O tatadanca ko tireng ato faloco' ako, nikawrira, o malo'icel ako ko Kawas, o sakalmed ako a tahada'oc Cingra.

²⁷ Caay ka ^ca ka patayen Iso koya miliyasay i Tisowanan, o caay ka so'lin ko faloco' i Tisowanan i, o tatkopen Iso cangra.

²⁸ Nikawrira, kako to no mako o mingataay to Kawas i, tadamanga'ay, o malopiki'adingan ako ko Isatakaraway a Tapang, o papalosiyang kako to dmak Iso a ma^min.